ପର୍ଲ,୧୯।୧: ମଧ୍ୟପ୍ରଦେଶ ପାଇଁ ଘରୋଇ କ୍ରିକେଟ ଖେଳି ଆସୁଥିବା ଭେଙ୍କଟେଶ ଆୟାରଙ୍କ ଭାଗ୍ୟ ବଦଳିଛି। ଗତ ବର୍ଷ ୟୁଏଇରେ ଆୟୋଜିତ ହୋଇଥିବା ଆଇପିଏଲ୍-୧୪ର ଦ୍ୱିତୀୟ ସଂସ୍କରଣ ପୂର୍ବରୁ ତାଙ୍କୁ କେହି ଚିହ୍ନି ବି ନ ଥିଲେ। ହେଲେ ଏବେ ଜାତୀୟ ଦିନିକିଆ ଦଳରେ ସ୍ଥାନ ପାଇଛନ୍ତି ସେ।
ନ୍ୟୁଜିଲାଣ୍ଡ ବିପକ୍ଷରେ ଘରୋଇ ମଇଦାନରେ ଟି୨୦ ଡେବ୍ୟୁ କରିବା ପରେ ବୁଧବାର ସେ ଦକ୍ଷିଣ ଆଫ୍ରିକା ବିପକ୍ଷରେ ଖେଳାଯାଉଥିବା ପ୍ରଥମ ଦିନିକିଆରେ ଅଲରାଉଣ୍ଡର ଭାବେ ଖେଳିବାର ସୁଯୋଗ ପାଇଛନ୍ତି।
ଆଇପିଏଲ୍ ୨୦୨୧ର ଦ୍ୱିତୀୟ ସଂସ୍କରଣରେ ଆୟାରଙ୍କୁ ଖେଳିବାକୁ ସୁଯୋଗ ମିଳିଥିଲା। ସେ କୋଲକାତା ନାଇଟ ରାଇଡର୍ସ ପକ୍ଷରୁ ଖେଳି ଜବରଦସ୍ତ ପ୍ରଦର୍ଶନ କରିଥିଲେ। ଏଣୁ କେକେଆର୍ ପ୍ଲେଅଫ୍ରେ ପହଞ୍ଚି ପାରିଥିଲା। ମୋଟ ୧୦ ମ୍ୟାଚ୍ର ୧୦ ପାଳିରେ ସେ ଖେଳି ୩୭୦ ରନ୍ କରିଥିଲେ। ଏଥିରେ ୪ ଅର୍ଦ୍ଧଶତକ ଥିଲା। ଏହାପରଠାରୁ ତାଙ୍କ ଭାଗ୍ୟର ତାଲା ଖୋଲିଛି। ଲଗାତାର ଭାବେ ସେ ଗୋଟିଏ ପରେ ଗୋଟିଏ ସଫଳତାର ଶିଢ଼ି ଚଢ଼ିବାରେ ଲାଗିଛନ୍ତି।
