ଲଣ୍ଡନ,୧୮।୮ : ଲଡର୍ସ ଟେଷ୍ଟରେ ସୁବିଧାଜନକ ସ୍ଥିତିରେ ଥିବା ସତ୍ତ୍ୱେ ଇଂଲଣ୍ଡର ପରାଜୟକୁ ହଜମ କରିପାରୁ ନାହାନ୍ତି ପୂର୍ବତନ ଅଧିନାୟକ ମାଇକେଲ ଭନ। ସେ ଅଧିନାୟକ ଜୋ ରୁଟ୍ଙ୍କ ଷ୍ଟ୍ରାଟେଜି ଉପରେ ପ୍ରଶ୍ନ ଉଠାଇଛନ୍ତି। ମହମ୍ମଦ ଶାମି ଓ ଯଶପ୍ରୀତ ବୁମରାଙ୍କ ଭଳି ଲୋୟରଅର୍ଡର ବ୍ୟାଟ୍ସମ୍ୟାନଙ୍କୁ ଆଉଟ୍ କରିବା ଲାଗି ସ୍ଲିପ୍ ଓ ସର୍କଲ ମଧ୍ୟରେ କ୍ୟାଚିଂ ପଏଣ୍ଟରେ ଫିଲ୍ଡର ରଖିବା ପରିବର୍ତ୍ତେ ବାଉଣ୍ଡ୍ରି ଅଞ୍ଚଳରେ ଅଧିକ ଫିଲ୍ଡର ରଖିଥିଲେ ରୁଟ୍। ତାଙ୍କର ଏହି ଷ୍ଟ୍ରାଟେଜି ବୁଝା ପଡ଼ୁ ନାହିଁ ବୋଲି ଭନ କହିଛନ୍ତି।
ରିଷଭ ପନ୍ତଙ୍କ ଅପେକ୍ଷା ବୁମରାଙ୍କ ପାଇଁ ଅଧିକ ଫିଲ୍ଡର ବାଉଣ୍ଡ୍ରି ଅଞ୍ଚଳରେ ରଖାଯାଇଥିଲା। ଦଳରେ ରୁଟ୍ ଓ ଜିମ୍ମି ଆଣ୍ଡରସନଙ୍କ ଭଳି ୧୦୦ରୁ ଅଧିକ ଟେଷ୍ଟ ଖେଳିଥିବା ଅଭିଜ୍ଞ ଖେଳାଳିଙ୍କ ଉପସ୍ଥିତି ସତ୍ତ୍ୱେ ଏହା କେମିତି ସମ୍ଭବ। ସେମାନଙ୍କ ଷ୍ଟ୍ରାଟେଜି ସମ୍ପୂର୍ଣ୍ଣ ଭୁଲ ବୋଲି ଲଡର୍ସରେ ଭାରତୀୟ ଦଳର ବିଜୟ ପରେ ଭନ ବିବିସିକୁ ଏହା କହିଛନ୍ତି।
୫ମ ଦିନରେ ଭାରତୀୟ ଦଳର ଅନ୍ତିମ ବ୍ୟାଟ୍ସମ୍ୟାନ ପନ୍ତଙ୍କୁ ଆଉଟ୍ କରିବା ପରେ ସୁବିଧାଜନକ ସ୍ଥିତିରେ ଥିଲା ଇଂଲଣ୍ଡ। କିନ୍ତୁ ଶାମି ଓ ବୁମରାଙ୍କ ଯୋଡ଼ିକୁ ଭାଙ୍ଗିବା ପାଇଁ ବାଉନ୍ସର ଓ ଶର୍ଟ ପିଚ୍ ଷ୍ଟ୍ରାଟେଜି ଆପଣେଇଥିଲା ଇଂଲଣ୍ଡ, ଯାହା ମ୍ୟାଚ୍କୁ ଫେରିବା ପାଇଁ ଟିମ୍ ଇଣ୍ଡିଆକୁ ସୁଯୋଗ ଦେଇଥିଲା।
