ବରଗଡ଼,୯।୮(ପ୍ରେମାନନ୍ଦ ଖମାରୀ) : ବରଗଡ଼ ସହର ସମେତ ଜିଲାରେ ଆଇନ ଶୃଙ୍ଖଳା ପରିସ୍ଥିତି ହୁଗୁଳା ହୋଇ ପଡିଛି । ଏହାକୁ ନେଇ ସ୍ଥାନୀୟ ନାଗରିକମାନେ ନିଜକୁ ଅସୁରକ୍ଷିତ ମଣୁଛନ୍ତି । ଏହି କ୍ରମରେ ରବିବାର ବରଗଡ଼ ନାଗରିକ ମଞ୍ଚ ଆହ୍ବାନରେ ଏକ ସାଧାରଣ ସଭା ହୋଇଥିଲା। ସଭାରେ ସ୍ଥାନୀୟ ବିଭିନ୍ନ ସଂଗଠନର ପ୍ରତିନିଧିମାନେ ଯୋଗ ଦେଇ ଆଇନ ଶୃଙ୍ଖଳା ପରିସ୍ଥିତିର ମୁକାବିଲା ନେଇ ନିଜ ମତ ରଖିଥିଲେ ।
ବରଗଡ଼ର ବର୍ତ୍ତମାନ ଆଇନ ଶୃଙ୍ଖଳା ପରିସ୍ଥିତି, ନିଶା ଓ ଅପରାଧିକ କାର୍ଯ୍ୟକଳାପର ବୃଦ୍ଧି ନେଇ ଉଦବେଗ ପ୍ରକାଶ ପାଇଥିଲା । ଏହି ସମସ୍ୟାଗୁଡ଼ିକର ପ୍ରତିବାଦ ଓ ସମାଧାନ ପାଇଁ ଆଗାମୀ କାର୍ଯ୍ୟପନ୍ଥା ନିର୍ଦ୍ଧାରଣ କରାଯିବ ବୋଲି ସଭାରେ ନିଷ୍ପତ୍ତି ନିଆଯାଇଥିଲା ଏବଂ ଏଥିପାଇଁ ସମସ୍ତେ ଏକତ୍ରିତ ହେବାକୁ ଆହ୍ୱାନ କରାଯାଇଥିଲା । ଗତ କିଛିଦିନତଳେ ନାଗରିକ ମଞ୍ଚ ସଭାପତି ଭୀଷ୍ମଦେବ ସରାଫଙ୍କ ଉପରେ ହୋଇଥିବା ଆକ୍ରମଣ ଘଟଣା ଉପରେ ଆଲୋଚନା ଏବଂ ଏହି ଘଟଣାକୁ ନିନ୍ଦା କରାଯାଇଥିଲା । ଉକ୍ତ ସାଧାରଣ ସଭାରେ ବରଗଡ଼ ମହିଳା ସମିତି, ସମଲେଶ୍ୱରୀ ସଂଘ, କୋଶଲ ସେନା, ଅଟୋ ରିକ୍ସା ସଂଘ, ବସ ମାଲିକ ସଂଘ, ପୂର୍ବତନ ସୈନିକ ସଂଘ, ବ୍ୟବସାୟୀକ ସଂଘ, ସଂକଳ୍ପ ପରିବାର, ଆମ୍ବେଦକର ଯୁବକ ସଂଘ, ନିଷ୍ଠା ପରିବାର ଆଦି ସଂଗଠନର ପ୍ରତିନିଧିମାନେ ଉପସ୍ଥିତ ଥିଲେ।
ନାଗରିକ ମଞ୍ଚର ସମ୍ପାଦକ ଭବାନୀ ସାହୁ କାର୍ଯ୍ୟକ୍ରମ ସଞ୍ଚାଳନ କରିଥିଲେ । ଆଡଭୋକେଟ୍ ହରିହର ପ୍ରଧାନ, ମହେଶ ଅଗ୍ରୱାଲ, ରାଜକୁମାର ବିଶି, ପ୍ରିତମ ସିଂ, ବାସୁଦେବ ଦାଶ, ଶେଖ ନଜ୍ଜୁ, କବି ମହାରଣା, ମନ୍ଦାକିନୀ ପତି, ସୂର୍ଯ୍ୟ ପ୍ରକାଶ ଦାଶ, ମାନସ ଚାନ୍ଦ, ବିରବଲ ମହାକୁଡ଼, ରିନୁ ପତି, ବୈଜୟନ୍ତି ପଣ୍ଡା, ମିଲିପମା ବେହେରା, ଅନୁପ ଶତପଥି, ସଚ୍ଚି ପଣ୍ଡା, ଶୟନ ପଣ୍ଡା ପ୍ରମୁଖ ଉପସ୍ଥିତ ରହି ନିଜ ମତ ରଖିଥିଲେ ।
