ନୂଆଦିଲ୍ଲୀ,୧୧।୬: ଆଫଗାନିସ୍ତାନ ଏ ବିପକ୍ଷ ମ୍ୟାଚ୍ରେ ଇତିହାସ ରଚିବାରୁ ବୈଭବ ସୂର୍ଯ୍ୟବଂଶୀ ବଞ୍ଚିତ ହୋଇଥିଲେ। ଗୁରୁବାର ଭାରତ ଏ ଏବଂ ଆଫଗାନିସ୍ତାନ ଏ ମଧ୍ୟରେ ଟ୍ରାଏ-ସିରିଜ ମୁକାବିଲାରେ, ସୂର୍ଯ୍ୟବଂଶୀ ୨୦୦ ଷ୍ଟ୍ରାଇକ ରେଟ ସହିତ ଏକ ଧମାକାଦାର ଇନିଂସ ଖେଳିଥିଲେ। ସେ ୪୪ ରନ କରିଥିଲେ, ଲିଷ୍ଟ-ଏ କ୍ରିକେଟ୍ରେ ଦ୍ରୁତତମ ଅର୍ଦ୍ଧଶତକର ରେକର୍ଡରୁ ଅଳ୍ପକେ ବଞ୍ଚିତ ହୋଇଥିଲେ।
ସୂର୍ଯ୍ୟବଂଶୀଙ୍କ ପାଖରେ ସବୁଠାରୁ ଦ୍ରୁତତମ ଲିଷ୍ଟ-ଏ ଅର୍ଦ୍ଧଶତକର ରେକର୍ଡ ସ୍ଥାପନ କରିବାର ସୁଯୋଗ ଥିଲା କିନ୍ତୁ ସେ ଏହି ରେକର୍ଡଠାରୁ ମାତ୍ର ଛଅ ରନ ପଛରେ ରହି ତାଙ୍କ ଉଇିକେଟ ହରାଇଥିଲେ।
ତାଙ୍କର ଏପର୍ଯ୍ୟନ୍ତର ବ୍ୟକ୍ତିଗତ ଦ୍ରୁତତମ ଲିଷ୍ଟ-ଏ ଅର୍ଦ୍ଧଶତକ ୨୫ ବଲ୍ରେ ଆସିଥିଲା, ଯାହାକି ଗତବର୍ଷ ବିଜୟ ହଜାରେ ଟ୍ରଫିରେ ବିହାର ପାଇଁ ଖେଳୁଥିବା ସମୟରେ ହାସଲ କରାଯାଇଥିଲା।
ସୂର୍ଯ୍ୟବଂଶୀ ଟ୍ରାଏ-ସିରିଜର ପ୍ରଥମ ମ୍ୟାଚ୍ରେ ବିଫଳ ହୋଇଥିଲେ। ସେ ମାତ୍ର ୧୪ ରନରେ ଆଉଟ ହୋଇଥିଲେ। ଯଦିଓ ସେ ଏଥର ଅର୍ଦ୍ଧଶତକ କିମ୍ବା ଶତକ କରି ନ ଥିଲେ, ସେ ପ୍ରଭସିମରନ ସିଂହଙ୍କ ସହ ମିଶି ଟିମ ଇଣ୍ଡିଆକୁ ଏକ ଦୃଢ଼ ଆରମ୍ଭ ଦେଇଥିଲେ। ୭୪ ରନର ଓପନିଂ ପାର୍ଟନରସିପ କରିଥିଲେ। ଏହି ଯୋଡ଼ି ମାତ୍ର ୭ ଓଭରରେ ୭୪ ରନ ସଂଗ୍ରହ କରିଥିଲେ। ସୂର୍ଯ୍ୟବଂଶୀଙ୍କ ୪୪ ରନର ଇନିଂସରେ ୯ଟି ଚୌକା ଥିଲା କିନ୍ତୁ କୌଣସି ଛକା ନ ଥିଲା। ଭୁଲ୍ ସର୍ଟ ଖେଳି ଆଉଟ୍ ହୋଇଥିଲେ।
ତିଲକ ବର୍ମାଙ୍କ ଅଧିନାୟକତ୍ୱରେ, ଭାରତୀୟ ଦଳ ଟ୍ରାଏ-ସିରିଜର ପ୍ରଥମ ମ୍ୟାଚ୍ରେ ଶ୍ରୀଲଙ୍କା ଏ ଦଳକୁ ୮ ରନରେ ପରାସ୍ତ କରିଥିଲା। ୨୧ ଜୁନ୍ରେ ଫାଇନାଲ ପୂର୍ବରୁ, ଭାରତ, ଆଫଗାନିସ୍ତାନ ଏବଂ ଶ୍ରୀଲଙ୍କା ଦଳ ପ୍ରତ୍ୟେକେ ଚାରୋଟି ମ୍ୟାଚ ଖେଳିବେ। ୨୧ ଜୁନ୍ରେ ପଏଣ୍ଟ ଟେବୁଲ୍ର ଶୀର୍ଷ ଦୁଇ ଦଳ ମଧ୍ୟରେ ଫାଇନାଲ ମୁକାବିଲା ହେବ।
Dharitri – Odisha’s No.1 Odia Daily
