ନୂଆଦିଲ୍ଲୀ,୬।୮: ବୈଭବ ସୂର୍ଯ୍ୟବଂଶୀ ମାତ୍ର ୧୫ ବର୍ଷ ବୟସରେ ଅନ୍ତର୍ଜାତୀୟ କ୍ରିକେଟରେ ହଇଚଇ ସୃଷ୍ଟି କରିଛନ୍ତି। ଏହା ସହିତ ସେ ଭାରତୀୟ ପୁରୁଷ ଦଳର ସବୁଠାରୁ କମ ବୟସ୍କ କ୍ରିକେଟର ଭାବରେ ସଚିନ ତେନ୍ଦୁଲକରଙ୍କୁ ପଛରେ ପକାଇ ଦେଇଛନ୍ତି। ଡେବ୍ୟୁ କରିବାର କିଛି ମ୍ୟାଚ ପରେ ଜିମ୍ବାୱେ ଗସ୍ତରେ ବୈଭବ ଏକ ଅର୍ଦ୍ଧଶତକ ହାସଲ କରିଛନ୍ତି, ଯାହାଫଳରେ ସେ ଅନ୍ତର୍ଜାତୀୟ କ୍ରିକେଟରେ ଅର୍ଦ୍ଧଶତକ ହାସଲ କରିବାରେ ସବୁଠାରୁ କମ ବୟସ୍କ ବ୍ୟାଟ୍ସମ୍ୟାନ ହୋଇପାରିଛନ୍ତି। ବୈଭବ ଅତି ଅଳ୍ପ ବୟସରେ ବେଶ ଚର୍ଚ୍ଚାକୁ ଆସିଛନ୍ତି।
ଏହା ପୂର୍ବରୁ ଭାରତୀୟ କ୍ରିକେଟରେ ଏପରି କିଛି ଖେଳାଳି ଆସିଥିଲେ, ଯେଉଁମାନେ କମ ବୟସରେ ଖ୍ୟାତି ଅର୍ଜନ କରିଥିଲେ ଏବଂ ପରେ ହଠାତ୍ ସେମାନଙ୍କ କ୍ୟାରିୟରରେ ଏକ ବଡ଼ ଅଧଃପତନ (Downfall) ଦେଖିବାକୁ ମିିଳିଥିଲା। ଏହି ତାଲିକାରେ ସଚିନ ତେନ୍ଦୁଲକରଙ୍କ ସହିତ ଖେଳିଥିବା ବିନୋଦ କାମ୍ବଲି ଏବଂ ବର୍ତ୍ତମାନର ଯୁବ ବ୍ୟାଟ୍ସମ୍ୟାନ ପୃଥ୍ବୀ ଶ’ ସାମିଲ ଅଛନ୍ତି।
ବିନୋଦ କାମ୍ବଲି: ଆରମ୍ଭରେ କାମ୍ବଲିଙ୍କୁ ପ୍ରାୟତଃ ସଚିନଙ୍କଠାରୁ ଅଧିକ ପ୍ରତିଭାବାନ ବ୍ୟାଟ୍ସମ୍ୟାନ ବୋଲି କୁହାଯାଉଥିଲା। କିନ୍ତୁ ସମୟ ଗଡ଼ିବା ସହିତ ସଚିନ ନିଜର ନିରନ୍ତରତା ବଜାୟ ରଖି ଖେଳିଚାଲିଲେ। ଅନ୍ୟପକ୍ଷରେ, କାମ୍ବଲି ବିଭିନ୍ନ ଅନ୍ୟାନ୍ୟ ଜିନିଷରେ ଜଡ଼ିଗଲେ, ଯାହା ତାଙ୍କ କ୍ୟାରିୟର ଉପରେ ଏକ ବଡ଼ ନକାତ୍ମକ ପ୍ରଭାବ ପକାଇଲା ଏବଂ ସମୟ ପୂର୍ବରୁ ସେ କ୍ରିକେଟ ଦୁନିଆରୁ ହଜିଗଲେ।
ପୃଥ୍ବୀ ଶ’: ସେହିପରି ୧୮ ବର୍ଷ ବୟସରେ ଅନ୍ତର୍ଜାତୀୟ କ୍ରିକେଟରେ ପଦାର୍ଥ କରିଥିବା ପୃଥ୍ବୀ ଶ’ଙ୍କଠାରେ ସଚିନ ତେନ୍ଦୁଲକରଙ୍କ ସମେତ ଅନେକ ଦିଗ୍ଗଜ ବ୍ୟାଟ୍ସମ୍ୟାନଙ୍କୁ ଝଲକ ଦେଖିବାକୁ ମିଳିଥିଲା ବୋଲି କୁହାଯାଉଥିଲା। କିନ୍ତୁ ଶ’ ମଧ୍ୟ ନିଜର ପ୍ରଦର୍ଶନରେ ନିରନ୍ତର ରହିପାରିଲେ ନାହିଁ। ସମୟ ସହିତ ସେ ମଧ୍ୟ ବିଭିନ୍ନ ବିବାଦ ଏବଂ ଅନ୍ୟାନ୍ୟ ଜିନିଷରେ ଫସିଗଲେ ଏବଂ କ୍ରିକେଟରୁ ଧୀରେ ଧୀରେ ଦୂରେଇଗଲେ।
ଭାରତୀୟ ଦଳର ପୂର୍ବତନ ବ୍ୟାଟ୍ସମ୍ୟାନ ରବିନ ଉଥାପ୍ତା ବୈଭବ ସୂର୍ଯ୍ୟବଂଶୀଙ୍କ ଭବିଷ୍ୟତକୁ ନେଇ ମଧ୍ୟ ଏହିପରି ସମାନ ଚିନ୍ତା ପ୍ରକାଶ କରିଛନ୍ତି। ଯୁବ ଅବସ୍ଥାରେ ଏତେ ଶୀଘ୍ର ସଫଳତା ପାଇବା ପରେ ଖେଳାଳିମାନେ କିପରି ସଠିକ ମାର୍ଗରେ ରହିବା ଆବଶ୍ୟକ, ସେନେଇ ସେ ସତର୍କ କରାଇଛନ୍ତି।
