ନୂଆଦିଲ୍ଲୀ, ୧୭।୧: ଭାରତରେ କରୋନା ସଂକ୍ରମଣ ହାର ଯଥେଷ୍ଟ ହ୍ରାସ ପାଇଥିବାବେଳେ ଶନିବାର ଟିକାକରଣ ଅଭିଯାନ ଆରମ୍ଭ ହୋଇଛି। ବ୍ରିଟେନର ନୂଆ ଷ୍ଟ୍ରେନ୍କୁ ନେଇ ସାରା ବିଶ୍ୱରେ ଉଦ୍ବେଗ ପ୍ରକାଶ ପାଇଥିବାବେଳେ ସମସ୍ତେ ଟିକା ନେବା ଜରୁରୀ ଏବଂ ଏହା ସଂକ୍ରମଣର ଦ୍ୱିତୀୟ ଲହରକୁ ରୋକିପାରିବ ବୋଲି ବିଶେଷଜ୍ଞମାନେ ମତ ଦେଇଛନ୍ତି। ଦେଶରେ ଭୂତାଣୁ ସଂକ୍ରମଣର ପ୍ରଥମ ଲହର ଉଲ୍ଲେଖନୀୟ ଭାବେ ହ୍ରାସ ପାଇଥିବାବେଳେ ଟିକାକରଣ ଆରମ୍ଭ ହୋଇଥିବାରୁ ଦ୍ୱିତୀୟ ଲହର ଆସିବା ପୂର୍ବରୁ ଅଧିକାଂଶ ଦେଶବାସୀ ଟିକା ନେଇସାରିଥିବେ ବୋଲି ମେଦାନ୍ତ ଲଇଭର ଇନ୍ଷ୍ଟିଚ୍ୟୁଟର ଅଧ୍ୟକ୍ଷ ଡ. ଏ.ଏସ୍. ସୋଇନ୍ କହିଛନ୍ତି। ଦେଶରେ ଏପର୍ଯ୍ୟନ୍ତ ଗୋଷ୍ଠୀ ରୋଗ ପ୍ରତିରୋଧକ ଶକ୍ତି ସୃଷ୍ଟି ହୋଇ ନ ଥିବାବେଳେ ବିଦେଶ ଯାତ୍ରାଠାରୁ ଆରମ୍ଭ କରି ସମସ୍ତ ଆର୍ଥିକ କାରବାର ଖୋଲିଯାଇଥିବାରୁ ସଂକ୍ରମଣ ଅଧିକ ବ୍ୟାପିବା ଆଶଙ୍କା ସୃଷ୍ଟି ହୋଇଥିଲା। ସଂକ୍ରମଣ ଦ୍ୱିତୀୟ ଲହର କେବେ ଆରମ୍ଭ ହେବ ତାହା ମଧ୍ୟ କାହାକୁ ଜଣାନାହିଁ। ସେଥିପାଇଁ ଟିକାକରଣ ଜରୁରୀ ଥିଲା ବୋଲି ପବ୍ଲିକ୍ ହେଲ୍ଥ ଫାଉଣ୍ଡେଶନ ଅଫ୍ ଇଣ୍ଡିଆର ଅଧ୍ୟକ୍ଷ ପ୍ରଫେସର କେ. ଶ୍ରୀନାଥ ରେଡ୍ଡୀ କହିଛନ୍ତି। ଟିକାକରଣ ସଂକ୍ରମଣ ଓ ଏଥିଜନିତ ସାଙ୍ଘାତିକତାକୁ କମାଇବାରେ ସହାୟକ ହେବ ବୋଲି ଗଙ୍ଗାରାମ ହସ୍ପିଟାଲର ଇଣ୍ଟରନାଲ ମେଡିସିନ୍ର ଉପାଧ୍ୟକ୍ଷ ତଥା ବରିଷ୍ଠ ପରାମର୍ଶଦାତା ଡ. ଅତୁଲ କକର କହିଛନ୍ତି।
ଦେଶ ପାଇଁ ସ୍ମରଣୀୟ ଦିନ
ବହୁଦିନର ପ୍ରତୀକ୍ଷାର ଅନ୍ତ ଘଟି କୋଭିଡ୍ ଟିକାକରଣ ଆରମ୍ଭ ହୋଇଥିବାରୁ ଦେଶବାସୀଙ୍କ ପାଇଁ ଏହା ଏକ ସ୍ମରଣୀୟ ଦିନ ବୋଲି ଉପରାଷ୍ଟ୍ରପତି ଏମ୍. ଭେଙ୍କାୟାନାଇଡୁ କହିଛନ୍ତି। ଖୁବ୍ କମ୍ ସମୟ ମଧ୍ୟରେ ଟିକାର ବିକାଶ କରିଥିବା ବୈଜ୍ଞାନିକମାନଙ୍କୁ ସେ ଉଚ୍ଚ ପ୍ରଶଂସା କରିଛନ୍ତି। ଅମିତ୍ ଶାହାଙ୍କ ସମେତ ବହୁ କେନ୍ଦ୍ରମନ୍ତ୍ରୀ ଟିକାକରଣ ଅଭିଯାନର ସଫଳତାକୁ ନେଇ ପ୍ରଶଂସା କରିଥିଲେ। ଭାରତ ପ୍ରସ୍ତୁତ ଟିକା ଆତ୍ମନିର୍ଭର ଭାରତ ନିର୍ଣ୍ଣୟର ପ୍ରତୀକ ବୋଲି ସ୍ବରାଷ୍ଟ୍ରମନ୍ତ୍ରୀ ଶାହା କହିଥିଲେ। ଆଜିର ଦିନ ସବୁଠୁ ମହତ୍ତ୍ୱପୂର୍ଣ୍ଣ ବୋଲି ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା କହିଛନ୍ତି। କରୋନା ମହାମାରୀ ବିରୋଧୀ ଲଢ଼େଇ ଜିତିବାରେ କେନ୍ଦ୍ର ସରକାର ଏକ ନିର୍ଣ୍ଣାୟକ ପଦକ୍ଷେପ ନେଇଥିବା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି। ମହାମାରୀ ବିରୋଧୀ ଲଢ଼େଇରେ ସାମିଲ ହୋଇଥିବା ଦେଶର ଡାକ୍ତର, ନର୍ସ, ପାରାମେଡିକାଲ କର୍ମଚାରୀ, ପୋଲିସ ଓ ଅନ୍ୟ ଆଗଧାଡ଼ିର କର୍ମଚାରୀମାନ ପାଇଁ ସୁରକ୍ଷା କବଚ ମିଳିଗଲା ବୋଲି ସେ ମତ ଦେଇଛନ୍ତି। ଟିକାକରଣ ଅଭିଯାନ ଐତିହାସିକ ଓ ସ୍ମରଣୀୟ ବୋଲି ଆଇନମନ୍ତ୍ରୀ ରବିଶଙ୍କର ପ୍ରସାଦ କହିଛନ୍ତି।
ଗର୍ବ ଅନୁଭବ କରୁଛୁ: ହିତାଧିକାରୀ
ଟିକାକରଣର ଐତିହାସିକ ମୁହୂର୍ତ୍ତରେ ସାମିଲ ହୋଇଥିବାରୁ ଗର୍ବ ଅନୁଭବ କରୁଥିବା ଦିଲ୍ଲୀର ଏଲ୍ଏନ୍ଜେପି ହସ୍ପିଟାଲ ନର୍ସ ବିଜି ଟୋମି କହିଛନ୍ତି। ପ୍ରଥମ ଦିନରେ ଟିକା ନେଇଥିବା ଅଧିକାଂଶ ସ୍ବାସ୍ଥ୍ୟ କର୍ମଚାରୀ ଖୁସି ବ୍ୟକ୍ତ କରିଛନ୍ତି। ଗୁଜବରେ ବିଶ୍ୱାସ ନ କରିବାକୁ ରାଜୀବ ଗାନ୍ଧୀ ସୁପର ସ୍ପେଶିଆଲିଟି ହସ୍ପିଟାଲର ପୁଲମୋନୋଲୋଜି ବିଭାଗ ମୁଖ୍ୟ ବିକାଶ ଡୋଗ୍ରା ଜନସାଧାରଣଙ୍କୁ ଅନୁରୋଧ କରିଛନ୍ତି। ଟିକା ସମ୍ପୂର୍ଣ୍ଣ ନିରାପଦ। ସେ ଟିକା ନେବା ପରେ କୌଣସି ଅସୁବିଧା ଅନୁଭବ କରୁ ନ ଥିବା କହିଛନ୍ତି। ଦେଶର ପ୍ରଥମ କୋଭିଡ୍ ଟିକା ନେଇଥିବା ଏମ୍ସ ସଫେଇ କର୍ମଚାରୀ ମନୀଷ କୁମାର କହିଛନ୍ତି, ଏଣିକି ସେ ବିନା ଦ୍ୱିଧାରେ ନିଜର କର୍ତ୍ତବ୍ୟ ସମ୍ପାଦନ କରିବେ।
କୋଭାକ୍ସିନ୍କୁ ନା କହିଲେ ଆର୍ଏମ୍ଏଲ୍ ଡାକ୍ତର
ଦିଲ୍ଲୀର ରାମମନୋହର ଲୋହିଆ (ଆର୍ଏମ୍ଏଲ୍) ହସ୍ପିଟାଲର ଡାକ୍ତରମାନେ ଭାରତ ବାୟୋଟେକ୍ ପ୍ରସ୍ତୁତ କୋଭାକ୍ସିନ୍ ଟିକା ନେବାକୁ ଅନିଚ୍ଛା ପ୍ରକାଶ କରିଛନ୍ତି। ସେମାନେ ହସ୍ପିଟାଲ ସୁପରିଣ୍ଟେଣ୍ଡେଣ୍ଟଙ୍କୁ ଚିଠି ଲେଖି କୋଭାକ୍ସିନ୍ ବଦଳରେ ସିରମ୍ ଇନ୍ଷ୍ଟିଚ୍ୟୁଟ୍ର କୋଭିଶିଲ୍ଡ ନେବାକୁ ଚାହାନ୍ତି ବୋଲି କହିଛନ୍ତି। କୋଭାକ୍ସିନ୍ର କ୍ଲିନିକାଲ ପରୀକ୍ଷା ସମ୍ପୂର୍ଣ୍ଣ ହୋଇ ନ ଥିବାରୁ ଉକ୍ତ ଟିକା ନେବା ଲାଗି ଡାକ୍ତରମାନେ ଭୟଭୀତ ବୋଲି ଆର୍ଏମ୍ଏଲ୍ ହସ୍ପିଟାଲର ରେସିଡେଣ୍ଟ ଡକ୍ଟର୍ସ ଆସୋସିଏଶନ ପକ୍ଷରୁ କୁହାଯାଇଛି। ସମସ୍ତ ପରୀକ୍ଷା ଶେଷ କରିଥିବା କୋଭିଶିଲ୍ଡ ଟିକା ଦେବା ଲାଗି ଆସୋସିଏଶନ ପକ୍ଷରୁ ଅନୁରୋଧ କରାଯାଇଛି। ଅନ୍ୟପକ୍ଷରେ ମେଡିକାଲ ସୁପରିଣ୍ଟେଣ୍ଡେଣ୍ଟ ଡ. ଏ.କେ. ସିଂ ରାଣା ଶନିବାର କୋଭାକ୍ସିନ୍ ଟିକା ନେଇଛନ୍ତି।
ଅଭିନନ୍ଦନ ଜଣାଇଲେ ଭୁଟାନ, ନେପାଳ
ଭାରତରେ ବିଶ୍ୱର ସର୍ବବୃହତ କୋଭିଡ୍ ଟିକାକରଣ ଅଭିଯାନ ଆରମ୍ଭ ହୋଇଥିବାରୁ ପଡୋଶୀ ଦେଶ ନେପାଳ ଓ ଭୁଟାନ ଅଭିନନ୍ଦନ ଜଣାଇଛନ୍ତି। ମହାମାରୀ କଷଣ ଦୂର କରିବାରେ ଏହା ସହାୟକ ହେବ ବୋଲି ଭୁଟାନ ପ୍ରଧାନମନ୍ତ୍ରୀ ଲୋଟୟ ଶେରିଙ୍ଗ ଆଶାବ୍ୟକ୍ତ କରିଛନ୍ତି। ଐତିହାସିକ ଟିକାକରଣ ଅଭିଯାନ ପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଦେଶବାସୀଙ୍କୁ ଅଭିନନ୍ଦନ ଜଣାଇଛନ୍ତି। ସେହିପରି ନେପାଳ ବହିର୍ବ୍ୟାପାର ମନ୍ତ୍ରୀ ପ୍ରଦୀପ କୁମାର ଗ୍ୟାଓ୍ବାଲି କୋଭିଡ୍ ଟିକାର ସଫଳ ବିକାଶ ପାଇଁ ଭାରତକୁ ଅଭିନନ୍ଦନ ଜଣାଇବା ସହ ମହାମାରୀରୁ ଶୀଘ୍ର ମୁକ୍ତି ମିଳିବା ନେଇ ଦୃଢ଼ୋକ୍ତି ପ୍ରକାଶ କରିଛନ୍ତି।
