ଓ୍ବାଶିଂଟନ,୭।୬ : ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନଙ୍କ ଗୁପ୍ତଚର ଉପଗ୍ରହକୁ ନେଇ ଆମେରିକା ପକ୍ଷରୁ ଉଦବେଗ ପ୍ରକାଶ ପାଇଛି। ବର୍ତ୍ତମାନ ଆମେରିକା ନିଜେ ଗୁପ୍ତଚର ଉପଗ୍ରହ ଉତକ୍ଷେପଣ କରିବାକୁ ଯୋଜନା କରିଛି। ମହାକାଶରେ ରୁଷିଆ ଏବଂ ଚାଇନାର ବଢୁଥିବା ଶକ୍ତିକୁ ପରାସ୍ତ କରିବାକୁ ଆମେରିକା ପ୍ରସ୍ତୁତି ଚଳାଇଛି।
ଏହି କାରଣରୁ ଆମେରିକାର ସ୍ପେସ ଫୋର୍ସ ଆସନ୍ତା କିଛି ମାସ ମଧ୍ୟରେ ଗୁପ୍ତଚର ଉପଗ୍ରହ ଉତକ୍ଷେପଣ କରିବ। ଏହି ଉପଗ୍ରହଗୁଡ଼ିକର ମୁଖ୍ୟ କାର୍ଯ୍ୟ ହେବ ରୁଷିଆ ଏବଂ ଚାଇନାର ପ୍ରତ୍ୟେକ ଗତିବିଧି ଉପରେ ନଜର ରଖିବା। ଜୁଲାଇ ପରେ ଏହି ଉପଗ୍ରହଗୁଡ଼ିକ ଉତକ୍ଷେପଣ କରାଯିବ ବୋଲି କୁହାଯାଉଛି।
ଏହାପୂର୍ବରୁ ଉତ୍ତର କୋରିଆ ଦ୍ୱାରା ଗୁପ୍ତଚର ଉପଗ୍ରହ ଉତକ୍ଷେପଣକୁ ଆମେରିକା ଦୃଢ଼ ସମାଲୋଚନା କରିଥିଲା। ଆମେରିକାର ଜାତୀୟ ସୁରକ୍ଷା ପରିଷଦ ମୁଖପାତ୍ର ଆଡାମ ହଗ କହିଛନ୍ତି ୱାଶିଂଟନ ଉତ୍ତର କୋରିଆର ଗୁପ୍ତଚର ଉପଗ୍ରହ ଉତକ୍ଷେପଣକୁ ନିନ୍ଦା କରିଛି କାରଣ ଏହା ନିଷିଦ୍ଧ ବାଲିଷ୍ଟିକ କ୍ଷେପଣାସ୍ତ୍ର ପ୍ରଯୁକ୍ତିବିଦ୍ୟା ବ୍ୟବହାର କରିଛି। ଏହାଦ୍ୱାରା ଉତ୍ତେଜନା ବୃଦ୍ଧି ପାଇଛି ଏବଂ ଏହି ଅଞ୍ଚଳ ତଥା ଅନ୍ୟାନ୍ୟ ସ୍ଥାନରେ ସୁରକ୍ଷା କ୍ଷୁର୍ଣ୍ଣ ହୋଇଛି। ଫଳରେ ଅନ୍ତର୍ଜାତୀୟସ୍ତରରେ ଅସ୍ଥିରତା ବୃଦ୍ଧି ପାଇବାର ଆଶଙ୍କା ରହିଛି।
ତେବେ ଉତ୍ତର କୋରିଆର ଶାସକ କିମ ଜୋଙ୍ଗ-ଉନଙ୍କ ଭଉଣୀ ଆମେରିକାର ମନ୍ତବ୍ୟକୁ ପଛରେ ପକାଇ ଏହାକୁ ଗ୍ୟାଙ୍ଗଷ୍ଟର ଭଳି କପଟୀ ବୋଲି ଅଭିହିତ କରିଛନ୍ତି। ଏଥି ସହିତ, କିଛି ଦିନ ପୂର୍ବରୁ ଏକ ଖବର ଆସିଥିଲା ଚାଇନାର ଏକ ଉପଗ୍ରହ ମହାକାଶ ଭିତରେ ଥିବା ଏକ ଆମେରିକୀୟ ଉପଗ୍ରହ ଉପରେ ଗୁପ୍ତଚର କରିଥିଲା। ଏହା ଆମେରିକାର ପ୍ରତିରକ୍ଷା ବିଭାଗରେ ଆଲୋଡ଼ନ ସୃଷ୍ଟି କରିଥିଲା। ଏହି ଘଟଣା ପରଠାରୁ ମହାକାଶରେ ଚାଇନା ଏବଂ ରୁଷିଆ ସହିତ କଡ଼ା ପ୍ରତିଯୋଗିତା କରିବା ପାଇଁ ପ୍ରସ୍ତୁତି ଆରମ୍ଭ ହୋଇଥିଲା।
