ଜୟପୁର, ୫।୫ (ନି.ପ୍ର. ): ଅପର କୋଲାବ ପ୍ରକଳ୍ପ ପାଣି ପଞ୍ଚାୟତର ସର୍ବୋଚ୍ଚ କମିଟିର ଏକ ବୈଠକ ବୁଧବାର ବୋରିଗୁମ୍ମା କାର୍ଯ୍ୟାଳୟ ପରିସରରେଅନୁଷ୍ଠିତ ହୋଇଛି। ମୁଖ୍ୟଯନ୍ତ୍ରୀ ଶତ୍ରୁଘନ ମହାରଣା ସଭାପତିତ୍ୱ କରିଥିଲେ। ଚଳିତ ରବି ଋତୁରେ କେନାଲରେ ଜଳ ଚଳିତ ମାସ ୧୦ ତାରିଖ ପରିବର୍ତ୍ତେ ୨୦ ତାରିଖ ପର୍ଯ୍ୟନ୍ତ ଯୋଗାଣ ପାଇଁ ନିଷ୍ପତ୍ତି ହୋଇଥିଲା। ପାଣି ପଞ୍ଚାୟତ ମାଧ୍ୟମରେ ଏମ୍ଏନଆରଇଜିଏସ୍ ସହ ଅନ୍ୟାନ୍ୟ କାର୍ଯ୍ୟ କରିବା ପାଇଁ କମିଟିର ସଭାପତି ବାଳକୃଷ୍ଣ ବିଶୋୟୀ, କାର୍ଯ୍ୟନିର୍ବାହୀ ସଦସ୍ୟ ଭାସ୍କର ବିଶୋୟୀ, ସଦାଶିବ ତ୍ରିପାଠୀ, ତପନ ପାଣିଗ୍ରାହୀ, କରଣାଳ କମିଟିର ସମ୍ପାଦକ ରମେଶ ବିଶୋୟୀ, ସଭାପତି ରମାକାନ୍ତ ବିଶୋୟୀ ପ୍ରମୁଖ ବୈଠକରେ ଦାବି କରିଥିଲେ। ପଞ୍ଚାୟତ ସମିତି ମାଧ୍ୟମରେ ବିନା ଅନୁମୋଦନରେ ଆଉଟଲେଟ କରାଯାଇ କ୍ଷେତ୍ର ନାଳୀ ନିର୍ମାଣ କରାଯାଉଥିବାରୁ ଏହାକୁ ତୁରନ୍ତ ବନ୍ଦ କରିବା ଲାଗି ବିଡିଓମାନଙ୍କୁ ବିଭାଗ ପକ୍ଷରୁ ଚିଠି ଲେଖିବା ପାଇଁ ନିଷ୍ପତ୍ତି ହୋଇଥିଲା। ଖରିଫ ଚାଷ ଲାଗି ଆଗାମୀ ଶୀର୍ଷ କମିଟି ବୈଠକ ଜୁନ ୨୨ରେ ବସିବାକୁ ସ୍ଥିର କରାଯାଇଥିଲା। ଅତିରିକ୍ତ ମୁଖ୍ୟଯନ୍ତ୍ରୀ ଅନିଲ ପାଣିଗ୍ରାହୀ ପରିଚାଳନା କରିଥିଲେ। ବୈଠକରେ ଅଧୀକ୍ଷଣ ଯନ୍ତ୍ରୀ ପୀତବାସ ସେଠୀ, ସରୋଜ ସାହୁ, ସହକାରୀ ନିର୍ବାହୀ ଯନ୍ତ୍ରୀ, ସହକାରୀ ଯନ୍ତ୍ରୀ, କନିଷ୍ଠ ଯନ୍ତ୍ରୀ ଉପସ୍ଥିତ ଥିଲେ। ସହକରୀ ଯନ୍ତ୍ରୀ ଅରୁଣ କୁମାର ଗିରି, ଧନ୍ୟବାଦ ଦେଇଥିଲେ।
