ରାୟଗଡ଼ା ଅଫିସ,୧୭ା୯: ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ଆର୍ଡବ୍ଲ୍ୟୁଏସ୍ଏସ୍ ବିଭାଗ ପକ୍ଷରୁ ୧୧ ପଞ୍ଚାୟତରେ ଶୁକ୍ରବାର ବିଦ୍ୟୁତ୍ ସେବା ବିଚ୍ଛିନ୍ନ କରାଯାଇଛି l ପଞ୍ଚାୟତ ପକ୍ଷରୁ ବିଦ୍ୟୁତ୍ ବିଲ୍ ପୈଠ ହୋଇ ନ ଥିବାରୁ ବିଭାଗ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି। ଅନ୍ୟପକ୍ଷରେ ବିଦ୍ୟୁତ୍ ସେବା ବନ୍ଦ ହୋଇଥିବାରୁ ୧୧ ପଞ୍ଚାୟତର ଲୋକେ ଶନିବାର ଠାରୁ ପାନୀୟ ଜଳ ମଧ୍ୟ ପାଇବେ ନାହିଁ।
ସୂଚନାଯୋଗ୍ୟ, ବ୍ଲକର ୧୪ ପଞ୍ଚାୟତ ମଧ୍ୟରୁ ୧୧ଟିରେ ଆର୍ଡବ୍ଲ୍ୟଏସ୍ଏସ୍ ବିଶୁଦ୍ଧ ପାନୀୟ ଜଳ ଯୋଗାଇ ଆସୁଛି। ଏହି ବାବଦକୁ ଆସୁଥିବା ବିଦ୍ୟୁତ୍ ବିଲ୍ ପଞ୍ଚାୟତ ପକ୍ଷରୁ ଜମା କରିବା ଆବଶ୍ୟକ। ହେଲେ ଉକ୍ତ ୧୧ଟି ପଞ୍ଚାୟତରେ ବିଦ୍ୟୁତ୍ ବିଲ୍ ବାବଦକୁ ୧୪ ଲକ୍ଷ ୭୬ ହଜାର ୫୪୦ଟଙ୍କା ୯୩ ପଇସା ବକେୟା ରହିଛି। କଲ୍ୟାଣସିଂହପୁର ସଦର ଅଞ୍ଚଳର ୬ଟି ସ୍ଥାନ ସମେତ ସୁନାଖଣ୍ଡି, ସିକରପାଇର ୪ଟି ସ୍ଥାନ, ବୁଡ଼ାଗୁଡ଼ା ପଞ୍ଚାୟତରେ ୨ଟି ସ୍ଥାନ, ଧାମୁଣିପଙ୍ଗା ପଞ୍ଚାୟତରେ ୩ ସ୍ଥାନ, ପଲମା ପଞ୍ଚାୟତରେ ଦୁଇଟି ସ୍ଥାନ, କରପା ପଞ୍ଚାୟତରେ ୩ଟି ସ୍ଥାନ, ସେରିଗୁମା ପଞ୍ଚାୟତ, ନାରାୟଣପୁର, ଶିଙ୍ଗାରି ଏବଂ ପୂଜାରୀଗୁଡ଼ା ପଞ୍ଚାୟତରୁ ସମୁଦାୟ ୧୪୭୬୫୪୦.୯୩ ଟଙ୍କା ବିଦ୍ୟୁତ୍ ବିଲ୍ ବକେୟା ରହିଛି। ବିଲ୍ ପୈଠ କଲେ ବିଦ୍ୟୁତ୍ ସେବା ମିଳିବ ବୋଲି କନିଷ୍ଠ ଯନ୍ତ୍ରୀ ବିକ୍ରମ କେଶରୀ ସାହୁ ସୂଚନା ଦେଇଛନ୍ତି। ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶ କ୍ରମେ ଏହି ପଦକ୍ଷେପ ନିଆଯାଇଥିବା ସେ କହିଛନ୍ତି।
