ଓ୍ବିଲିୟମ୍ସବର୍ଗ (ୟୁଏସ୍),୧୮ା୩ (ଏପି): ଜଣେ ରେସ୍ଲର ଛାତ୍ରଙ୍କ ମୃତ୍ୟୁକୁ ନେଇ ଏକ ମାମଲାର ସମାଧାନ କରିବା ଲାଗି ସମ୍ପୃକ୍ତ ୟୁନିଭର୍ସିଟି ୧୪ ନିୟୁତରୁ ଅଧିକ ଆମେରିକୀୟ ଡଲାର ଦେବାକୁ ରାଜି ହୋଇଛି। ମୃତ ରେସ୍ଲର ୨୦ବର୍ଷୀୟ ଜୁନିୟର ଗ୍ରାଣ୍ଟ ବ୍ରେସ୍ ହେଉଛନ୍ତି ଟେନେସିର ଲୋସ୍ଭିଲେର ବାସିନ୍ଦା। କୁମ୍ବରଲାଣ୍ଡ୍ସ ୟୁନିଭର୍ସିଟି ପକ୍ଷରୁ ଆୟୋଜିତ ଏକ ହିଟ୍-ଇଲ୍ନେସ ପ୍ରୋଗ୍ରାମରେ ସେ ସାମିଲ ହୋଇଥିଲେ। ଏହି କାର୍ଯ୍ୟକ୍ରମ ଉତ୍ତାପଜନିତ ଇଞ୍ଜୁରୀ ବିଷୟରେ ସଚେତନତା ସୃଷ୍ଟିି କରିଥାଏ। ୨୦୨୦ ଅଗଷ୍ଟ ୩୧ରେ ବ୍ରେସ୍ ଏହି ପ୍ରୋଗ୍ରାମ୍ରେ ସାମିଲ ଥିବା ବେଳେ ଅଂଶୁଘାତର ଶିକାର ହୋଇଥିଲେ। ସେ ସମୟରେ ସେ ପିଇବା ପାଇଁ ପାଣି ମାଗିଥିଲେ। ମାତ୍ର ତାଙ୍କୁ ମନା କରାଯାଇଥିଲା। ଫଳରେ ସେ ନାର୍କୋଲେପ୍ସିର ଶିକାର ହୋଇଥିଲେ ଏବଂ ତାଙ୍କର ମୃତ୍ୟୁ ଘଟିଥିଲା। କୋର୍ଟରେ ଦାଏର କରାଯାଇଥିବା ମକଦ୍ଦମା ଅନୁସାରେ ୨୦୨୦ ସିଜନ ଟ୍ରେନିଂର ପ୍ରଥମ ଦିବସରେ ଏହି ଘଟଣା ଘଟିଥିଲା। ସେଦିନ ପ୍ରାକ୍ଟିସ ପରେ ପ୍ରଶିକ୍ଷାର୍ଥୀମାନଙ୍କୁ ଏକାଧିକ ଥର ଏକ ଛୋଟ ପାହାଡ଼ର ଉପର ଓ ତଳ ହେବାକୁ ପଡ଼ିଥିଲା। ଏଥିରେ ବ୍ରେସ୍ କ୍ଳାନ୍ତ ହୋଇ ବସିପଡ଼ିଥିଲେ। ସେ ପିଇବା ଲାଗି ପାଣି ମାଗିଥିଲେ ଏବଂ ତାଙ୍କ ସ୍ବାସ୍ଥ୍ୟାବସ୍ଥା କ୍ରମେ ବିଗିଡ଼ିବାରେ ଲାଗିଥିଲା। କିନ୍ତୁ କୋଚ୍ମାନେ ତାଙ୍କୁ ପାଣି ଯୋଗାଇଦେଇ ନ ଥିଲେ କିମ୍ବା ଟ୍ରେନର ଅବା ଡାକ୍ତରଙ୍କ ସହ ଯୋଗାଯୋଗ କରି ନ ଥିଲେ। ବ୍ରେସ୍ ସେହି ସ୍ଥାନ ଛାଡ଼ି ଚାଲିଯାଇଥିଲେ ଏକ ଆଉଟଡୋର ଓ୍ବାଟର ଫାଉଣ୍ଟେନରୁ ପାଣି ପିଇବାକୁ, ମାତ୍ର ତାହା କାର୍ଯ୍ୟକରୁ ନ ଥିଲା। ପରେ ସେ ଏକ ବିଲ୍ଡିଂ ଭିତରେ ପ୍ରବେଶ କରିବାକୁ ଚେଷ୍ଟା କରି ସଫଳ ହୋଇ ନ ଥିଲେ। ସେ ସଂଜ୍ଞାହୀନ ହୋଇ ପଡ଼ିଥିଲେ। ୪୫ ମିନିଟ ପରେ କୋଚ୍ମାନେ ବ୍ରେସ୍ଙ୍କୁ ମୃତ ଅବସ୍ଥାରେ ପାଇଲେ। ତାଙ୍କ ହାତମୁଠାରେ କିଛି ମାଟି ଓ ଘାସ ରହିଥିଲା। ୟୁନିଭର୍ସିଟି କହିଛି ଏହି ମାମଲାକୁ ଡିଫେଣ୍ଡ କରାଯାଇ ପାରିଥାନ୍ତା। କିନ୍ତୁ ଆଇନ ପ୍ରକ୍ରିୟା ଲମ୍ବା ଓ ବ୍ୟୟବହୁଳ ହୋଇଥାନ୍ତା। ତେଣୁ ୟୁନିଭର୍ସିଟି ବ୍ରେସ୍ଙ୍କ ପରିବାରକୁ କ୍ଷତିପୂରଣ ଦେଇ ମାମଲାର ସମାଧାନ କରିବା ଲାଗି ନିଷ୍ପତ୍ତି ନେଇଥିଲା।
