ନବରଙ୍ଗପୁର ,୧୮।୩(ବି.ପ୍ର.): ୨ଦିନିଆ ନବରଙ୍ଗପୁର ଜିଲା ଗସ୍ତରେ ୫-ଟି ସଚିବ ଭି.କେ. ପାଣ୍ଡିଆନ ଆସିଛନ୍ତି। ପାଣ୍ଡିଆନଙ୍କ ସହ ଅନୁସୂଚିତ ଜାତି ଓ ଜନଜାତି ବିଭାଗ ସଚିବ ରୂପା ରୋଷନ ସାହୁ, କ୍ରୀଡ଼ା ସଚିବ ଭିନାଲ କ୍ରିଷ୍ଣା ଗସ୍ତ କରିଛନ୍ତି। ନବରଙ୍ଗପୁର ଓ କୋରାପୁଟ ଜିଲାର ପ୍ରାୟ ୫୦ କଲେଜର ଅଧ୍ୟାପକ ଓ ଛାତ୍ରୀଛାତ୍ରମାନେ ଆସି ସାକ୍ଷାତ କରି କଲେଜର ସମସ୍ୟା ସମ୍ପର୍କରେ ଆଲୋଚନା କରିଥିଲେ। ସମସ୍ୟା ସମାଧାନ ପାଇଁ ସେ ପ୍ରତିଶ୍ରୁତି ଦେଇଥିବା ଛାତ୍ରୀଛାତ୍ର ପ୍ରକାଶ କରିଛନ୍ତି।
ସେହିପରି ଜିଲାର ସବୁ ସ୍ଥାନରୁ ବିଭିନ୍ନ ଧର୍ମ, ଜାତି ଓ ବର୍ଗର ଲୋକ ପ୍ରତିନିଧି ଯାଇ ସେମାନଙ୍କ ଦାବି ସମ୍ପର୍କରେ ସଚିବଙ୍କ ସହ ଆଲୋଚନା କରିଥିଲେ। ଆଲୋଚନା ବେଳେ ଜିଲାପାଳ ଡ. କୋମଳଲୋଚନ ମିଶ୍ର, ଅତିରିକ୍ତ ଜିଲାପାଳ ଭାସ୍କର ରଇତ ଉପସ୍ଥିତ ରହିଥିଲେ। ସନ୍ଧ୍ୟା ପ୍ରାୟ ୫.୩୦ରେ ସଚିବ ନବରଙ୍ଗପୁର ସର୍କିଟ ହାଉସରେ ପହଞ୍ଚତ୍ଥିଲେ। କୋରାପୁଟ ଓ ନବରଙ୍ଗପୁର ଜିଲାର ଶତାଧିକ ସଂଖ୍ୟାରେ ବିଭିନ୍ନ ସଂସ୍ଥାର ହଜାର ହଜାର ସଂଖ୍ୟାରେ ଛାତ୍ରୀଛାତ୍ର, ଅଧ୍ୟାପକ, ବିଭିନ୍ନ ଧର୍ମ, ଜାତି ଓ ବର୍ଗର ଲୋକେ ନିଜ ଦାବି ନେଇ ତାଙ୍କୁ ସାକ୍ଷାତ କରିଥିଲେ। ସେହି ସମୟରେ ସେଠାରେ ରାଜ୍ୟ ବିଜେଡି ସଙ୍ଗଠନ ସମ୍ପାଦକ ପ୍ରଣବ ପ୍ରକାଶ ଦାସ, ପୂର୍ବତନ ମନ୍ତ୍ରୀ ରବି ନନ୍ଦ, ବିଜେଡି ଜିଲା ପର୍ଯ୍ୟବେକ୍ଷକ ଈଶ୍ବର ପାଣିଗ୍ରାହୀଙ୍କ ସମେତ ଜିଲାର ବିଭିନ୍ନ ପ୍ରାନ୍ତରୁ ବରିଷ୍ଠ ବିଜେଡି ନେତା ଉପସ୍ଥିତ ଥିଲେ। ସ୍ଥାନୀୟ ଅଧିଷ୍ଠାତ୍ରୀ ଦେବୀ ମାଁ ଭଣ୍ଡାର ଘରଣୀ ମନ୍ଦିରରେ ଦର୍ଶନ ପରେ ଅନ୍ବେଷା ହଷ୍ଟେଲରେ ଛାତ୍ରୀଛାତ୍ରଙ୍କ ସହ ଭାବବିନିମୟ ସହ ଭୋଜନ କରିବେ ବୋଲି ସୂଚନା ମିଳିଛି।
