ନୂଆଦିଲ୍ଲୀ,୨୨।୩: ଦିଲ୍ଲୀର ତିନୋଟି କର୍ପୋରେସନ (ଏମ୍ସିଡି ୟୁନିଫିକେସନ ବିଲ)କୁ ଏକତ୍ର କରିବା ପାଇଁ ମୋଦି କ୍ୟାବିନେଟ ଏହି ପ୍ରସ୍ତାବକୁ ମଙ୍ଗଳବାର ଅନୁମୋଦନ ପ୍ରଦାନ କରିଛି। ବର୍ତ୍ତମାନ ଏହି ବିଲ୍କୁ ସଂସଦରେ ଏହି ସପ୍ତାହରେ ଅଣାଯାଇପାରେ। ସଂସଦରେ ପାରିତ ହେବା ପରେ ଦିଲ୍ଲୀରେ ୩ଜଣଙ୍କ ବଦଳରେ କେବଳ ଜଣେ ମେୟର ରହିବେ। ଏତଦ୍ ବ୍ୟତୀତ ଉତ୍ତର, ଦକ୍ଷିଣ ଏବଂ ପୂର୍ବ ବଦଳରେ କେବଳ ଗୋଟିଏ କର୍ପୋରେସନ ହିଁ ରହିବ। ସୂଚନାଯୋଗ୍ୟ, ୩ଟି ମ୍ୟୁନିସିପାଲିଟି କର୍ପୋରେସନର କାର୍ଯ୍ୟକାଳ ଶୀଘ୍ର ଶେଷ ହେବାକୁ ଯାଉଛି। କିନ୍ତୁ ୩ଟି ନିଗମର ପ୍ରସ୍ତାବିତ ମିଶ୍ରଣ ହେତୁ ନିର୍ବାଚନ ଆୟୋଗ ନିର୍ବାଚନ ତାରିଖ ଘୋଷଣା କରିବାକୁ ମନା କରିଦେଇଥିଲେ। ସୂଚନା ମୁତାବକ, ଦିଲ୍ଲୀ ମ୍ୟୁନିସିପାଲିଟି କର୍ପୋରେସନର ନିର୍ବାଚନ ମେ ୧୮ ପୂର୍ବରୁ ଅନୁଷ୍ଠିତ ହେବ। କାରଣ ଏହାର ତାରିଖ ଘୋଷଣା କରିବାକୁ ରାଜ୍ୟ ନିର୍ବାଚନ ଆୟୋଗକୁ ଏକ ମାସ ସମୟ ଆବଶ୍ୟକ। ଏଭଳି ପରିସ୍ଥିତିରେ ସଂସଦକୁ କୌଣସି ନିଷ୍ପତ୍ତି ନେବା ପୂର୍ବରୁ ତାରିଖକୁ ଧ୍ୟାନରେ ରଖିବାକୁ ପଡ଼ିବ। ତେଣୁ ଏପ୍ରିଲ ୧୬ ପୂର୍ବରୁ ସଂସଦକୁ ଏକ ନିଷ୍ପତ୍ତି ନେବାକୁ ପଡ଼ିବ ବୋଲି କୁହାଯାଉଛି। ଅନ୍ୟପଟେ ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ନିର୍ବାଚନ ଆୟୋଗ ଏବଂ କେନ୍ଦ୍ର ସରକାରଙ୍କୁ ଦେଶରେ ଗଣତନ୍ତ୍ରକୁ ଦୁର୍ବଳ କରୁଥିବା ଅଭିଯୋଗ କରିଛନ୍ତି। ଏଥିପାଇଁ ରାଜ୍ୟରେ ହେବାକୁ ଥିବା ଏମ୍ସିଡି ନିର୍ବାଚନକୁ ନେଇ ଏଏପି ସୁପ୍ରିମକୋର୍ଟର ଦ୍ୱାରସ୍ଥ ହୋଇଛି। କେନ୍ଦ୍ର ସରକାରଙ୍କ ହସ୍ତକ୍ଷେପ ବିନା ନିର୍ବାଚନକୁ ସ୍ବଚ୍ଛ ଏବଂ ଠିକ୍ ସମୟରେ ପରିଚାଳନା କରିବାକୁ ରାଜ୍ୟ ନିର୍ବାଚନ ଆୟୋଗକୁ ନିର୍ଦ୍ଦେଶ ଦେବାକୁ ଏଏପି ସୁପ୍ରିମକୋର୍ଟଙ୍କୁ ଅନୁରୋଧ କରିଛି।
