କାବୁଲ,୭।୯: ଆଫଗାନିସ୍ତାନରେ ତାଲିବାନ୍ ଏବଂ ନର୍ଦନ ଆଲାଇନ୍ସ ମଧ୍ୟରେ ରକ୍ତାକ୍ତ ଯୁଦ୍ଧ ଚାଲିଛି। ପଞ୍ଜଶିରରେ ଦଖଲ କରିବା ସତ୍ତ୍ୱେ ଯୁଦ୍ଧ ଏପର୍ଯ୍ୟନ୍ତ ଶେଷ ହୋଇନାହିଁ। ଏପରିସ୍ଥଳେ ଏକ ଅଜ୍ଞାତ ବିମାନ ଦ୍ୱାରା ତାଲିବାନ୍ ଶିବିର ଉପରେ ବୋମାମାଡ଼ ହୋଇଛି। ବିମାନ ଦ୍ୱାରା କିଏ ଏହି ଆକ୍ରମଣ କରିଛି ତାହା ଏପର୍ଯ୍ୟନ୍ତ ଜଣା ପଡିନାହିଁ। ନର୍ଦନ ଆଲାଏନ୍ସ କହିଛି ଶେଷ ରକ୍ତ ବିନ୍ଦୁ ଥିଲା ପର୍ଯ୍ୟନ୍ତ ତାଲିବାନ୍ ସହିତ ଯୁଦ୍ଧ ଜାରି ରହିବ।
ପଞ୍ଜଶିରରେ ଗରିଲା ଯୁଦ୍ଧ ଆରମ୍ଭ ହୋଇଥିବା ସ୍ଥାନୀୟ ଗଣମାଧ୍ୟମ ସଂସ୍ଥା ପକ୍ଷରୁ ରିପୋର୍ଟ ପ୍ରକାଶ ପାଇଛି। ପାକିସ୍ତାନ ପରୋକ୍ଷରେ ଯୁଦ୍ଧବିମାନରୁ ବୋମାମାଡ଼ କରି ପଞ୍ଜଶିରରୁ ନର୍ଦନ ଆଲାଇନ୍ସକୁ ହଟାଇବାରେ ସାହାଯ୍ୟ କରୁଛି।
ନର୍ଦନ ଆଲାଏନ୍ସ କହିଛି ଯେ ପାକିସ୍ତାନୀ ଯୁଦ୍ଧବିମାନକୁ ତୋପ ମାଡ଼କରି ଖସାଇ ଦିଆଯାଇଛି। ଇତିମଧ୍ୟରେ ଦେଶରେ ସରକାର ଗଠନ ପାଇଁ ତାଲିବାନ୍ ପକ୍ଷରୁ ଉଦ୍ୟମ ଆରମ୍ଭ ହୋଇଛି। ସରକାର ଗଠନ ୯/୧୧ରେ କରାଯିବ ବୋଲି ଆଲୋଚନା ହେଉଛି। ମାତ୍ର ଏନେଇ କୌଣସି ସଠିକ ସୂଚନା ମିଳି ପାରିନାହିଁି।
