ଦାରିଙ୍ଗବାଡି, ୪।୧୦ (ଅରୁଣ ସାହୁ ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଡୁଲୁରୀ ପାଇନ ବଣ ନିକଟ ବୁଲାଣି ରାସ୍ତାରେ ବାରମ୍ବାର ଦୁର୍ଘଟଣା ଘଟୁଛି। ଉକ୍ତ ବୁଲାଣି ରାସ୍ତାକୁ ଗତ କିଛି ବର୍ଷ ତଳେ ପୂର୍ତ୍ତ ବିଭାଗ ବ୍ଲକ ସ୍ପଟ ଭାବେ ଚି଼ହ୍ନଟ କରି ଡୁଲୁରୀ ନାଳରେ ଏକ ନୂତନ ପୋଲ ନିର୍ମାଣସହ ସିଧାରାସ୍ତା ନିର୍ମାଣ ପାଇଁ ଯୋଜନା ପ୍ରସ୍ତୁତ କରିଥିଲା। ପରବର୍ତ୍ତୀ ସମୟରେ ପୋଲ ନିର୍ମାଣ କାର୍ଯ୍ୟ ମଧ୍ୟ କରାଗଲା ମାତ୍ର ଆଜି ପର୍ଯ୍ୟନ୍ତ ଉକ୍ତ ପୋଲ ରେ ସଂଯୋଗୀକରଣ ରାସ୍ତା ନିର୍ମାଣ କରିବାରେ ବିଳମ୍ବ ଯୋଗୁ ଉକ୍ତ ନୂତନ ରାସ୍ତାରେ ଯାତାୟାତ ହୋଇପାରିନାହିଁ । ପୂର୍ବ ଭଳି ଯାତ୍ରୀମାନେ ସେହି ବୁଲାଣି ରାସ୍ତାରେ ଯାତାୟାତ କରୁଥିବା ବେଳେ ପ୍ରତିବର୍ଷ ଉକ୍ତ ବୁଲାଣି ରାସ୍ତାରେ ବଡ଼ବଡ଼ ଦୁର୍ଘଟଣା ଘଟିବା ସହ ଲୋକଙ୍କ ଅକାଳରେ ଜୀବନ ଚାଲିଯାଉହିବା ଅଭିଯୋଗ ହୋଇଛ। ଶୁକ୍ରବାର ସାରେ ୩ ଜଣ ଉକ୍ତ ବୁଲାଣି ରାସ୍ତାରେ ବାଇକ ଦୁର୍ଘଟଣାରେ ମୃତ୍ୟୁ ବରଣ କରିଛନ୍ତି। ଏହାକୁ ନେଇ ବାଲିଗୁଡା ବିଧାୟକ ଚକ୍ରମଣି କଂହର ଦାରିଙ୍ଗବାଡି ଆସିଥିବା ସମୟରେ ସ୍ଥାନୀୟ ସହକାରୀ ନିର୍ବାହୀ ଯନ୍ତ୍ରୀଙ୍କ ସହ ଆଲୋଚନା କରି ଶୀଘ୍ର ଉକ୍ତ ପୋଲ ନିର୍ମାଣ କରିବାକୁ ନିର୍ଦ୍ଦେଶ ଦେଇଛନ୍ତି । ବିଧାୟକ କହିଛନ୍ତି ସେ, ଏଥର ଜିଲା ମିଟିଂରେ ଉକ୍ତ ପୋଲ ନିର୍ମାଣରେ ବିଳମ୍ବ ଘଟଣାକୁ ଉଠାଇବେ। ଏହା ସହ ଆବଶ୍ୟକ ପଡ଼ିଲେ ବିଧାନସଭାରେ ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ସେ କହିଛନ୍ତି। ପ୍ରକାଶ ଯେ, ଦାରିଙ୍ଗବାଡିଠାରୁ ବ୍ରାହ୍ମଣୀଗାଁ, ଗଜପତି ଜିଲାର ଅଡବା, ମୋହନା ଦେଇ ବ୍ରହ୍ମପୁରକୁ ରାସ୍ତା ସଂଯୋଗ କରୁଛି। ତେବେ ଦାରିଙ୍ଗବାଡିଠାରୁ ଗଜପତି ଜିଲାର ପାଣିଗଣ୍ଡା ପର୍ଯ୍ୟନ୍ତ ପୂର୍ତ୍ତ ବିଭାଗ ଦ୍ୱାରା ରାସ୍ତା ସମ୍ପ୍ରସାରଣ କରାଯାଇଛି। ତେବେ ବିପଦପୂର୍ଣ୍ଣ ଓ ବ୍ଲାକ ଲିଷ୍ଟ ଭାବେ ଚି଼ହ୍ନଟ କରାଯାଇଥିବା ଉକ୍ତ ଡୁଲୁରୀ ବୁଲାଣି ରାସ୍ତାରେ ଚାଲିଥିବା ପୋଲନିର୍ମାଣ କାର୍ଯ୍ୟ ଓ ସଂଯୋଗୀକରଣ ରାସ୍ତା ନିର୍ମାଣ ଇତି ମଧ୍ୟରେ ୩ ବର୍ଷରୁ ଅଧିକା ସମୟ ବିତିଯାଇଥିଲେ ମଧ୍ୟ କାର୍ଯ୍ୟ ସରିବାରେ ନାମ ଧରୁ ନ ଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତ। ଏନେଇ ପୂର୍ତ୍ତ ବିଭାଗର ସହକାରୀ ନିର୍ବାହୀ ଯନ୍ତ୍ରୀ କହିଛନ୍ତି ଯେ, ପୋଲ ନିର୍ମାଣ ସରିଛି। ସଂଯୋଗୀକରଣ ରାସ୍ତା ନିର୍ମାଣ ପାଇଁ ବାଧକ ସାଜିଛି କିଛି ବଡ଼ ବଡ଼ ଗଛ। ଗଛ କାଟିବାକୁ ଜଙ୍ଗଲ ଓ ପରିବେଶ ବିଭାଗ ଅନୁମତି ମିଳିବାରେ ବିଳମ୍ବ ଯୋଗୁ ରାସ୍ତା ଓ ପୋଲ ନିର୍ମାଣର ଶେଷ ପର୍ଯ୍ୟାୟ କାର୍ଯ୍ୟ ସମ୍ପୂର୍ଣ୍ଣ ହୋଇପାରୁ ନ ଥିବା ସେ କହିଛନ୍ତି।
