ନୂଆଦିଲ୍ଲୀ,୨ା୧ : ୨୦୨୨ ନଭେମ୍ବରରେ ଦେଶରେ ବେକାରି ହାର ୮% ଥିବାବେଳେ ଡିସେମ୍ବର ମାସରେ ଏହା ୮.୩୦%କୁ ବୃଦ୍ଧି ପାଇଛି। ବେରୋଜଗାରୀ ବୃଦ୍ଧିରେ ଏହା ଗତ ୧୬ ମାସରେ ସର୍ବାଧିକ ବୋଲି ସେଣ୍ଟର ଫର୍ ମନିଟରିଂ ଇଣ୍ଡିଆନ୍ ଇକୋନୋମି (ସିଏମ୍ଆଇଇ) ତଥ୍ୟରୁ ରବିବାର ସ୍ପଷ୍ଟ ହୋଇଛି। ଭାଜପା ଶାସିତ ହରିୟାଣାରେ ସର୍ବାଧିକ ୩୭.୪% ଥିବାବେଳେ ଓଡ଼ିଶାରେ ଏହା ୦.୯% ରହିଥିବା କେତେକ ଜାତୀୟ ଗଣମାଧ୍ୟମରେ ପ୍ରକାଶ ପାଇଛି।
ମୁମ୍ବାଇରେ ମୁଖ୍ୟାଳୟ ଥିବା ଇକୋନୋମିକ୍ ଥିଙ୍କଟ୍ୟାଙ୍କ ସିଏମ୍ଆଇଇ ଡେଟା ଅନୁସାରେ ଡିସେମ୍ବରରେ ସହରାଞ୍ଚଳରେ ବେରୋଜଗାରୀ ହାର ୧୦.୯% ଥିବାବେଳେ ପୂର୍ବ ମାସରେ ୮.୯୬% ରହିଥିଲା। ଅନ୍ୟପକ୍ଷେ ଗ୍ରାମାଞ୍ଚଳରେ ଏହା ୭.୫୫%ରୁ ୭.୪୪%କୁ ଖସିଥିଲା। ସିଏମ୍ଆଇଇ ପରିଚାଳନା ନିର୍ଦ୍ଦେଶକ ମହେଶ ବ୍ୟାସ କହିଛନ୍ତି, ଦେଶରେ ବଢ଼ୁଥିବା ବେରୋଜଗାରୀ ହାର ବୃଦ୍ଧି ଯେତେ ଚିନ୍ତାଜନକ ମନେହେଉଛି, ସେତିକି ଖରାପ ନୁହେଁ। ଡିସେମ୍ବରରେ ଶ୍ରମ ଯୋଗଦାନ ହାର ୪୦.୪୮%କୁ ବଢ଼ିଛି, ଯାହାକି ଗତ ବର୍ଷକ ମଧ୍ୟରେ ସର୍ବାଧିକ। ଏଥିଯୋଗୁ ବେରୋଜଗାରୀ ଏତେ ଉପରକୁ ଚଢ଼ିଯାଇଛି। ଡିସେମ୍ବରରେ ବେରୋଜଗାରୀ ୩୭.୧% ବଢ଼ିଛି, ଯାହାକି ୨୦୨୨ ଜାନୁୟାରୀ ପରଠାରୁ ସର୍ବାଧିକ ବୋଲି ସେ ସୂଚନା ଦେଇଛନ୍ତି।
ଉଚ୍ଚ ମୁଦ୍ରାସ୍ଫୀତିକୁ ନିୟନ୍ତ୍ରଣରେ ରଖିବା ଓ ନିଯୁକ୍ତି ବଜାରରେ ପ୍ରବେଶ କରୁଥିବା ଅନେକ ନିୟୁତ ଆଶାୟୀଙ୍କୁ ଚାକିରି ଯୋଗାଇଦେବା ୨୦୨୪ ଜାତୀୟ ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରଶାସନ ପାଇଁ ସବୁଠୁ ବଡ଼ ଚ୍ୟାଲେଞ୍ଜ ହୋଇ ରହିଛି। ମୁଖ୍ୟ ବିରୋଧୀ ଦଳ କଂଗ୍ରେସ କନ୍ୟାକୁମାରୀରୁ ଜମ୍ମୁ-କଶ୍ମୀର ପର୍ଯ୍ୟନ୍ତ ‘ଭାରତ ଯୋଡ଼ୋ ଯାତ୍ରା’ ଚଳାଇଛି। ଦରଦାମ୍ ବୃଦ୍ଧି, ବେରୋଜଗାରୀ ଏବଂ ମୋଦିଙ୍କ ଭାଜପାର ବିଭାଜନବାଦୀ ରାଜନୀତି ବିରୋଧରେ ଲୋକଙ୍କୁ ଏକାଠି କରିବା ଏହି ୩,୫୦୦ କି.ମି. ପଦଯାତ୍ରାର ଉଦ୍ଦେଶ୍ୟ ବୋଲି କଂଗ୍ରେସ ପକ୍ଷରୁ କୁହାଯାଇଛି। ଏହାର ନେତୃତ୍ୱ ନେଉଥିବା କଂଗ୍ରେସ ନେତା ରାହୁଲ ଗାନ୍ଧୀ ଶନିବାର ଗଣମାଧ୍ୟମକୁ କହିଥିଲେ, ଭାରତ କେବଳ ମୋଟ ଘରୋଇ ଉତ୍ପାଦ (ଜିଡିପି) ଉପରେ ଫୋକସ୍ ନ କରି ନିଯୁକ୍ତି ଅଭିବୃଦ୍ଧି, ଯୁବପିଢ଼ିଙ୍କ ଦକ୍ଷତା ବୃଦ୍ଧି ଏବଂ ରପ୍ତାନି ଲକ୍ଷ୍ୟରେ ଉତ୍ପାଦନ କ୍ଷମତା ସୃଷ୍ଟି କରିବା ଉଚିତ।
ପ୍ରକାଶ ଯେ, ଜୁଲାଇ-ସେପ୍ଟେମ୍ବର ତ୍ରୈମାସରେ ବେକାରୀ ହାର ୭.୨%କୁ ଖସିଥିଲା, ଯାହାକି ପୂର୍ବ କ୍ୱାର୍ଟରରେ ୭.୬% ରହିଥିଲା। କେନ୍ଦ୍ର ସରକାରଙ୍କ ଦ୍ୱାରା ପରିଚାଳିତ ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ) ପକ୍ଷରୁ ସଂଗୃହୀତ ତଥ୍ୟାନୁସାରେ ନଭେମ୍ବରରେ ଏହି ଡେଟା ଜାରି କରାଯାଇଥିଲା। ଗତ ଡିସେମ୍ବରରେ ହରିୟାଣାରେ ବେରୋଜଗାରୀ ୩୭.୪%କୁ ବୃଦ୍ଧି ପାଇଥିଲା। ରାଜସ୍ଥାନରେ ଏହା ୨୮.୫% ଥିବାବେଳେ ଦିଲ୍ଲୀରେ ୨୦.୮% ରହିଛି। ଓଡ଼ିଶାରେ ସର୍ବନିମ୍ନ ୦.୯% ବେକାରୀ ହାର ରହିଥିବା ସିଏମ୍ଆଇଇ ତଥ୍ୟରୁ ଜଣାପଡ଼ିଛି।
