ନୂଆଦିଲ୍ଲୀ,୧।୪: ଛତିଶଗଡ଼ ସରକାର ଏପ୍ରିଲ ୧ରୁ ରାଜ୍ୟରେ ବେରୋଜଗାରି ଭତ୍ତା ଯୋଜନା ଆରମ୍ଭ କରିବାକୁ ଯାଉଛନ୍ତି। ଏହି ଯୋଜନାରେ ଛତିଶଗଡ଼ର ବେକାର ଯୁବତୀଯୁବକମାନଙ୍କୁ ରାଜ୍ୟ ସରକାର ମାସିକ ୨,୫୦୦ ଟଙ୍କା ଲେଖାଏ ଯୋଗାଇଦେବେ। ଏଥିପାଇଁ ରାଜ୍ୟ ବଜେଟରେ ୨୫୦ କୋଟି ଟଙ୍କା ବ୍ୟୟବରାଦ ଘୋଷଣା କରାଯାଇଛି। ଗତ ୬ ତାରିଖରେ ମୁଖ୍ୟମନ୍ତ୍ରୀ ଭୂପେଶ ବଘେଲ ବିଧାନସଭାରେ ୨୦୨୩-୨୪ ବର୍ଷ ପାଇଁ ୧,୨୧,୫୦୦ କୋଟି ଟଙ୍କାର ବଜେଟ ଉପସ୍ଥାପନ କଲାବେଳେ ରାଜ୍ୟ ବେରୋଜଗାରି ଭତ୍ତା ଘୋଷଣା କରିଥିଲେ। ଅଙ୍ଗନଓ୍ବାଡି କର୍ମୀ, ଗୃହରକ୍ଷୀ, ଗାଁ କଟଓ୍ବାର ଓ ଅନ୍ୟ କର୍ମଚାରୀମାନଙ୍କ ମାସିକ ପାରିତୋଷିକ ବଢ଼ିବ ବୋଲି ମଧ୍ୟ ସେ କହିଥିଲେ। ବେରୋଜଗାରି ଭତ୍ତା ପାଇବାକୁ ହେଲେ ଯୁବତୀଯୁବକ ଛତିଶଗଡ଼ ଜନ୍ମିତ ହୋଇଥିବେ ଏବଂ ସେମାନଙ୍କ ବୟସ ୧୮ରୁ ୩୫ ବର୍ଷ ମଧ୍ୟରେ ହୋଇଥିବ। ସେମାନେ ଦ୍ୱାଦଶ ପାସ୍ କରିଥିବେ ଏବଂ ପରିବାରର ବାର୍ଷିକ ଆୟ ୨.୫ ଲକ୍ଷ ଟଙ୍କାରୁ କମ୍ ହୋଇଥିବ। ଏଥିସହିତ ସେମାନେ ଜିଲା ନିୟୋଜନ କେନ୍ଦ୍ର ଏବଂ ଛତିଶଗଡ଼ର ଆତ୍ମନିଯୁକ୍ତି ମାର୍ଗଦର୍ଶନ କେନ୍ଦ୍ରରେ ପଞ୍ଜୀକୃତ ହୋଇଥିବା ଆବଶ୍ୟକ।
