ପିଲାଟିଏ ସକ୍ଷମ ନ ହେବା ପର୍ଯ୍ୟନ୍ତ ତାର ଖର୍ଚ୍ଚ ମା’ବାପା ଉଠାଇଥାନ୍ତି। ହେଲେ ଯଦି ଉଚ୍ଚଶିକ୍ଷିତ ହେବା ପରେ କେହି ନିଜ ଗୋଡ଼ରେ ଛିଡ଼ା ହେବା ପରିବର୍ତ୍ତେ ମା’ବାପାଙ୍କୁ ସହାୟତା କରିବାକୁ ଜିଦ୍ ଧରି ବସେ, ଏପରିକି ତାଙ୍କ ବିରୋଧରେ ଥାନାରେ ଅଭିଯୋଗ କରେ ତେବେ କଥାଟି ଆଶ୍ଚର୍ଯ୍ୟ କରିବ ନିଶ୍ଚୟ। ତେବେ ଏଭଳି ଏକ ଘଟଣା ଦେଖିବାକୁ ମିଳିଛି ଲଣ୍ଡନରେ। ବ୍ୟକ୍ତିଜଣଙ୍କ ହେଉଛନ୍ତି ଫୈଜ ସିଦ୍ଧକି। ସେ ଅକ୍ସଫୋର୍ଡରୁ ନିଜର ଗ୍ରାଜୁଏଶନ୍ ଶେଷ କରିଛନ୍ତି। ହେଲେ ସେ ବେରୋଜଗାର। ଏବେ ସେ ନିଜର ମା’ବାପାଙ୍କୁ କାଠଗଡ଼ାରେ ଛିଡ଼ା କରାଇବାକୁ ଯାଉଥିବାରୁ ଚର୍ଚ୍ଚାର ପରିସରକୁ ଆସିଛନ୍ତି। ସେ ଦୁବାଇରେ ରହୁଥିବା ନିଜ ମା’ବାପାଙ୍କ ଉପରେ ସମ୍ପୂର୍ଣ୍ଣ ଭାବେ ନିର୍ଭରଶୀଳ। ପିଲାଟିବେଳୁ ସ୍ବାସ୍ଥ୍ୟଗତ ଅସୁବିଧା ଥାଇ ବଡ଼ ହୋଇଥିବାରୁ ଆର୍ଥିକ ସହାୟତା ପାଇବାକୁ ହକ୍ଦାର ବୋଲି ସିଦ୍ଧକି କହିଛନ୍ତି।
ଅକ୍ସଫୋର୍ଡ ବିଶ୍ୱବିଦ୍ୟାଳୟରୁ ସ୍ନାତକ ପରେ ସିଦ୍ଧକୀ ଆଇନ୍ ମଧ୍ୟ ପଢ଼ିଛନ୍ତି। ହେଲେ ୨୦୧୧ରୁ ସେ ବେରୋଜଗାର ଅଛନ୍ତି। ଏବେ ସେ ଲଣ୍ଡନର ହାଇଡ୍ ପାର୍କ ନିକଟରେ ଥିବା ଏକ ଫ୍ଲାଟ୍ରେ ରହୁଛନ୍ତି। ଏହି ଘର ତାଙ୍କ ୬୯ ବର୍ଷୀୟ ମା’ ଏବଂ ୭୧ ବର୍ଷୀୟ ବାପା ଜାଭେଦଙ୍କ ନାମରେ ରହିଛି। ତାଙ୍କ ଚଳିବା ପାଇଁ ତାଙ୍କ ମା’ବାପା ପ୍ରତି ସପ୍ତାହରେ ୪୦୦ ପାଉଣ୍ଡରୁ ଅଧିକ ଟଙ୍କା ଦେଇଆସୁଥିଲେ। ଏଥିସହ ସମସ୍ତ ବିଲ୍ ମଧ୍ୟ ପୈଠ କରୁଥିଲେ। ହେଲେ ଏବେ ସେ ଏପରି କରିବାକୁ ଚାହୁଁନାହାନ୍ତି। ଫଳରେ ସିଦ୍ଧକି ଉଭୟଙ୍କ ବିରୋଧରେ ଅଭିଯୋଗ କରିଛନ୍ତି। ଅଭିଯୋଗ ପାଇବା ପରେ ଏହାକୁ କୋର୍ଟ ଅଫ୍ ଅପିଲ୍କୁ ପଠାଯାଇଛି।
ଗତ ୨୦୧୮ରେ ଏକ ଫାମିଲି କୋର୍ଟରେ ତାଙ୍କର ଏକ ଅଭିଯୋଗକୁ ଖାରଜ କରି ଦିଆଯାଇଥିଲା। ସେ ଅକ୍ସଫୋର୍ଡ ୟୁନିଭର୍ସିଟି ଉପରେ ମକଦ୍ଦମା କରିବାକୁ ଚେଷ୍ଟା କରିଥିଲେ। ଖରାପ ଶିକ୍ଷାଦାନ କରିଥିବାରୁ ୧ ମିଲିୟନ ଜରିମାନା ତାଙ୍କୁ ଦିଆଯାଉ ବୋଲି ସେ ଦାବି କରିଥିଲେ।
