ନୂଆଦିଲ୍ଲୀ: ସାମଗ୍ରୀ ଓ ସେବା ଟିକସ ବ୍ୟବସ୍ଥା(ଜିଏସ୍ଟି)ରେ ମାତ୍ର ୪୫ ହଜାର ପଞ୍ଜୀକୃତ ସଂସ୍ଥା ବାଧ୍ୟତାମୂଳକ ୧% ନଗଦ ଟିକସ ପ୍ରଦାନ କରିବେ। ଏହା ଜାନୁୟାରୀରୁ ଲାଗୁ ହେବ। ଜିଏସ୍ଟି ବ୍ୟବସ୍ଥାରେ ପଞ୍ଜୀକୃତ ହୋଇଥିବା ମୋଟ ବାଣିଜ୍ୟ ସଂସ୍ଥା ମଧ୍ୟରୁ ପ୍ରାୟ ୦.୩୭% ସଂସ୍ଥା ନୂଆ ବ୍ୟବସ୍ଥା ପରିସରରେ ଆସିବେ ବୋଲି ରାଜସ୍ବ ବିଭାଗ ପକ୍ଷରୁ କୁହାଯାଇଛି। ଜାଲ୍ ବିଲ୍ ଦ୍ୱାରା ହେଉଥିବା ଟିକସ ଠକେଇ ଉପରେ ଅଙ୍କୁଶ ଲଗାଇବା ଲାଗି ଏଭଳି ଏକ ବ୍ୟବସ୍ଥା କାର୍ଯ୍ୟକାରୀ କରାଯାଉଥିବା କେନ୍ଦ୍ରୀୟ ପରୋକ୍ଷ ଟିକସ ଏବଂ ସୀମା ଶୁଳ୍କ ବୋର୍ଡ ପକ୍ଷରୁ ସ୍ପଷ୍ଟ କରାଯାଇଛି। ଚଳିତ ସପ୍ତାହ ପ୍ରାରମ୍ଭରେ ଜିଏସ୍ଟି ଆଇନରେ ପରିବର୍ତ୍ତନ କରାଯାଇଛି। ଯେଉଁ ସଂସ୍ଥାଗୁଡିକ ମାସିକ ୫୦ ଲକ୍ଷ ଟଙ୍କାରୁ ଊର୍ଦ୍ଧ୍ୱ କାରବାର କରୁଛନ୍ତି ସେମାନଙ୍କ ଧାର୍ଯ୍ୟ ଜିଏସ୍ଟିର ୧% ନଗଦ ହିସାବରେ ଦେବାକୁ ନୂଆ ନିୟମରେ କୁହାଯାଇଛି।
କୌଣସି ସଂସ୍ଥାର ପରିଚାଳନା ନିର୍ଦ୍ଦେଶକ ବା ପାର୍ଟନର ୧ ଲକ୍ଷ ଟଙ୍କାର ଆୟକର ଦେଉଥିଲେ କିମ୍ବା ଅଣ ବ୍ୟବହୃତ ଇନ୍ପୁଟ ଟାକ୍ସ କ୍ରେଡିଟ୍ ପାଇଁ ପୂର୍ବ ଆର୍ଥତ୍କ ବର୍ଷରେ ପଞ୍ଜୀକୃତ ବ୍ୟକ୍ତିବିଶେଷ ୧ ଲକ୍ଷ ଟଙ୍କାର ରିଫଣ୍ଡ ଲାଭ କରିଥିଲେ କଟକଣା ଲାଗୁ ହେବ ନାହିଁ। ଜିଏସ୍ଟି ଡାଟା ଆନାଲିଟିକ୍ସ ମୁତାବକ, ମୋଟ ୧.୨ କୋଟି ପଞ୍ଜୀକୃତ ଟିକସଦାତାଙ୍କ ମଧ୍ୟରୁ ପ୍ରାୟ ୪ ଲକ୍ଷ ଟିକସଦାତାଙ୍କ ମାସିକ ସପ୍ଲାଇ ଭାଲ୍ୟୁ ୫୦ ଲକ୍ଷ ଟଙ୍କାରୁ ଊର୍ଦ୍ଧ୍ୱ ରହିଛି। ଏହି ୪ ଲକ୍ଷଙ୍କ ମଧ୍ୟରୁ କେବଳ ୪୫ ହଜାର ପ୍ରକୃତ ପକ୍ଷେ ୧% ଜିଏସ୍ଟି ନଗଦ ଆକାରରେ ପ୍ରଦାନ କରିବେ। ସୂଚନାଯୋଗ୍ୟ, ବର୍ତ୍ତମାନ ସୁଦ୍ଧା ଇନ୍ପୁଟ ଟାକ୍ସ କ୍ରେଡିଟ ଠକେଇ ମାମଲାରେ ୧୨ ହଜାର ମାମଲା ଦାୟର ହୋଇଛି। ୩୬୫ ଜଣ ଏଥିରେ ଗିରଫ ହେଲେଣି। ଗତ ଗୋଟିଏ ସପ୍ତାହ ମଧ୍ୟରେ ୧୬୫ ଜଣ ଗିରଫ ହୋଇଥିବା ଜଣାପଡିଛି।
