ଭୁବନେଶ୍ୱର, ୪।୧୦ (ବ୍ୟୁରୋ):ରାଜ୍ୟରେ ‘ମୋ ବସ୍’ ସେବା ପରିଚାଳନା କରୁଥିବା କ୍ୟାପିଟାଲ ରିଜିୟନ୍ ଅର୍ବାନ ଟ୍ରାନ୍ସପୋର୍ଟ(କ୍ରୁଟ୍)ର ମହାପ୍ରବନ୍ଧକ ଦୀପ୍ତି ମହାପାତ୍ରଙ୍କୁ ଜାତିସଂଘର ‘ହାବିଟାଟ୍ ସ୍କ୍ରଲ୍ ଅଫ୍ ଅନର୍ ଆଓ୍ବାର୍ଡ’ ମିଳିଛି। ରବିବାର ତୁର୍କୀର ବାଲିକେସିର୍ଠାରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ବିଶ୍ୱର ଏହି ପ୍ରତିଷ୍ଠିତ ତଥା ମର୍ଯ୍ୟାଦାଜନକ ପୁରସ୍କାର ପ୍ରଦାନ କରାଯାଇଛି। ବ୍ୟକ୍ତି ବିଶେଷ, ସଂଗଠନ ଏବଂ ସଫଳ ପ୍ରକଳ୍ପ ଦ୍ୱାରା ମାନବ ବସତିର ବିକାଶ ଦିଗରେ ଉଲ୍ଲେଖନୀୟ ଅବଦାନ ପାଇଁ ଜାତିସଂଘ ପକ୍ଷରୁ ଏହି ପୁରସ୍କାର ଦିଆଯାଉଛି। ‘ଆକ୍ଟ ଲୋକାଲ୍ ଟୁ ଗୋ ଗ୍ଲୋବାଲ୍’ ଥିମ୍କୁ ନେଇ ଏପରି କାର୍ଯ୍ୟକ୍ରମ ମାଧ୍ୟମରେ ଆନ୍ତର୍ଜାତିକ ସ୍ତରରେ ସହରୀ ସଭ୍ୟତାକୁ ବିକଶିତ କରିବା ପାଇଁ ବ୍ୟକ୍ତିବିଶେଷ ଓ ସଂଗଠନଗୁଡ଼ିକୁ ଉତ୍ସାହିତ କରାଯାଉଛି। ସହରାଞ୍ଚଳ ପରିବହନ କ୍ଷେତ୍ରରେ କ୍ରୁଟ୍ ସକାରାମତ୍କ ପରିବର୍ତ୍ତନ ଓ ଉଲ୍ଲେଖନୀୟ ଅବଦାନ ପାଇଁ କାର୍ଯ୍ୟ କରିବା ସହିତ ଲଗାତାର ପ୍ରୟାସ ଜାରି ରଖିଛି। ଜନ ପରିବହନ କ୍ଷେତ୍ରରେ ମହାପ୍ରବନ୍ଧକଙ୍କ ପଦକ୍ଷେପ, କାର୍ଯ୍ୟନିଷ୍ଠା ଏବଂ ଅଭିନବ ନେତୃତ୍ୱ ଦ୍ୱାରା କ୍ରୁଟ୍ର ପରିବହନ ସେବାକୁ ଏକ ଅନ୍ତର୍ଭୁକ୍ତୀକରଣ, ସୁଗମ, ନିରାପଦ ଗମନାଗମନ ବ୍ୟବସ୍ଥାରେ ପରିଣତ କରାଯାଇଛି। ବିଶେଷକରି ଏଥିରେ ମହିଳାଙ୍କୁ ଦିଆଯାଉଥିବା ସୁଯୋଗ ଦିଆଯାଇଛି। ଏହି ଅବସରରେ ଦୀପ୍ତି କହିଛନ୍ତି, ରାଜ୍ୟର ଜନ ପରିବହନ ବ୍ୟବସ୍ଥାରେ ସାଧାରଣରୁ ଅତି ସାଧାରଣ ଯାତ୍ରୀଙ୍କ ଅନ୍ତର୍ଭୁକ୍ତ ଏବଂ ବୃତ୍ତିଗତ କାର୍ଯ୍ୟକ୍ଷେତ୍ରରେ ଲିଙ୍ଗଗତ ପାର୍ଥକ୍ୟତାରେ ପରିବର୍ତ୍ତନ ଆଣିବାରେ ସଫଳ ହୋଇପାରିଛୁ। ଏଭଳି ସମ୍ମାନ ସମାଜ ପାଇଁ ଭଲ କାମ ସହ ସେବାରେ ନୂତନ ପଦକ୍ଷେପ କାର୍ଯ୍ୟକାରୀ କରିବାକୁ ପ୍ରେରଣା ଯୋଗାଇଥାଏ। ଆଗାମୀ ଦିନରେ ସ୍ଥାୟୀ ବିକାଶ ଲକ୍ଷ୍ୟ ପ୍ରାପ୍ତି ପାଇଁ କାର୍ଯ୍ୟ କରାଯାଉଛି ବୋଲି ସେ ମତ ଦେଇଛନ୍ତି।
