ସିଡ୍ନୀ/ବେଜିଂ,୨୩।୧୦: ଉଇଗର ମୁସଲମାନଙ୍କ ଦମନ ଜିନଜିଆନ ପ୍ରଦେଶରେ ଏକ ସୁଚିନ୍ତିତ ଯୋଜନା ମାଧ୍ୟମରେ ରାଷ୍ଟ୍ରପତି ଶି ଜିନ୍ ପିଙ୍ଗଙ୍କ ସରକାରଙ୍କ ପକ୍ଷରୁ ଜାରି ରହିଛି। ଚାଇନାରେ ଉଇଗର ମୁସଲମାନଙ୍କ ନରସଂହାର ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଥିଲାବେଳେ ପାକିସ୍ତାନ ପକ୍ଷରୁ ସମ୍ପୂର୍ଣ୍ଣ ନୀରବତା ଅବଲମ୍ବନ କରାଯାଉଛି। ସମ୍ପ୍ରତି ପାଶ୍ଚାତ୍ୟ ରାଷ୍ଟ୍ରଙ୍କ ସହିତ ବର୍ତ୍ତମାନ ଅଷ୍ଟ୍ରେଲୀୟ ନୀତି ପ୍ରତିଷ୍ଠାନର ରିପୋର୍ଟ ମଧ୍ୟ ବେଜିଂ ପ୍ରଶାସନ ଉପରେ ଅଙ୍ଗୁଳି ନିର୍ଦ୍ଦେଶ କରିଛି। ଏହି ରିପୋର୍ଟରେ କୁହାଯାଇଛି ଯେ କେବଳ ଉଇଗର ନୁହେଁ, ଚାଇନାର କମ୍ୟୁନିଷ୍ଟ ସରକାର ସାଧାରଣ ଲୋକଙ୍କ ଉପରେ କଡ଼ା ଆଭିମୁଖ୍ୟ ଗ୍ରହଣ କରୁଛନ୍ତି।
ଯେ କୌଣସି ବିଦ୍ରୋହକୁ ଦମନ କରିବା ପାଇଁ, ଅମାନବୀୟ ପ୍ରଣାଳୀ ସରକାର ଗ୍ରହଣ କରିଛନ୍ତି। ଏହି ରିପୋର୍ଟ ଜିନଜିଆନରେ ଚାଇନା ସରକାରଙ୍କ ପକ୍ଷରୁ ଜାରି ରହିଥିବା ଏକଛତ୍ରବାଦୀ ଶାସନକୁ ନିନ୍ଦା କରାଯାଇଛି। ଏହି ରିପୋର୍ଟକୁ ‘ଦ ଆର୍କି;ଟକଚର ଅଫ୍ ରିପ୍ରେଶନ: ଅନ୍ପ୍ୟାକିଂ ଜିନଜିଆନ ଗଭର୍ନାନ୍ସ’ ଭାବେ ନାମିତ କରାଯାଇଛି। ଏହି ରିପୋର୍ଟ ଦର୍ଶାଯାଇଛି ଯେ, ୨୦୧୪ ପରଠାରୁ ଜିନଜିଆଙ୍ଗରେ ଉଇଗର ଏବଂ ତୁର୍କୀ ସଂଖ୍ୟାଲଘୁମାନଙ୍କର ମାନବିକ ଅଧିକାର ଏକ ନିର୍ଦ୍ଦିଷ୍ଟ ରଣନୀତି ଅନୁଯାୟୀ ଦମନ କରାଯାଉଛି।
ବେଜିଂ ପ୍ରଶାସନ ଉଇଗରଙ୍କ ବିରୋଧରେ ଯୁଦ୍ଧ ଆରମ୍ଭ କରିଥିବା ଏଥିରେ ଉଲ୍ଲେଖ କରାଯାଇଛି। ସୂଚନାନୁସାରେ, ଏହି ୮୦ ପୃଷ୍ଠାର ରିପୋର୍ଟରେ ମାନବିକ ଅଧିକାରର ଉଲ୍ଲଂଘନ ପ୍ରସଙ୍ଗରେ ଚାଇନାର ପ୍ରକୃତ ଚେହେରା ଅନ୍ତର୍ଜାତୀୟସ୍ତରରେ ପର୍ଦ୍ଦାଫାଶ୍ ହୋଇଛି। ଏହି ରିପୋର୍ଟରେ ଦର୍ଶାଯାଇଛି ଯେ ଜିନଜିଆଙ୍ଗରେ କମ୍ୟୁନିଷ୍ଟ ପାର୍ଟି ଶାସିତ ରାଜ୍ୟ କିପରି ଉଇଗରଙ୍କ ବିରୁଦ୍ଧରେ ନରସଂହାର ଯୁଦ୍ଧ ଜାରି ରଖିଛି।
ଏହି ଅନୁସନ୍ଧାନକୁ ବ୍ରିଟେନର ବୈଦେଶିକ, କମନୱେଲଥ ଏବଂ ଡେଭଲପମେଣ୍ଟ ଅଫିସ ପକ୍ଷରୁ ଆର୍ଥିକ ସହାୟତା ପ୍ରଦାନ କରାଯାଇଛି। ଏହି ଅନୁସନ୍ଧାନରେ ଉଇଗରଙ୍କ ଜୀବନ ଉପରେ ନିୟନ୍ତ୍ରଣ ହାସଲ କରିବା ପାଇଁ ଟ୍ରିନିଟି ମେକାନିଜିମର ବ୍ୟବହାର ବିଷୟରେ ଆଲୋଚନା କରାଯାଇଛି। ୨୦୧୪ରେ, ଆତଙ୍କବାଦ ବିରୋଧୀ କାର୍ଯ୍ୟ ରୋକିବା ପାଇଁ ଜିନଜିଆଙ୍ଗର କିଛି ଅଞ୍ଚଳରେ ଏହାର ବ୍ୟବହାର କରାଯାଇଥିଲା। କିନ୍ତୁ ବର୍ତ୍ତମାନ ଏହା ଏହି ଅଞ୍ଚଳର ପ୍ରାୟ ସବୁ ସ୍ଥାନରେ ଜାରି ରହିଛି। ଟ୍ରିନିଟି ମେକାନିଜିମର ପ୍ରଣାଳୀ ଅନ୍ତର୍ଗତ ଗ୍ରାମ କମିଟି ଅଧିକାରୀ, ପୋଲିସ ଅଧିକାରୀ, କେନ୍ଦ୍ରୀୟ ଅଧିକାରୀଙ୍କ ଏକ ଟିମ ମିଳିତ ଭାବେ କାର୍ଯ୍ୟ କରୁଛନ୍ତି। ସେମାନେ ପ୍ରତ୍ୟେକ ବ୍ୟକ୍ତିଙ୍କ ଉପରେ ନଜର ରଖିଥାନ୍ତି।
ଉଇଗର ମୁସଲମାନଙ୍କ ଦମନରେ ଚାଇନାର ପଦକ୍ଷେପ ଉପରେ ପାକିସ୍ତାନ ନୀରବ ରହିଛି। ଗତ ସପ୍ତାହରେ ଉଇଗର ମୁସଲମାନଙ୍କ ମାନବାଧିକାର ଉଲ୍ଲଂଘନ ଅଭିଯୋଗ ସମ୍ପର୍କରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ କହିଥିଲେ ଯେ, ମାନବିକ ଅଧିକାର ଉପରେ ଏଭଳି ପ୍ରହାର ଅନୈତିକ। ସେ କହିଥିଲେ ପାକିସ୍ତାନ ଉଇଗର ପ୍ରସଙ୍ଗରେ ଚାଇନା ସହିତ କଥା ହୋଇଛି ଏବଂ ଏହାର ଉତ୍ତର ମଧ୍ୟ ପାଇଛି। ତେବେ ଇମ୍ରାନ୍ଙ୍କ ନୀବରତା ନେଇ ଅନ୍ତର୍ଜାତୀୟସ୍ତରରେ ଏବେ ଚର୍ଚ୍ଚା ଆରମ୍ଭ ହୋଇଛି।
