ମୁମ୍ବାଇ,୨୨।୧ : ଶିବସେନାରେ ବିଦ୍ରୋହ ଯୋଗୁ ମୁଖ୍ୟମନ୍ତ୍ରୀ ପଦ ହରାଇଥିବା ଶିବସେନା ଉଦ୍ଧବ ବାଲାସାହେବ ଠାକରେର ନେତା ଉଦ୍ଧବ ଠାକରେଙ୍କର ଦଳୀୟ ଅଧ୍ୟକ୍ଷ ପଦବୀ ଏବେ ସଙ୍କଟରେ ପଡ଼ିଛି। ସେ ଦଳର ମୁଖ୍ୟ ହେବା ନେଇ ଆଶଙ୍କା ସୃଷ୍ଟି ହୋଇଛି। ତାଙ୍କର ଅଧ୍ୟକ୍ଷ କାର୍ଯ୍ୟକାଳ ଜାନୁଆରୀ ୨୩ ରେ ଶେଷ ହେବାକୁ ଯାଉଛି।
ଶିବସେନାକୁ ନିୟନ୍ତ୍ରଣ କରିବା ପାଇଁ ଉଦ୍ଧବ ଏବଂ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଦଳ ମଧ୍ୟରେ ଏକ ଯୁଦ୍ଧ ଚାଲିଛି। ଉଭୟ ଦଳ ପ୍ରକୃତ ଶିବସେନା ବୋଲି ଦାବି କରୁଛନ୍ତି। ଶୁକ୍ରବାର ନିର୍ବାଚନ ଆୟୋଗରେ ହୋଇଥିବା ଶୁଣାଣି ସମୟରେ ଉଦ୍ଧବ ଦଳର ପରାମର୍ଶଦାତା ପାର୍ଟିରେ ଆଭ୍ୟନ୍ତରୀଣ ନିର୍ବାଚନ କରିବାକୁ କିମ୍ବା ସ୍ଥିତି ବଜାୟ ରଖିବାକୁ ଅନୁରୋଧ କରିଥିଲେ ମଧ୍ୟ ଆୟୋଗ ଏହା ଉପରେ ନୀରବ ରହିଛନ୍ତି।
ଜାନୁଆରୀ ୩୦ ସୁଦ୍ଧା ଲିଖିତ ଯୁକ୍ତି ଉପସ୍ଥାପନ କରିବାକୁ ଆୟୋଗ ଉଭୟ ଗୋଷ୍ଠୀଙ୍କୁ କହିଛନ୍ତି। ବାଲ ଠାକରେଙ୍କ ମୃତ୍ୟୁ ପରେ ଉଦ୍ଧବ ୨୦୧୩ରେ ଏବଂ ପରେ ୨୦୧୮ ରେ ଶିବସେନା ମୁଖ୍ୟ ହୋଇଥିଲେ। ବାଲ ଠାକରେଙ୍କ ପରେ ଦଳର କୌଣସି ମୁଖ୍ୟ ନାହାଁନ୍ତି ବୋଲି ନିର୍ବାଚନ ଆୟୋଗରେ ଶିନ୍ଦେଙ୍କ ଦଳ ଯୁକ୍ତି ବାଢ଼ିଛନ୍ତି।
