ପାରାଦୀପ,୧୯ା୧୦(ଶରତ ରାଉତ)ପାରାଦୀପର ପ୍ରବେଶପଥ ଦୋଛକି ପାଖରେ ରହିଛି ଉଦୟବିହାର କଲୋନି। ୫୩ ନଂ. ଜାତୀୟ ରାଜପଥ ପାଖରେ ଏହି କଲୋନି ୨୦ବର୍ଷ ହେଲା ହେଲାଣି। ଭୌଗୋଳିକ ଅବସ୍ଥିତି ପାରାଦୀପ ପୌରପାଳିକା ମଧ୍ୟରେ ରହିଛି। କିନ୍ତୁ ସରକାରୀ ନଥିପତ୍ରରେ ତାହା ନୂଆଗଡ ପଞ୍ଚାୟତ ଅଧୀନରେ ଯାଉଛି। ସେଠାରେ ବସବାସ କରୁଥିବା ପ୍ରାୟ ୨ ହଜାରରୁ ଅଧିକ ଲୋକଙ୍କ ମଧ୍ୟରୁ ଅର୍ଦ୍ଧାଧିକ ପାରାଦୀପ ପୌରପାଳିକା ମଧ୍ୟରେ ଭୋଟର ତାଲିକା ମଧ୍ୟରେ ଅଛନ୍ତି। ଆଉ ଅର୍ଦ୍ଧେକ ପଞ୍ଚାୟତ ଭୋଟର ତାଲିକାରେ ରହିଛନ୍ତି। ଉକ୍ତ କଲୋନିରେ ବସବାସ କରୁଥିବା ଲୋକଙ୍କ ମଧ୍ୟରେ ଅଧିକାଂଶ ସ୍ବଚ୍ଛଳ ବର୍ଗରେ ଯାଉଛନ୍ତି। କାରଣ ପାରାଦୀପ ବନ୍ଦର ଚାକିରିରୁ ଅବସର ନେଇଥିବା ଅଧିକାଂଶ ଲୋକ ସେଠାରେ ଜାଗା କିଣି ଘରବାଡି କରି ରହୁଛନ୍ତି। କିନ୍ତୁ ସେଠାକାର ମୌଳିକ ସମସ୍ୟା ରାସ୍ତା, ପାନୀୟଜଳ ଯୋଗାଣ, ସରକାରୀ ଯୋଜନା, ସ୍କୁଲ ଆଦି ବ୍ୟବସ୍ଥା ଏ ପର୍ଯ୍ୟନ୍ତ ହୋଇନାହିଁ। ଯେଉଁଥିପାଇଁ ଉଦୟବିହାର ଉନ୍ନୟନ କମିଟି ୪ ବର୍ଷ ହେଲା ଦ୍ୱେତ ପ୍ରଶାସନ (କୁଜଙ୍ଗ ବ୍ଲକ ଓ ପାରାଦୀପ ପୌରପାଳିକା) ପାଖରେ ଦାବି କରୁଛନ୍ତି। କିନ୍ତୁ ତାଙ୍କର ରାସ୍ତା ନିର୍ମାଣ କାମ ହେଉନାହିଁ। ଏମିତି ଅନେକ ଅଭିଯୋଗ କରିବା ପରେ ଶେଷରେ ୫-ଟି ସଚିବଙ୍କ ଜୁନ୍ ୨୯ରେ ଜଣାଇଥିଲେ। ସଚିବ ମଧ୍ୟ ତତ୍କାଳ ପଦକ୍ଷେପ ନେବା ପାଇଁ ଜଗତ୍ସିଂହପୁର ଜିଲା ପ୍ରଶାସନକୁ ଲେଖିଥିଲେ। ଜିଲା ପ୍ରଶାସନ ପକ୍ଷରୁ ଗତ ୨୩ା୮ା୨୦୨୩ରେ ଅତିରିକ୍ତ ଜିଲାପାଳ ଲଗ୍ନଜିତ ରାଉତଙ୍କୁ ଉଦୟବିହାର କମିଟି ସମ୍ପାଦକ ଶିବ ବିଶ୍ୱାଳ, ନବଘନ ପରିଡା, ଟୁନିଲତା ବଳ, ଧରଣୀଧର ମହାପାତ୍ର, ବୁବୁନା ତାରଣିଆ, କାହ୍ନୁ ମଲ୍ଲିକ ପ୍ରମୁଖ ଲିଖିତ ଭାବେ (ଚିଠି ନଂ. ୬୭୬)ଜଣାଇ ଥିଲେ। ଏହାର ଉତ୍ତରରେ ଉଦୟବିହାର କଲୋନିର ରାସ୍ତା ଓ ଡ୍ରେନ୍ ନିର୍ମାଣ କାର୍ଯ୍ୟ ପୌରପାଳିକା କରି ପାରିବ ନାହିଁ। କାରଣ ଏହା ପୌରପାଳିକା ସୀମା ବହିର୍ଭୁକ୍ତ । ଏପରି ଚିଠି ପାଇବା ପରେ କଲୋନି କମିଟି ବୁଧବାର ଜଗତ୍ସିଂହପୁର ଜିଲାପାଳଙ୍କୁ ଏକ ଦାବିପତ୍ର ଦେଇଛି। ସେଥିରେ ଦର୍ଶାଯାଇଛି, ୨ ବର୍ଷ ହେଲା ଅନେକ ଥର ଆମ ଅଭିଯୋଗ ଦେବାପରେ ମଧ୍ୟ କୌଣସି ସମାଧାନ ହେଉନାହିଁ। ତେଣୁ ଆସନ୍ତା ୧୫ଦିନ ପରେ କୁଜଙ୍ଗ ବିଡିଓଙ୍କ କାର୍ଯ୍ୟାଳୟ ଆଗରେ ଧାରଣା ଦେବେ ବୋଲି ଲିଖିତ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ପାରାଦୀପ ବନ୍ଦର ଓ ଶିଳ୍ପ ସଂସ୍ଥା ବୃଦ୍ଧି ହେବା ପରେ ପୌରପାଳିକା ସୀମା ନିର୍ଦ୍ଧାରଣ ଓ ସମ୍ପ୍ରସାରଣ ପାଇଁ ସରକାରୀ ଭାବେ ୨୦୧୪ରୁ ବିଜ୍ଞପ୍ତି ପ୍ରକାଶ ପାଇଥିଲା। ଏପରିକି ୨୦୧୮ରେ ପୌରପାଳିକା ମଧ୍ୟରେ ଇଫ୍କୋ, ଏଏମ୍ଏନ୍ଏସ୍, ତୈଳ ବିଶୋଧନାଗାର, ଉଦୟବିହାର କଲୋନି, ମୂଷାଡିଆ, ବିଜୟଚାନ୍ଦପୁର,ଚନକଣ, ଉଦୟବଟ ଧାମ ମିଶ୍ରଣ ପାଇଁ ତତ୍କାଳୀନ ଜିଲାପାଳ ଯାମିନୀ ଷଡ଼ଙ୍ଗୀ ଉଦ୍ୟମ କରିଥିଲେ। ସେତେବେଳେ ନୂଆଗଡ ପଞ୍ଚାୟତର କେତେଜଣ ଲୋକ ବିରୋଧ କରି ହାଇକୋର୍ଟରେ ଅଭିଯୋଗ କରିବା ପରେ ତାହା ବନ୍ଦ ରହିଛି। ସେବେଠାରୁ ପୌରପାଳିକା ସମ୍ପ୍ରସାରଣ ପ୍ରସଙ୍ଗ ଆଉ ଆସିନାହିଁ। ରାଜନୈତିକ ହସ୍ତକ୍ଷେପ ମଧ୍ୟ କେତେକାଂଶରେ ରହିଥିବା ଜଣାଯାଏ। ପାରାଦୀପରୁ ଭିତରଗଡ ପର୍ଯ୍ୟନ୍ତ ପୌରପାଳିକା ସୀମା ରହିଛି। ପିପିଏଲ ଛକ ପରେ ଉଦୟବିହାର ତା’ ପରେ ଭିତରଗଡ। କିନ୍ତୁ ଉଦୟବିହାର ନୂଆଗଡ଼ ପଞ୍ଚାୟତ ଅଧୀନରେ ରହିଛି। ସେହିପରି ପାରାଦୀପଗଡ଼ ପଞ୍ଚାୟତ ଅଧୀନର ରହିଛି ଚନକଣ ଗ୍ରାମ। ଯାହା ପାରାଦୀପର ଷଣ୍ଢକୁଦ ବସ୍ତି ପାଖରେ। ସେହି ଚନକଣ ଗଡ଼ ପଞ୍ଚାୟତର ୨୫ ନଂ. ୱାର୍ଡ ରହିଛି। ଚନକଣ ଲୋକେ ସେମାନଙ୍କ ମୌଳିକ ସୁବିଧା ପାଇଁ ପାରାଦୀପ ସହର ଅତିକ୍ରମ କରି ଗଡ ପର୍ଯ୍ୟନ୍ତ ଯାଇଥାନ୍ତି। ଯାହାର ଦୂରତା ପ୍ରାୟ ୨୦ କିମି। ସେହିପରି ବିଜୟଚାନ୍ଦପୁର ବସ୍ତି ଅଠରବାଙ୍କି ଲକପଡା ପାଖରେ। ପାରାଦୀପ ପୌରପାଳିକା ୨ ନଂ. ୱାର୍ଡ ସୀମା ମଧ୍ୟରେ ରହିଛି। କିନ୍ତୁ ସେହି ବସ୍ତି ନୂଆଗଡ ପଞ୍ଚାୟତ ଅଧୀନରେ ରହିଛି। ଏମିତି ଅନେକ ତାରତମ୍ୟ ବସ୍ତି କଲୋନିରେ ରହିଛି। ଯେଉଁଥିପାଇଁ କେତେଜଣ ଲୋକ ମୌଳିକ ସୁବିଧାରୁ ବଞ୍ଚତ୍ତ ହେଉଥିବା ବେଳେ ଆଉ ଅନ୍ୟ ଲୋକ ଦ୍ୱେତ ଶାସନର ଫାଇଦା ନେଉଛନ୍ତି। ଯଥା ରାଶନକାର୍ଡ ୨ ଜାଗାରେ ଦର୍ଶାଇ ସୁବିଧା ନେଉଛନ୍ତି। ଦୁଇ ସ୍ଥାନରେ ଅଲଗା ଅଲଗା ସମୟରେ ଭୋଟ ଦେଉଛନ୍ତି। ଏହାର ସୀମା ନିର୍ଦ୍ଧାରଣ ସମସ୍ୟା ସମାଧାନ ପାଇଁ ଉଦୟବିହାର କଲୋନି ବାସିନ୍ଦା ପ୍ରୟାସ ଜାରି ରଖିଛନ୍ତି। ନୂଆଗଡ ସରପଞ୍ଚ ଦେବେନ୍ଦ୍ର ରାଉତଙ୍କୁ ପଚାରିବାରେ ଉକ୍ତ କଲୋନି ରାସ୍ତା ଓ ଡ୍ରେନ ପାଇଁ ଆମେ ମଧ୍ୟ ଅନେକ ଥର ପ୍ରସ୍ତାବ ଦେଲୁଣି। କିନ୍ତୁ ପଞ୍ଚାୟତ ପାଇଁ ଆସୁଥିବା ବଜେଟ ମଧ୍ୟରେ ତାହା ସମ୍ଭବ ହେଉନାହିଁ ବୋଲି ସେ କହିଛନ୍ତି। ପାରାଦୀପ ପୌରପାଳିକା ଅଧ୍ୟକ୍ଷ ବସନ୍ତ ବିଶ୍ୱାଳଙ୍କୁ ପଚାରିବାରେ ଯେହେତୁ ଆମ ସୀମା ମଧ୍ୟରେ ତାହା ଯାଉନି ସେଠାରେ କିଛି କରି ପାରୁନାହିଁ ବୋଲି ସେ ମଧ୍ୟ କହିଛନ୍ତି।
