ଭୋଗରାଇ,୨୬।୧୧(ଡି.ଏନ୍.ଏ.): ବାଲେଶ୍ୱର ଜିଲା ଭୋଗରାଇ ବ୍ଲକ ସୀମାନ୍ତ ଉଦୟପୁର-ତାଳସାରୀ ବେଳାଭୂମି ଏବେ ନିଶାସେବନକାରୀ ଓ ଦେହଜୀବୀଙ୍କ ଆଡ୍ଡାସ୍ଥଳୀ ପାଲଟିଛି। ପ୍ରତିଦିନ ଏହି ବେଳାଭୂମିକୁ ଆକୃଷ୍ଟ ହୋଇ ହଜାର ହଜାର ପର୍ଯ୍ୟଟକ ଆସୁଥିବା ବେଳେ ଖୁଲମ୍ଖୋଲା ନିଶା କାରବାର ଓ ରୂପଜୀବୀଙ୍କ ଅନୈତିକ କାର୍ଯ୍ୟ ଚାଲିଥିବାରୁ ଅସନ୍ତୋଷ ପ୍ରକାଶ ପାଇଛି।
ବେଳାଭୂମିରେ ସ୍ଥାନୀୟ କେତେଜଣ ବ୍ୟବସାୟୀ ମଦର ଆସର ଜମାଇଛନ୍ତି। ମଦ ବୋତଲ ଓ ପଲିଥିନ୍ରେ ପରିବେଶ ପ୍ରଦୂଷିତ ହେଉଛି। ଭୋଗରାଇ ସୀମାନ୍ତକୁ ଲାଗିଥିବା ପଶ୍ଚିମବଙ୍ଗ ଦୀଘା ବେଳାଭୂମିରେ ମଦ, ମାଦକ ଦ୍ରବ୍ୟ ବିକ୍ରି ଓ ଖାଇବା ଉପରେ ପ୍ରଶାସନ କଡ଼ାକଡି କରିଥିବା ବେଳେ ମଦ ବେପାରୀ ଓ ଆନ୍ତଃରାଜ୍ୟ ରୂପଜୀବୀଙ୍କ ଦଲାଲ ଓଡ଼ିଶାର ଏହି ବେଳାଭୂମିକୁ ସୁରକ୍ଷିତ ମଣି ଅବାଧରେ ତାଙ୍କ ବେପାର ବଢ଼ାଇ ଚାଲିଛନ୍ତି। ତାଳସାରୀ ମେରାଇନ୍ ଥାନା ଉଦୟପୁର ବେଳାଭୂମିରେ ଥିବାବେଳେ ପୋଲିସ ଦୃଷ୍ଟି ଆଢୁଆଳରେ ଚୋରାମଦ କାରବାର ବ୍ୟାପକ ଭାବେ ଚାଲିଥିବା ବାରମ୍ବାର ଅଭିଯୋଗ ହେଉଛି। ଅପରପକ୍ଷରେ ଉଦୟପୁରଠାରୁ ତାଳସାରୀ ୨.୭ କିମି ଦୂର ବେଳାଭୂମିକୁ ବିରଳ ନାଲି କଙ୍କଡ଼ା ସୁରକ୍ଷା ନିମନ୍ତେ ବନବିଭାଗ ସାଇଲେଣ୍ଟ ଜୋନ୍ ଘୋଷଣା କରିଛନ୍ତି। ହେଲେ ଏଠାକୁ ଆସୁଥିବା ପର୍ଯ୍ୟଟକଙ୍କୁ ଖୁସି କରିବା ପାଇଁ ବାଇକ୍ ଆରୋହୀମାନେ ଅବାଧରେ ଗାଡ଼ି ଚାଳନା କରିବାରୁ ନାଲି କଙ୍କଡ଼ା ମୃତ୍ୟୁମୁଖରେ ପଡୁଛନ୍ତି। ଦିନକୁ ଦିନ ଏହି ନାଲି କଙ୍କଡ଼ା ଲୋପ ପାଇବାକୁ ବସିଥିବା ବେଳେ ଏଥିପ୍ରତି ବନବିଭାଗ କିମ୍ବା ପୋଲିସର ନଜର ନାହଁି। ସମୁଦ୍ର ଜଳଜୀବ କ୍ରମେ ଲୋପ ପାଉଥିବାରୁ ପ୍ରକୃତି ପରିବେଶ ଉପରେ ଏହାର ଗଭୀର ପ୍ରଭାବ ପଡୁଥିବା ଜଳଜୀବ ବୈଜ୍ଞାନିକମାନେ ଉଦ୍ବେଗ ପ୍ରକାଶ କରିଛନ୍ତି। ଏଭଳି ସ୍ଥିତିରେ ତାଳସାରୀ ବେଳାଭୂମି ନିକଟସ୍ଥ ଏକ ହୋଟେଲରେ ସ୍ଥାନୀୟ ଲୋକେ ଛେଳି ଚୋରି ଘଟଣାରେ ହୋଟେଲ ପ୍ରବେଶ ଓ ପ୍ରସ୍ଥାନ ଗେଟ୍କୁ ତାଲା ପକାଇ ଦେଇ ପୋଲିସକୁ ଖବର ଦେବା ପରେ ଉକ୍ତ ହୋଟେଲ୍ରୁ ୫ଜଣ ଦେହଜୀବୀ ଓ ୩ଜଣ ବଙ୍ଗୀୟ ଯୁବକଙ୍କୁ ପୋଲିସ ସେଠାରୁ ଉଦ୍ଧାର କରି ଥାନାରେ ଅଟକ ରଖି ପଚରାଉଚରା କରିଛି। ଏହି ହୋଟେଲର ୩ଟି ରୁମ୍ରେ ସ୍ତ୍ରୀ-ସ୍ବାମୀ ବୁକିଂ କରି ରହିଥିବା ବେଳେ ଅନ୍ୟ ଦୁଇ ଯୁବତୀ ସାଙ୍ଗ ବୋଲି ତାଳସାରୀ ମେରାଇନ୍ ଥାନା ପକ୍ଷରୁ ସୂଚନା ମିଳିଛି। ବଙ୍ଗୀୟ ଯୁବତୀଯୁବକଙ୍କୁ ପୋଲିସ ଛାଡ଼ି ଦେଇଥିବା ଅଭିଯୋଗ ହୋଇଥିବା ବେଳେ ଯୁବତୀଯୁବକଙ୍କ ଘର ଠିକଣା ସମ୍ପର୍କରେ ତଦନ୍ତ ଚାଲିଛି ବୋଲି ପୋଲିସ କହିଛି। ଏହି ହୋଟେଲରୁ ହୋଟେଲ ପରିଚାଳକ ସହ ଅନ୍ୟ ୩ ଜଣ ରୂପଜୀବୀ କୌଶଳକ୍ରମେ ଚମ୍ପଟ ମାରିଥିବା ସ୍ଥାନୀୟ ଲୋକେ କହିଛନ୍ତି। ପୋଲିସ କେବଳ ଛେଳି ଚୋରୀ ଓ ଏହାର ମାଂସ ରଖିବା ଘଟଣାରେ ଏକ ମାମଲା (ନଂ. ୨୧/୨୨) ରୁଜୁ କରି ପ୍ରାଥମିକ ତଦନ୍ତ ଜାରି ରଖିଛି।
