ଓ୍ବାଶିଟନ, ୧୫।୧୨: ଆମେରିକାର ପ୍ରତିନିଧିସଭାରେ ଉଇଗର ବାଧ୍ୟତାମୂଳକ ଶ୍ରମ ନିବାରଣ ଆଇନର ଅନ୍ତିମ ସଂସ୍କରଣ ପାରିତ ହୋଇଛି। ଏହି ବିଲରେ ଚାଇନାର ଜିନଜିଆଙ୍ଗ ପ୍ରଦେଶରେ ଉଇଗର ସ୍ବୟଂଶାସିତ ଅଞ୍ଚଳରେ ବାଧ୍ୟତାମୂଳକ ଶ୍ରମ ଦ୍ୱାରା ନିର୍ମିତ ସାମଗ୍ରୀ ଆମଦାନୀ ଉପରେ ପ୍ରତିବନ୍ଧକ ଲଗାଇବାକୁ ପ୍ରାବଧାନ ରହିଛି। ପ୍ରତିନିଧିସଭାରେ ମଙ୍ଗଳବାର ରାତିରେ ଭଏସ ଭୋଟରେ ଏହି ବିଲ ପାରିତ ହୋଇଛି।
ବର୍ତ୍ତମାନ ଏହି ବିଲକୁ ଆଲୋଚନା ପାଇଁ ସିନେଟକୁ ପଠାଯିବ । ପ୍ରତିନିଧିସଭାରେ ଗତ ସପ୍ତାହରେ ଏହି ବିଲ୍ ୪୨୮-୧ରେ ବିଲ ପାରିତ ହୋଇଥିଲା ଏବଂ ସିନେଟରେ ଗତ ଜୁଲାଇରେ ଭଏସ ଭୋଟରେ ଏହାକୁ ପାରିତ କରାଯାଇଥିଲା। ଚଳିତ ସପ୍ତାହରେ ଉଭୟ ଗୃହ ବିଲର ଅନ୍ତିମ ସଂସ୍କରଣରେ ସହମତି ପ୍ରକାଶ କରିଥିଲେ।
ଉଇଗର, କାଜାକୀ, ର୍କିଗିଜ, ତିବ୍ଦତୀୟ କିମ୍ବା ଚାଇନାର ଅନ୍ୟ ନିର୍ଯାତିତ ଗୋଷ୍ଠୀର ସଦସ୍ୟଙ୍କ ଦ୍ୱାରା ପ୍ରସ୍ତୁତ ହୋଇଥିବା ଜିନଜିଆନର ଉଇଗର ସ୍ବୟଂଶାସିତ ଅଞ୍ଚଳରୁ ଏସବୁ ସାମଗ୍ରୀର ଆମଦାନୀ ତଥା ବାଣିଜ୍ୟକୁ ନିଷେଧ କରାଯାଇଛି। ଆମେରିକାର ରାଷ୍ଟ୍ରପତିଙ୍କୁ ଏହି ପ୍ରତିବନ୍ଧକ ଲାଗୁ କରାଇବାକୁ ଅନୁରୋଧ କରାଯାଇଛି। ଉଇଗର ସମ୍ପ୍ରଦାୟଙ୍କୁ ନିର୍ଯାତନା ଦେବା ଏବଂ ଅନିଚ୍ଛାକୃତ ଶ୍ରମର ବ୍ୟବହାର ପାଇଁ ଦାୟୀ ଅଧିକାରୀଙ୍କ ଉପରେ ପ୍ରତିବନ୍ଧ ଲଗାଇବା ନେଇ ମଧ୍ୟ କୁହାଯାଇଛି।
ଚାଇନାରେ ଉଇଗୁରୁ ମୁସଲମାନମାନଙ୍କ ପ୍ରତି ହେଉଥିବା ଅତ୍ୟାଚାରକୁ ରୋକିବା ପାଇଁ ଆମେରିକା ଏହି ପଦକ୍ଷେପ ନେଇଛି। ଖବରକାଗଜ ବ୍ଲୁମବର୍ଗ ଏହାର ରିପୋର୍ଟରେ ଏହି ସୂଚନା ଦେଇଛି। ଆମେରିକାର ଏହି ପଦକ୍ଷେପ ଯୋଗୁ ଚାଇନାକୁ ଏକ ବଡ ଝଟ୍କା ଲାଗିଛି। ଜିନଜିଆଙ୍ଗରେ, ଉଇଗରମାନଙ୍କୁ କାମ କରିବାକୁ ବାଧ୍ୟ କରାଯାଉଛି। ସେମାନେ ଏହାର ପ୍ରତିବାଦ କଲେ ନିର୍ଯାତନା ଦିଆଯାଉଛି । ଏପରିକି ସେମାନଙ୍କୁ ସର୍ବନିମ୍ନ ମଜୁରୀଠାରୁ କମ ଦରମା ଦିଆଯାଉଛି। ଆମେରିକା ପକ୍ଷରୁ ଲଗାତାର ଏହାର ପ୍ରତିବାଦ କରାଯାଉଛି।
