ଓ୍ବାଶିଂଟନ୍,୧।୮: ଦେଶରେ ମହାମାରୀ କରୋନା ଭାଇରସ୍ ସଂକ୍ରମଣ ଉଦେ୍ବେଗଜନକ ସ୍ଥିତି ହେବା ପରଠାରୁ ଚାଇନା ଉପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜର ଆକ୍ରମଣ ଆଭିମୁଖ୍ୟ ସ୍ପଷ୍ଟ କରିଛନ୍ତି। ଅନେକ ସମୟରେ କରୋନାକୁ ନେଇ ଟ୍ରମ୍ପ ଚାଇନାକୁ ଟାର୍ଗେଟ କରୁଥିବା ପରିଲିକ୍ଷିତ ହୋଇଥାଏ। ଏଥିସହ ସାରା ବିଶ୍ୱରେ କରୋନା ଭାଇରସ୍ ବ୍ୟାପିବା ପାଇଁ ସେ ସିଧାସଳଖ ଚାଇନାକୁ ଦାୟୀ କରିଥାନ୍ତି। ତେବେ କରୋନା ସଂକ୍ରମଣକୁ ନେଇ ଦୁଇ ଦେଶ ଭିତରେ ଚାଲିଥିବା ବାକ୍ ଯୁଦ୍ଧ ମଧ୍ୟରେ ଏବେ ରାଷ୍ଟ୍ରପତି ଟ୍ରମ୍ପ ଏକ ବଡ଼ ନିଷ୍ପତି ନେଇଛନ୍ତି। ବର୍ତ୍ତମାନ ଆମେରିକାରେ ଟିକ୍ଟକ୍ ଉପରେ ପ୍ରତିବନ୍ଧକ ଲଗାଇବାକୁ ସେ ନିଷ୍ପତ୍ତି ନେଇଥିବା ଖବର ସାମ୍ନାକୁ ଆସିଛି। ଶନିବାର ଟ୍ରମ୍ପ କହିଛନ୍ତି, ଏକ କାର୍ଯ୍ୟନିର୍ବାହୀ ଆଦେଶ ସହିତ ୨୪ଘଣ୍ଟା ମଧ୍ୟରେ ଆମେରିକାରେ ଟିକ୍ଟକ୍ ଉପରେ ପ୍ରତିବନ୍ଧକ ଲଗାଯିବ। ସୂଚନାଯୋଗ୍ୟ, ଏହାପୂର୍ବରୁ ଟିକ୍ଟକ୍ ବ୍ୟାନ ନେଇ ଟ୍ରମ୍ପ ନିଷ୍ପତ୍ତି ନେଇଥିଲେ। ଟିକ୍ଟକ୍ ଉପରେ ପଦକ୍ଷେପ ନେବା ପାଇଁ ପ୍ରଶାସନ ପକ୍ଷରୁ ମୂଲ୍ୟାଙ୍କନ କରାଯାଉଛି। ଏକ ଲୋକପ୍ରିୟ ଚାଇନିଜ ଭିଡିଓ ଆପ୍ ବର୍ତ୍ତମାନ ଜାତୀୟ ସୁରକ୍ଷା ଏବଂ ସେନ୍ସରସିପ୍ ପ୍ରସଙ୍ଗର ଉତ୍ସ ପାଲଟିଛି ବୋଲି ଟ୍ରମ୍ପ କହିଛନ୍ତି। ତେଣୁ ଏହାକୁ ନିଷେଧ କରିବା ସହ ଆମେରିକା ପାଖରେ ଅନ୍ୟାନ୍ୟ ବିକଳ୍ପ ମଧ୍ୟ ରହିଛି। ଆମେରିକାରେ ପାଖରେ ଏବେ ୨ଟି ରାସ୍ତା ଅଛି, ଦେଶରେ ଟିକ୍ଟକ୍ ବ୍ୟାନ ଅଥବା ଏହାକୁ ଆମେରିକାର ମାଇକ୍ରୋସଫ୍ଟ କମ୍ପାନୀ କିଣିପାରେ ବୋଲି ଚର୍ଚ୍ଚା ହେଉଛି।
