ବୁଗୁଡ଼ା,୬।୮(ଡି.ଏନ୍.ଏ.): ଗଞ୍ଜାମ ଜିଲା ବୁଗୁଡ଼ା ବନାଞ୍ଚଳ ଅନ୍ତର୍ଗତ ଭଗବାନପୁର-ଶୁଳିଆପଲ୍ଲୀ ରାସ୍ତାରେ ହାତୀ ଆକ୍ରମଣରେ ୨ଜଣ ଯୁବକ ଗୁରୁତର ଆହତ ହୋଇଛନ୍ତି। ସେମାନେ ହେଲେ ବୁଗୁଡ଼ା ଥାନା ଅଧୀନ ଅରଖପୁର ଗ୍ରାମର ସୁଶାନ୍ତ ଦଳେଇ ଓ ମନୋଜ ପ୍ରଧାନ।
ମିଳିଥିବା ସୂଚନା ମୁତାବକ, ସୁଶାନ୍ତ ଓ ମନୋଜ ଶୁଳିଆପଲ୍ଲୀକୁ ଗୁରୁବାର କାମ କରିବାକୁ ଯାଇଥିଲେ। ରାତି ୧୦ଟାରେ ଏକ ବାଇକ୍ ଯୋଗେ ଦୁହେଁ ଗାଁକୁ ଫେରୁଥିଲେ। ସେତିକିବେଳେ ଶୁଳିଆପଲ୍ଲୀ ନିକଟରେ ରାସ୍ତା ଉପରେ ଏକ ହାତୀ ଛିଡ଼ା ହୋଇଥିବା ଦେଖି ଅଟକି ରହିଥିଲେ। ହେଲେ ପଛ ପଟୁ ଅନ୍ୟ ଏକ ହାତୀପଲ ଆସିଥିଲା। ଏଥିରୁ ଏକ ହାତୀ ହଠାତ୍ ବାଇକ୍ ସହ ୨ ଜଣଙ୍କୁ କଚାଡି ଦେଇଥିଲା। ଫଳରେ ସେମାନେ ଗୁରୁତର ଆହତ ହୋଇଥିଲେ। ଖବର ପାଇ ବନାଞ୍ଚଳ ଅଧିକାରୀ ଫକୀର ଚରଣ ବେହେରା ସଦଳବଳ ପହଞ୍ଚି ଆହତ ଦ୍ୱୟଙ୍କୁ ଉଦ୍ଧାର କରି ବୁଗୁଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସୁଶାନ୍ତଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲା। ପ୍ରାଥମିକ ଚିକିତ୍ସା ପାଇଁ ବନ ବିଭାଗ ୫ ହଜାର ଟଙ୍କା ଆର୍ଥିକ ସହାୟତା ଯୋଗାଇ ଦିଆଯାଇଛି।
