କାବୁଲ,୧୮ା୧: ଯୁଦ୍ଧ ପ୍ରଭାବିତ ଆଫଗାନିସ୍ତାନରେ ଆତଙ୍କବାଦୀମାନେ ବର୍ବରତାର ସୀମା ଲଂଘିଛନ୍ତି। ରାଜଧାନୀ କାବୁଲରେ ସେମାନେ ରବିବାର ସୁପ୍ରିମକୋର୍ଟର ୨ ଜଣ ମହିଳା ବିଚାରପତିଙ୍କୁ ଗୁଳିକରି ହତ୍ୟା କରିଛନ୍ତି। ଏହି ଆକ୍ରମଣରେ ମହିଳା ବିଚାରପତିଙ୍କ କାର୍ ଡ୍ରାଇଭରଙ୍କ ସମେତ ଆଉ ଜଣେ କର୍ମଚାରୀ ଆହତ ହୋଇଛନ୍ତି। ତାଲିବାନ ଓ ଆଫଗାନିସ୍ତାନ ମଧ୍ୟରେ ଶାନ୍ତି ଆଲୋଚନା ଚାଲିଥିବାବେଳେ ଏହା ହେଉଛି ଆତଙ୍କବାଦୀଙ୍କ ପକ୍ଷରୁ ସଦ୍ୟତମ ଘାତକ ଆକ୍ରମଣ। ଏହି ହତ୍ୟାକାଣ୍ଡକୁ ନେଇ ସାରା ଦେଶ ସ୍ତବ୍ଧ ହୋଇଯାଇଛି।
କାତାରରେ ତାଲିବାନ୍ ଓ ଆଫଗାନିସ୍ତାନ ମଧ୍ୟରେ ଶାନ୍ତି ଆଲୋଚନା ଚାଲିଥିବା ସତ୍ତ୍ୱେ କାବୁଲରେ ଆତଙ୍କବାଦୀଙ୍କ ସଂହାରଲୀଳା ଜାରି ରହିଛି। ବିଶେଷକରି ହାଇପ୍ରୋଫାଇଲ୍ ବ୍ୟକ୍ତିମାନଙ୍କୁ ଟାର୍ଗେଟ କରି ହତ୍ୟା କରିବାର ଧାରା ବଜାୟ ରହିଥିବାରୁ ରାଜଧାନୀରେ ଆତଙ୍କର ବାତାବରଣ ଖେଳିଯାଇଛି। ଏହି କ୍ରମରେ ୨ ମହିଳା ବିଚାରପତି ରବିବାର ସକାଳେ କୋର୍ଟର ଏକ କାର୍ରେ ଅଫିସକୁ ଯାଉଥିବାବେଳେ ସେମାନଙ୍କ ଉପରେ ଅତର୍କିତ ଆକ୍ରମଣ ହୋଇଥିଲା। ପୋଲିସ ଡିଷ୍ଟ୍ରିକ୍ଟ ୪ର ତିଆମନି ଅଞ୍ଚଳରେ ଅଜ୍ଞାତ ବନ୍ଧୁକଧାରୀମାନେ ଆସି ସେମାନଙ୍କ କାର୍କୁ ଆଖିବୁଜା ଗୁଳିବର୍ଷା କରିଥିଲେ। ଭୟ ଓ ଆତଙ୍କରେ ଯିଏ ଯୁଆଡ଼େ ଧାଇଁବାରେ ଲାଗିଥିଲେ। ଗୁଳିମାଡ଼ରେ ଦୁଇ ମହିଳା ବିଚାରପତି ଟଳିପଡ଼ିଥିବାବେଳେ ତାଙ୍କ ଡ୍ରାଇଭର ଓ ଅନ୍ୟ ଜଣେ କର୍ମଚାରୀ ଗୁରୁତର ହୋଇଥିବା ଜଣାପଡ଼ିଛି।
ସୁପ୍ରିମକୋର୍ଟ ମୁଖପାତ୍ର ଅହମ୍ମଦ ଫହିମ କାଓ୍ବିମ୍ କହିଛନ୍ତି, ଦେଶର ସର୍ବୋଚ୍ଚ ଅଦାଲତରେ ୨୦୦ରୁ ଊର୍ଦ୍ଧ୍ୱ ମହିଳା ବିଚାରପତି କାର୍ଯ୍ୟରତ ଅଛନ୍ତି। ସେମାନଙ୍କ ମଧ୍ୟରୁ ଏହି ଦୁଇ ମହିଳା ବିଚାରପତି ଅନ୍ୟତମ। କିନ୍ତୁ ସେ ଉଭୟଙ୍କ ନାମ ପ୍ରକାଶ କରିନାହାନ୍ତି। ୨୦୧୭ ଫେବୃୟାରୀରେ
ଆତଙ୍କବାଦୀମାନେ ଆଫଗାନିସ୍ତାନ ସୁପ୍ରିମକୋର୍ଟକୁ ଟାର୍ଗେଟ କରିଥିଲେ। ଜଣେ ଆତଙ୍କବାଦୀ ଆମତ୍ଘାତୀ ବିସ୍ଫୋରଣ କରିବାରୁ ଅଦାଲତର ୨୦ କର୍ମଚାରୀ ନିହତ ଓ ୪୧ ଆହତ ହୋଇଥିଲେ। ନିକଟରେ ରାଜଧାନୀ କାବୁଲ ସମେତ ଅନ୍ୟ ସହରଗୁଡ଼ିକରେ ସ୍ପଷ୍ଟ ଦିବାଲୋକରେ ରାଜନେତା, ଖବରଦାତା, ଅଧିକାର କର୍ମୀ, ଡାକ୍ତର ଓ ଆଇନଜୀବୀମାନଙ୍କୁ ହତ୍ୟା କରାଯାଇଛି। ସେହିପରି ଗତ ୧୨ ତାରିଖରେ ଆତଙ୍କବାଦୀମାନେ ୨ ମହିଳା ସେନା ଅଧିକାରୀଙ୍କୁ ହତ୍ୟା କରିଥିଲେ। ଏଥିପାଇଁ ଆଫଗାନ ସରକାର ତାଲିବାନ୍କୁ ଦାୟୀ କରିଥିବାବେଳେ ଆତଙ୍କବାଦୀ ସଙ୍ଗଠନ ଏହାକୁ ଖଣ୍ଡନ କରିଛି। ସଦ୍ୟ ଆକ୍ରମଣ ପାଇଁ ମଧ୍ୟ କୌଣସି ଆତଙ୍କବାଦୀ ସଙ୍ଗଠନ ନିଜକୁ ଦାୟୀ କରିନାହିଁ। ଏଥିରେ ତାଲିବାନ୍ର ସମ୍ପୃକ୍ତି ନାହିଁ ବୋଲି ଏହାର ମୁଖପାତ୍ର ଜାବିହୁଲ୍ଲା ମୁଜାହିଦ କହିଛନ୍ତି। ପ୍ରକାଶ ଯେ, ଆଫଗାନିସ୍ତାନରୁ ଆମେରିକୀୟ ସୈନ୍ୟ ପ୍ରତ୍ୟାହାର ପାଇଁ ପେଣ୍ଟାଗନ ପକ୍ଷରୁ ଶୁକ୍ରବାର ଘୋଷଣା କରାଯାଇଥିଲା। ପେଣ୍ଟାଗନର କହିବା ଅନୁସାରେ, ଆଫଗାନିସ୍ତାନରେ ମାତ୍ର ୨,୫୦୦ ଆମେରିକୀୟ ସୈନ୍ୟ ରହିବେ, ଯାହାକି ଦୁଇ ଦଶନ୍ଧି ମଧ୍ୟରେ ସର୍ବନିମ୍ନ। ଉକ୍ତ ଘୋଷଣାର ମାତ୍ର ୨ ଦିନ ପରେ ଏହି ଆକ୍ରମଣ ହୋଇଛି।
