ଜୁନାଗଡ଼,୧୯।୧: ଛତିଶଗଡ଼ ପୋଲିସ ୨ଜଣ ବାଘ ଛାଲ ବେପାରୀଙ୍କୁ ଧରିବାରେ ସଫଲ ହୋଇଛି। ପୋଲିସ ତାଙ୍କଠାରୁ ୨ଟି ବାଘ ଛାଲ ଜବତ କରିଛି। ଗିରଫ ଅଭିଯୁକ୍ତମାନେ ହେଲେ କଳାହାଣ୍ଡି ଜିଲା ଜୁନାଗଡ଼ ଥାନା ଅନ୍ତର୍ଗତ ଝାରବନ୍ଦ ଗ୍ରାମର ରମେଶ ନାଏକ, ଗୋଳାମୁଣ୍ଡା ଥାନା ଅଧୀନ ନକଟିକାନି ଗ୍ରାମର କେଶବ ମାଝି। ପୋଲିସ ସୂଚନା ମୁତାବକ, ରମେଶ ଏବଂ କେଶବ ଏକ ବାଇକ୍ ଯୋଗେ ବାଘ ଛାଲ ଧରି ଛତିଶଗଡ଼ ରାଜ୍ୟ ଦେଭୋଗ ଥାନା ଧୂପକୋଟ ଗ୍ରାମକୁ ଯାଇଥିଲେ। ପରେ ସେମାନେ ଗ୍ରାମର ଏକ ପୋଖରୀ ନିକଟରେ ଗ୍ରାହକଙ୍କୁ ଅପେକ୍ଷା କରିଥିଲେ। ଏନେଇ ଗରିଆବନ୍ଦ ଏସ୍ପିଙ୍କୁ ସୂଚନା ମିଳିଥିଲା। ଏନେଇ ପୋଲିସର ଏକ ସ୍ବତନ୍ତ୍ର ଟିମ୍ ଘଟଣା ସ୍ଥଳରେ ଚଢାଉ କରି ସେମାନଙ୍କୁ କାବୁ କରିଥିଲା। ପୋଲିସ ଅଧିକାରୀମାନେ ତାଙ୍କଠାରୁ ୨ଟି ବାଘ ଛାଲ ସହ ଏକ ବାଇକ୍(ଓଡି୦୮ଏନ୍୦୮୭୬) ଜବତ କରିଥିଲେ। ଏନେଇ ପୋଲିସ ବନ୍ୟଜନ୍ତୁ ସଂରକ୍ଷଣ ଅଧିନିୟମ ଧାରା ୯, ୨୯, ୩୯, ୫୧ରେ ଏକ ମାମଲା ରୁଜୁ କରି ଗିରଫ ଯୁବକ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଥିବା ଗରିଆବନ୍ଧ ଏସ୍ପି ଭୋଜରାମ ପଟେଲ ସୂଚନା ଦେଇଛନ୍ତି।
