ନାପିଦ୍ୱ,୧୦।୧୧: ଦୁର୍ନୀତି ଅଭିଯୋଗରେ ଜଣେ ବଡ଼ ନେତାଙ୍କୁ ୯୦ ବର୍ଷ ଏବଂ ଅନ୍ୟ ଜଣଙ୍କୁ ୭୫ ବର୍ଷର କାରାଦଣ୍ଡାଦେଶ ନିର୍ଦ୍ଦେଶ ଦିଆଯାଇଛି। ଏଭଳି ଘଟଣା ମ୍ୟାନମାରରେ ଘଟିଛି। କୋର୍ଟ ଦୁର୍ନୀତି ଅଭିଯୋଗରେ ଦୋଷୀ ସାବ୍ୟସ୍ତ ହେବା ପରେ ବହିଷ୍କୃତ ନେତା ଅଙ୍ଗ ସାନ ସୁ କିଙ୍କ ରାଜନୈତିକ ଦଳର ଦୁଇଜଣ ବରିଷ୍ଠ ନେତାଙ୍କୁ ଏଭଳି ଜେଲ ଦଣ୍ଡାଦେଶ ଶୁଣାଇଛନ୍ତି। ଚଳିତ ବର୍ଷ ଫେବୃଆରୀରେ ସୁ କିଙ୍କ ନ୍ୟାଶନାଲ ଲିଗ ଫର ଡେମୋକ୍ରାସି ଦଳ କ୍ଷମତାରୁ ବହିଷ୍କୃତ ହେବା ପରେ ଦେଶରେ ସାମରିକ ଶାସନ ଜାରି ରହିଛି।
ଆଇନଜୀବୀ ଜାଓ ମିନ ହଲିଙ୍ଗ କହିଛନ୍ତି ଯେ କାୟିନ ରାଜ୍ୟର ପୂର୍ବତନ ଯୋଜନା ମନ୍ତ୍ରୀ ଥାନ ନୈଙ୍ଗଙ୍କୁ ୬ଟି ଦୁର୍ନୀତି ଅଭିଯୋଗରେ କୋର୍ଟ ଦୋଷୀ ସାବ୍ୟସ୍ତ କରି ୯୦ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି। ସେହିପରି କାୟିନ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା ସୁ କିଙ୍କ ରାଜନୈତିକ ଦଳର ଜଣେ ବରିଷ୍ଠ ସଦସ୍ୟ ନୈନ ଖିନ ହେତୱେ ମିନ୍ତଙ୍କୁ ପାଞ୍ଚଟି ଅଭିଯୋଗରେ ଦୋଷୀ ସାବ୍ୟସ୍ତ କରାଯାଇଛି। ପ୍ରତି ମାମଲାରେ ତାଙ୍କୁୁ ୧୫-୧୫ ବର୍ଷ ଅର୍ଥାତ୍ ମୋଟ ୭୫ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଛି।
ଦୁର୍ନୀତି ଏବଂ ଅନ୍ୟାନ୍ୟ ଅପରାଧିକ ମାମଲାରେ ସୁ କିଙ୍କ ବିରୋଧରେ ମଧ୍ୟ ବିଚାର କରାଯାଉଛି। ତାଙ୍କ ସମର୍ଥକମାନେ କହିଛନ୍ତି ଯେ ତାଙ୍କୁ ବଦନାମ କରିବା ଏବଂ ସାମରିକ କ୍ଷମତା ଦଖଲକୁ ଆଇନଗତ ଉଚିତ ଥିବା ଦର୍ଶାଇ ଏଭଳି କରାଯାଉଛି। ଏହା ସମ୍ପୂର୍ଣ୍ଣ ମନଗଢ଼ା ଏବଂ ମିଥ୍ୟା ଅଭିଯୋଗ ବୋଲି ସୁ କିଙ୍କ ସମର୍ଥକ କହିଛନ୍ତି।
ଯଦି କୌଣସି ମାମଲାରେ ସୁ କି ଦୋଷୀ ସାବ୍ୟସ୍ତ ହୁଅନ୍ତି ତେବେ ସେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ ନାହିଁ। ଦେଶରେ ସରକାର ଗଠନ ପାଇଁ ୨୦୨୩ ରେ ନିର୍ବାଚନ କରାଯିବ ବୋଲି ସାମରିକ ଶାସକ ପ୍ରତିଶୃତି ଦେଇଛନ୍ତିି।
