ଆଇପିଏଲର ୧୪ ତମ ସିଜିନ ଅନୁଷ୍ଠିତ ହେବାକୁ ଆଉ ଅଳ୍ପ ଦିନ ବାକି ଅଛି। ଏହି ଟୁର୍ନାମେଣ୍ଟ ଆରମ୍ଭ ହେବା ପୂର୍ବରୁ କରୋନା ଆକ୍ରାନ୍ତ ଦିନକୁ ଦିନ ବୃଦ୍ଧି ପାଉଛି। ଏବେ ମୁମ୍ବାଇ ୱାଙ୍ଖେଡେ ଷ୍ଟାଡିୟମର ୩ଜଣ ଗ୍ରାଉଣ୍ଡ ଷ୍ଟାଫ୍ କରୋନା ଆକ୍ରାନ୍ତ ହୋଇଛନ୍ତି। ମୁମ୍ବାଇ କ୍ରିକେଟ ଆସୋସିଏସନ (ଏମସିଏ) ପକ୍ଷରୁ ମଙ୍ଗଳବାର ଏହା ନିଶ୍ଚିତ କରାଯାଇଛି। କିଛି ଦିନ ପୂର୍ବରୁ ୱାଙ୍ଖେଡେ ଷ୍ଟାଡିୟମର ୧୦ ଜଣ ଷ୍ଟାଫ୍ କରୋନା ଆକ୍ରାନ୍ତ ହୋଇଥିଲେ। ଏବେ ଗ୍ରାଉଣ୍ଡ କର୍ମଚାରୀମାନେ କୌଣସି ସ୍ଥାନକୁ ଯାତ୍ରା କରିବେ ନାହିଁ ଏବଂ ଷ୍ଟାଡିୟମରେ ରହିବେ ବୋଲି ଏମସିଏ ପକ୍ଷରୁ କୁହାଯାଇଛି। ୱାଙ୍ଖେଡେ ଷ୍ଟାଡିୟମ ଭିତରେ ଏକ କ୍ଲବ ଘର ଅଛି। ଆଇପିଏଲ ସୁରୁଖୁରୁରେ ଚଳାଇବା ପାଇଁ ଟୁର୍ନାମେଣ୍ଟ ଶେଷ ପର୍ଯ୍ୟନ୍ତ ସମସ୍ତ ଗ୍ରାଉଣ୍ଡଷ୍ଟାଫ ସେଠାରେ ରହିବ। ତିନି ଜଣ କ୍ରିକେଟର ଏପର୍ଯ୍ୟନ୍ତ କରୋନା ଆକ୍ରାନ୍ତ ହୋଇଛନ୍ତି। ଆରସିବିର ଦେବଦତ୍ତ ପାଡିକଲ, ଦିଲ୍ଲୀ କ୍ୟାପିଟାଲ୍ସର ଅକ୍ଷ୍ର ପଟେଲ ଏବଂ କୋଲକାତା ନାଇଟ ରାଇଡର୍ସର ନୀତୀଶ ରାଣା କରୋନା ସଂକ୍ରମିତ ହୋଇଥିଲେ ହେଁ ନୀତୀଶ ସୁସ୍ଥ ହୋଇ ଦଳ ସହ ତାଲିମ ଆରମ୍ଭ କରିଛନ୍ତି। ସୂଚନାଯୋଗ୍ୟ, ଏପ୍ରିଲ ୯ରୁ ଆଇପିଏଲ୍ ଆରମ୍ଭ ହେବାକୁ ଯାଉଛି।
