ଅମରପାଲି,୧୬/୧୨(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଉପାନ୍ତ ବହଳପଦର ପଞ୍ଚାୟତର ସୁରଧାପାଲି ( ହୋତାପାଲି) ଗ୍ରାମରେ ଗତ ସପ୍ତାହରେ ୪ ଦିନ ମଧ୍ୟରେ ଗୋଟିଏ ପରିବାର ର କକା ଓ ପୂତୁରଙ୍କ କିଡନୀ ରୋଗରେ ମୃତ୍ୟୁ ହୋଇଥିଲା। ଏହା ସହିତ ପରିବାରର ଅନ୍ୟଜଣେ ଏବେ ମଧ୍ୟ କିଡନୀ ରୋଗର ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି। ଏହି ପରିବାର ଅତ୍ୟନ୍ତ ଗରିବ ଶ୍ରେଣୀର ହୋଇଥବାରୁ ତାଙ୍କୁ ସରକାରୀ ସହାୟତା ପ୍ରଦାନ କରିବା ପାଇଁ ପରିବାର ଲୋକେ ପ୍ରଶାସନକୁ ଅନୁରୋଧ କରିଛନ୍ତି।
ସୂଚନା ଅନୁସାରେ ବହଳପଦର ପଞ୍ଚାୟତର ହୋତାପାଲି ( ସୁରଧାପାଲି) ଗ୍ରାମରେ ଗତ ସୋମବାର ଦିନ ଅନିଲ ଲାକ୍ରା (୫୦) ଙ୍କ କିଡନୀ ରୋଗରେ ମୃତ୍ୟ ହୋଇଥିଲା। ତାଙ୍କର ଆୟୁଷ୍ମାନ ସ୍ବାସ୍ଥ୍ୟ କାର୍ଡ ନଥିବା ହେତୁ ସେ ମାଗଣା ଚିକିତ୍ସା ହୋଇ ପାରି ନଥିଲେ। ସେ ଜଣେ ଅତ୍ୟନ୍ତ ଗରିବ ବ୍ୟକ୍ତି ହୋଇଥିବାରୁ ଚିକିତ୍ସାରେ ଆର୍ଥିକ ସମସ୍ୟା ଦେଖା ଦେଇଥିଲା। ଫଳରେ ବୀରମହାରାଜପୁର ଉପଖଣ୍ଡ ଚିକିତ୍ସାଳୟରେ କିଡନୀ ରୋଗର ଡାକ୍ତର ନ ଥିବା ଓ କିଡନୀ ରୋଗୀଙ୍କ ଚିକିତ୍ସା ସୁବିଧା ମିଳୁ ନ ଥିବା ସତ୍ତ୍ବେ ସେଠାରେ ଚିକିତ୍ସିତ ହେଉଥିଲେ। ମୃତ ଅନିଲଙ୍କ ୪ ପୁଅ ଓ ୩ ଝିଅ ମଧ୍ୟରୁ ବଡ଼ ଦୁଇ ପୁଅ ଦାଦନ ଯାଇ ପରିବାର ଚଳାଇବା ସହିତ ତାଙ୍କ ବାପାଙ୍କ ଚିକିତ୍ସା ପାଇଁ ଔଷଧ କିଣି ଦେଉଥିଲେ।
ଏହା ସହିତ ଅନିଲଙ୍କ ପୁତୁରା ଅମିତ ଲାକ୍ରା (୩୦) ଙ୍କ ମଧ୍ୟ ଗୁରୁବାର ଦିନ କିଡନୀ ରୋଗରେ ମୃତ୍ୟୁ ହୋଇଥିଲା। ଅମିତ ମଧ୍ୟ ପରିବାର ଚଳିବା ପାଇଁ ଜଣେ ଦାଦନ ଭାବେ ରାଜ୍ୟ ବାହାରେ କାମ କରୁଥିଲେ। ଅମିତଙ୍କ ବାପା ବିର୍ସା ମଧ୍ୟ ଜଣେ କିଡନୀ ରୋଗୀ। ବିର୍ସା ୪ ବର୍ଷ ହେଲା କିଡନୀ ରୋଗର ଆକ୍ରାନ୍ତ ହୋଇଛନ୍ତି। ଆର୍ଥିକ ସମସ୍ୟା ଯୋଗୁଁ ସେ ଆଉ କୌଣସି ଡ଼ାକ୍ତର ଖାନାକୁ ନଯାଇ ବୈଦ୍ୟରାଜଙ୍କ ଠାରୁ ଆୟୁୁର୍ବେଦିକ ଔଷଧ ବ୍ୟବହାର କରୁଛନ୍ତି ।
ପରିବାରରେ ଦୁଇ ଦୁଇ ଜଣଙ୍କ ମୃତ୍ୟୁ ପରେ ଉକ୍ତ ପରିବାର ଏବେ ଅସହାୟ ହୋଇ ପଡିଛନ୍ତି। ମୃତ ଅମିତଙ୍କ ବାପା ତଥା ଅନିଲଙ୍କ ବଡ଼ ଭାଇ ତାଙ୍କ ପରିବାରକୁ ସରକାରୀ ସହାୟତା ପ୍ରଦାନ ପାଇଁ ପ୍ରଶାସନକୁ ଅନୁରୋଧ କରିଛନ୍ତି। ଏହା ସହିତ ତାଙ୍କର ଚିକିତ୍ସା ପାଇଁ ବ୍ୟବସ୍ଥା କରିବାକୁ ଅନୁରୋଧ ଯାଇଛନ୍ତି। ତେବେ ପ୍ରଶାସନ ତୁରନ୍ତ ଏହି ପରିବାର କୁ ସରକାରୀ ସହାୟତା ଯୋଗାଇ ଦେବାକୁ ଦାବି ହେଉଛି।
