ବାଲିଗୁଡ଼ା,୯ା୧୨(ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲା ବାଲିଗୁଡ଼ା ଉପଖଣ୍ଡ ଅନ୍ତର୍ଗତ କୋଟଗଡ଼ ଥାନା ମାଦାଙ୍ଗୀ ଗାଁ ନିକଟରେ ଦୀର୍ଘଦିନ ହେଲା ରହିଆସୁଥିବା ଏକ ଜାଗାକୁ ନେଇ ଦୁଇ ଗୋଷ୍ଠୀ ମୁହାଁମୁହିଁ ହୋଇଛନ୍ତି। ଏ ନେଇ କୋଟଗଡ଼ ଥାନାରେ ଦୁଇଟି ପୃଥକ୍ ମାମଲା ରୁଜୁ ହୋଇଛି।
ଘଟଣାରୁ ପ୍ରକାଶ, କୋଟଗଡ଼ ତହସିଲ ଅନ୍ତର୍ଗତ ମାଦାଙ୍ଗୀ ଗାଁ ନିକଟ ଏକ ଖାଲି ସ୍ଥାନରେ ଦୀର୍ଘ ୮ରୁ ୧୦ ବର୍ଷ ହେବ କିଛି ଅଣଆଦିବାସୀ ଲୋକ ଘର କରି ରହି ଆସୁଛନ୍ତି। ନିଜର ପେଟପାଟଣା ପିଲାଙ୍କ ପାଠ ପଢ଼ିବା ଓ ସ୍ବାସ୍ଥ୍ୟସେବା ସୁବିଧାରେ ପାଇବା ପାଇଁ ସହରଠାରୁ ଅଳ୍ପ ଦୂରରେ ଏଭଳି ଖାଲି ଜାଗା ଦେଖି ବସତି ସ୍ଥାପନ କରିଆସୁଛନ୍ତି। କିନ୍ତୁ ଏବେ କିଛି ଦିନ ହେବ କିଛି ଆଦିବାସୀ ବ୍ୟକ୍ତି ତାଙ୍କ ଜାଗା କହି ତାଙ୍କ ସହ ଝଗଡ଼ା କରିବା ସହ ସେଠାରୁ ଘର ଛାଡ଼ି ଚାଲିଯିବା ପାଇଁ କହିବା ସହ ମୁହାଁମୁହିଁ ହୋଇ ଗଣ୍ଡଗୋଳ କରୁଥିବା ନେଇ ଥାନାର ଦ୍ୱାରସ୍ଥ ହୋଇଛନ୍ତି ପନିନା ନାୟକ ନାମକ ଜଣେ ମହିଳା। ଏତଲାରେ ଦର୍ଶାଇଛନ୍ତି ଡିସେମ୍ବର ୭ ତାରିଖ ଗୁରୁବାର ରାତିରେ ଆଦିବାସୀ ୧୧ ଜଣ ଆସି ଘରେ ପଶି ନାନା ଗାଳିଗୁଲଜ କରିବା ସହ ମହିଳାଙ୍କୁ ମାଡ଼ ମାରିଥିଲେ ଏବଂ ଦୁଇଟି ଘର ଭଙ୍ଗାରୁଜା କରିଦେଇଥିଲେ। ସେହିପରି ଆଦିବାସୀ ପକ୍ଷରୁ ଉକ୍ତ ଜାଗା ଆମ ନାମରେ ରହିଛ। ଏଣୁ ତୁରନ୍ତ ଖାଲି କରିବା ପାଇଁ କହିବା ପରେ ଆମକୁ ଅଣ ଆଦିବାସୀମାନେ ଗଣ୍ଡଗୋଳ କରୁଛନ୍ତି ବୋଲି ଏକ ଲିଖିତ ଏତଲା ଅନିଲ ବଡ଼ମାଝି ଥାନାରେ ଦେବା ସହ ତାଙ୍କ ନାମରେ ଆସିଥିବା ଅଭିଯୋଗ ଭିତ୍ତିହୀନ ବୋଲି କହିଛନ୍ତ। ଅଣଆଦିବାସୀ ଓ ଆଦିବାସୀଙ୍କ ପକ୍ଷରୁ ଥାନାରେ ଦୁଇଟି ଲିଖିତ ଏତଲା ଆଧାରରେ କୋଟଗଡ଼ ଥାନା ଅଧିକାରୀ ପ୍ରଦୀପ କୁମାର ରାଉଳ ଉଭୟ ଗୋଷ୍ଠୀଙ୍କୁ ବୁଝାଶୁଝା କରିବା ସହ କିଛି ନ ତୁଟିବା ରୁ ୧୬୬/୨୩ ଓ ୧୬୭ /୨୩ ଦୁଇଟି ମାମଲା ରୁଜୁ କରିବା ସହ ତଦନ୍ତ ଚାଲୁ ରହିଥିବା କହିଛନ୍ତ। ଆଦିବାସୀ ଓ ଅଣଆଦିବାସୀ ଏହି ଜମିଜମାକୁ ନେଇ ମୁହାଁମୁହିଁ ଘଟଣାକୁ ନେଇ ପୂର୍ବରୁ କୋଟଗଡ଼ ଚର୍ଚ୍ଚାରେ ରହିଥିବାରୁ ପୁଣି ସେହି ଘଟଣାର ପୁନରାବୃତ୍ତି ନ ହୋଇ କିଭଳି ଘଟଣାର ସମାଧାନ ହେବ ସେଥିପାଇଁ ଜିଲା ପ୍ରଶାସନର ମୁଣ୍ଡବ୍ୟଥା ବଢ଼ିଯାଇଛି।
