ଚେନ୍ନାଇ, ୬।୯: ତାମିଲନାଡ଼ୁର ରାଜଧାନୀରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଗୋଟିଏ ବିଲେଇ ଲାଗି ୨ ବର୍ଷର ନୀରିହ ଶିଶୁର ଜୀବନ ଚାଲିଯାଇଛି। ଦୁଇ ବର୍ଷର ଏହି ଶିଶୁଟି ଘରେ ଶୋଇଥିଲା। ଏହି ସମୟରେ ଗୋଟିଏ ବିଲେଇ ଏଭଳି ଏକ ଲମ୍ପ ମାରିଥିଲା ଯେ, ଟେବୁଲ ଉପରେ ଥୁଆ ହୋଇଥିବା ଟିଭି ସିଧା ଶିଶୁର ମୁଣ୍ଡ ଉପରେ ଖସି ପଡ଼ିଥିଲା। ଫଳରେ ଘଟଣାସ୍ଥଳରେ ହିଁ ନୀରିହ ଶିଶୁଟିର ମୃତ୍ୟୁ ହୋଇଥିଲା। ମୃତ ଶିଶୁର ନାମ ନାସିଆ ଫାତିମା ଥିଲା। ପୋଲିସ ସୂଚନା ଅନୁସାରେ ଶିଶୁଟି ଯେଉଁଠି ଶୋଇଥିଲା ତାହାର ନିକଟରେ ଏକ ଟେବୁଲ ଉପରେ ଟିଭି ଥୁଆ ହୋଇଥିଲା। ଏହି ସମୟରେ ବିଲେଇଟି ଡେଇଁ ପଡ଼ିବାରୁ ଟେବୁଲ ଉପରୁ ଟିଭିଟି ଖସି ପଡ଼ିଥିଲା। ପ୍ରଥମେ ଶିଶୁର ବାପା ଓ ମା କିଛି ବୁଝିପାରି ନ ଥିଲେ। ପରେ ଝିଅକୁ ଧରି ହସ୍ପିଟାଲକୁ ଯାଇଥିଲେ ମଧ୍ୟ ଡାକ୍ତର ସେଠାରେ ମୃତ ଘୋଷଣା କରିଥିଲେ। ଏହି ଛୋଟିଆ ଘଟଣା ଝିଅର ଜୀବନ ନେଇଯିବ ଏହାକୁ ସହଜରେ ବାପା ମା’ ଗ୍ରହଣ କରିପାରୁନାହାନ୍ତି।
