ପାରଳାଖେମୁଣ୍ଡି,୧୯ା୬(ଗିରିଧାରୀ ପରିଚ୍ଛା): ଗଜପତି ଜିଲା ଗୋଷାଣି ବ୍ଲକ ଅନ୍ତର୍ଗତ ସାରିଆପଲ୍ଲୀ ଗ୍ରାମରେ ଜମିଜମା ବିବାଦକୁ କେନ୍ଦ୍ରକରି ଗୁରୁବାର ରାତିରେ ଗ୍ରାମର ଗୋଟିଏ ପରିବାରର ବାପପୁଅଙ୍କ ଉପରେ ମରଣାନ୍ତକ ଆକ୍ରମଣ ହୋଇଛି। ଦୀର୍ଘଦିନ ଧରି ଚାଲିଥିବା ଏହି ବିବାଦ ଉଗ୍ରରୂପ ନେଇଛି। ଆକ୍ରମଣରେ ଗୁରୁତର ହୋଇଥିବା ବାପପୁଅ ହେଲେ ବି. ଭାସ୍କର ରାଓ ଏବଂ ତାଙ୍କ ପୁଅ ବି. ବାବୁରାଓ। ଆକ୍ରମଣରେ ଉଭୟ ବାପପୁଅ ଗୁରୁତର ହୋଇଛନ୍ତି। ସେମାନଙ୍କୁ ଆନ୍ଧ୍ର ପ୍ରଦେଶର ଶ୍ରୀକାକୁଲମ୍ସ୍ଥିତ ଏକ ଘରୋଇ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଖବର ପାଇ ଘଟଣାସ୍ଥଳରେ ଗୁରାଣ୍ଡି ପୋଲିସ ପହଞ୍ଚତ୍ ତଦନ୍ତ ପରେ ଶୁକ୍ରବାର ୪ ଜଣଙ୍କୁ ଗିରଫ କରିଛି। ସେମାନେ ହେଲେ ବି. ଖଗେଶ୍ୱର ରାଓ, ବି. ଜ୍ଞାନେଶ୍ୱର ରାଓ, ବି. ତେଜେଶ୍ୱର ରାଓ ଓ ଏନ. ମାଲେଶ୍ୱର ରାଓ।
ପୋଲିସ ସୂଚନା ଅନୁଯାୟୀ, ଗୁରୁବାର ଗ୍ରାମର ବି. ଭାସ୍କର ଏବଂ ବି. ବାବୁରାଓ ନିଜ ଜମିରେ କାମ କରୁଥିବା ସମୟରେ ସେହି ଗ୍ରାମର ଗୋଟିଏ ପରିବାରର ଉପରୋକ୍ତ ୪ଜଣଙ୍କ ସମେତ ବି.ରାଙ୍ଗାରାଓ ଏବଂ ବି. ବାଲାରାଜୁ ସେଠାରେ ପହଞ୍ଚତ୍ ଭାସ୍କର ଓ ବାବୁରାଓଙ୍କୁ ଶାବଳ, କାତି ଓ ଠେଙ୍ଗାରେ ମରଣାନ୍ତକ ଆକ୍ରମଣ କରିଥିଲେ। ଆକ୍ରମଣରେ ଉଭୟ ବାପପୁଅ ଗୁରୁତର ହୋଇଥିଲେ। ପ୍ରଥମେ ସେମାନଙ୍କୁ ଗୁରାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲେ ମଧ୍ୟ ପରେ ପାରଳାଖେମୁଣ୍ଡିସ୍ଥିତ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରୁ ଅବସ୍ଥା ସଙ୍କଟାପନ୍ନ ହେବାରୁ ଶୁକ୍ରବାର ଶ୍ରୀକାକୁଲମକୁ ସ୍ଥାନାନ୍ତର କରାଯାଇଛି। ଘଟଣା ସମୟରେ ବି. ରବି କୁମାରଙ୍କ ସମେତ ଆଉ ଜଣେ ବ୍ୟକ୍ତି ମଧ୍ୟ ଆହତ ହୋଇଥିବା ଜଣାପଡ଼ିଛି। ଉଭୟ ପକ୍ଷ ଗୁରାଣ୍ଡି ଥାନାରେ ଅଭିଯୋଗ କରିଛନ୍ତି। ଏହାକୁ ଭିତ୍ତିକରି ପୋଲିସ ନଂ. ୯୪/୨୬ ଓ ୯୫/୨୬ରେ ଦୁଇଟି ମାମଲା ରୁଜୁ କରି ତ୍ୱରିତ ପଦକ୍ଷେପ ନେଇଛି। ବାବୁରାଓଙ୍କ ଅଭିଯୋଗକୁ ଆଧାରକରି ଆକ୍ରମଣରେ ସମ୍ପୃକ୍ତ ୬ ଜଣଙ୍କ ମଧ୍ୟରୁ ୪ ଜଣଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଛି। ୨ଜଣ ଫେରାର ଥିବା ଏସ୍ଆଇ ଅମ୍ବିକା ବେଣିଆ କହିଛନ୍ତି। ସୂଚନାଯୋଗ୍ୟ, ଉଭୟ ପକ୍ଷ ଗୋଟିଏ ପରିବାରର ସଦସ୍ୟ। ଦୀର୍ଘଦିନ ଧରି ଜମି ଓ ସମ୍ପତ୍ତିକୁ ନେଇ ସେମାନଙ୍କ ମଧ୍ୟରେ ବିବାଦ ଲାଗି ରହିଥିଲା। ଏହି ବିବାଦ ନେଇ ପାରଳାଖେମୁଣ୍ଡି ସିଭିଲ କୋର୍ଟ (ବରିଷ୍ଠ ବିଭାଗ)ରେ ମାମଲା ଚାଲିଥିଲା। ମାସେ ତଳେ ବାବୁରାଓଙ୍କ ସପକ୍ଷରେ ରାୟ ପ୍ରକାଶ ପାଇଛି। ଏହା ପରେ ଏପରି ଘଟଣା ଘଟିଛି।
