ଓ୍ବାଶିଂଟନ,୨୨ା୮: ଡେମୋକ୍ରାଟିକ୍ ପାର୍ଟି ପ୍ରାର୍ଥୀ ଜୋ ବିଡେନ୍ ଓ ଉପରାଷ୍ଟ୍ରପତି ପ୍ରାର୍ଥୀ କାଲିଫର୍ନିଆ ସିନେଟର କମଲା ହାରିସ୍ ନିଜ ନିଜ ପ୍ରାର୍ଥତ୍ତ୍ୱକୁ ଗ୍ରହଣ କରିଛନ୍ତି। ଡେମୋକ୍ରାଟିକ୍ ନ୍ୟାଶନାଲ କନ୍ଭେନଶନ (ଡିଏନ୍ସି)ର ଚତୁର୍ଥ ଦିନରେ ବିଡେନ୍ ତାଙ୍କ ରନିଂ ମେଟ୍ ହାରିସ୍ଙ୍କୁ ‘ଶକ୍ତିଶାଳୀ ସ୍ବର’ ଭାବେ ଅଭିହିତ କରି ପ୍ରଶଂସା କରିଛନ୍ତି। ଏହାସହ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଆମେରିକାକୁ ଅନ୍ଧକାର ମଧ୍ୟରେ ବାନ୍ଧି ଦେଇଥିବା ବିଡେନ ସମାଲୋଚନା କରିଛନ୍ତି।
ଆସନ୍ତା ନଭେମ୍ବର ୩ରେ ହେବାକୁ ଥିବା ଆମେରିକା ରାଷ୍ଟ୍ରପତି ନିର୍ବାଚନ ପାଇଁ ଉଭୟ ଡେମୋକ୍ରାଟିକ୍ ଓ ରିପବ୍ଲିକାନ୍ ପାର୍ଟି ପକ୍ଷରୁ ପ୍ରଚାର ଅଭିଯାନ ଜୋର୍ଦାର କରାଯାଇଛି। ଗୁରୁବାର ରାତିରେ ଏନ୍ଡିସି ଉଦ୍ଯାପନ ଅବସରରେ ୭୭ ବର୍ଷୀୟ ବିଡେନ ଆନୁଷ୍ଠାନିକ ଭାବେ ପ୍ରାର୍ଥିତ୍ୱ ସ୍ବୀକାର କରି ଭାଷଣ ଦେଇଥିଲେ। କହିଥିଲେ, ଆମେରିକାରେ ସମସ୍ତଙ୍କୁ ଦିଆଯାଇଥିବା ପ୍ରତିଶ୍ରୁତିକୁ ପୁନଃ ଅବସ୍ଥାପିତ କରିବା ପରବର୍ତ୍ତୀ ରାଷ୍ଟ୍ରପତିଙ୍କ କାର୍ଯ୍ୟ ହେବ। ଏହାକୁ ସେ ଏକୁଟିଆ କରିପାରିବେ ନାହିଁ। ତାଙ୍କ ସାଙ୍ଗରେ ଜଣେ ମହାନ୍ ଉପରାଷ୍ଟ୍ରପତି ରହିବେ। ହାରିସ୍ଙ୍କ ପାରିବାରିକ ଐତିହ୍ୟର ବିବିଧତା ରହିଛି। ତାଙ୍କ ମା’ ଭାରତୀୟ ଓ ବାପା ଜାମାଇକାର। ତାଙ୍କ ଦୃଢ଼ତା ସମସ୍ତ ପ୍ରତିବନ୍ଧକକୁ ଅତିକ୍ରମ କରିବାରେ ବଳ ଯୋଗାଇଛି ବୋଲି ବିଡେନ୍ କହିଥିଲେ। ସେ ଆମେରିକାକୁ ଭଲ ଭାବେ ଜାଣନ୍ତି। ତାଙ୍କ କାହାଣୀ ହେଉଛି ଆମେରିକାର କାହାଣୀ। ମହିଳା, କୃଷ୍ଣକାୟ ମହିଳା, କୃଷ୍ଣକାୟ ଆମେରିକୀୟ, ଦକ୍ଷିଣ ଏସୀୟ ଆମେରିକୀୟ ଓ ପ୍ରବାସୀ। ଏମାନଙ୍କ ସହ ଅବହେଳିତ ଓ ପଛୁଆବର୍ଗର ଲୋକଙ୍କ ପାଇଁ ସେ କାର୍ଯ୍ୟ କରିବେ।
ଗତ ମେ’ରେ ମିନିଆପଲିସରେ ଜଣେ ପୋଲିସ ଅଧିକାରୀଙ୍କ ହାତରେ ପ୍ରାଣ ହରାଇଥିବା କୃଷ୍ଣକାୟ ଆମେରିକୀୟ ଜର୍ଜ ଫ୍ଲୟଡ୍ଙ୍କ କଥାକୁ ବିଡେନ ମନେପକାଇଥିଲେ। ଜର୍ଜ ଫ୍ଲୟଡ୍ଙ୍କ ୬ ବର୍ଷୀୟା ଝିଅ ଜିଆନ୍ନାଙ୍କ ‘ବାପା ବିଶ୍ୱକୁ ବଦଳାଇଦେଲେ’ ଉକ୍ତି ତାଙ୍କ ହୃଦୟକୁ ଆନ୍ଦୋଳିତ କରିଛି କହି ବର୍ଣ୍ଣବୈଷମ୍ୟ ବିରୋଧରେ ଲଢ଼ିବା ପାଇଁ ଆମେରିକୀୟଙ୍କୁ ସେ ଆହ୍ବାନ ଦେଇଥିଲେ। ଡେମୋକ୍ରାଟିକ୍ ପାର୍ଟିରୁ ପୂର୍ବରୁ ରାଷ୍ଟ୍ରପତି ହୋଇଥିବା ବାରାକ ଓବାମାଙ୍କ ସହ ପ୍ରାୟ ୮ ବର୍ଷ କାମ କରିବାର ସୁଯୋଗ ପାଇଥିବାରୁ ସେ ତାଙ୍କୁ ଧନ୍ୟବାଦ ଦେଇଥିଲେ।
ସେ ଜଣେ ମହାନ୍ ରାଷ୍ଟ୍ରପତି ଥିଲେ, ଯାହାଙ୍କ ସମ୍ପର୍କରେ ପିଲାମାନେ ଅନେକ କିଛି ଜାଣିବାକୁ ଚାହାନ୍ତି। କିନ୍ତୁ ବର୍ତ୍ତମାନ ହ୍ବାଇଟ୍ ହାଉସ୍ରେ ଥିବା ଟ୍ରମ୍ପ୍ଙ୍କ କ୍ଷେତ୍ରରେ ଏପରି ଦେଖିବାକୁ ମିଳେନାହିଁ। ବର୍ତ୍ତମାନର ରାଷ୍ଟ୍ରପତିଙ୍କୁ ଆଉ ୪ ବର୍ଷ ଦିଆଗଲେ ସେ ବିଗତ ୪ ବର୍ଷ ଯେମିତି ଶାସନ କଲେ ସେମିତି କରିବେ। ଟ୍ରମ୍ପ୍ ଏପରି ଜଣେ ରାଷ୍ଟ୍ରପତି, ଯିଏକି କୌଣସି କାମ ପାଇଁ ଉତ୍ତରଦାୟୀ ହୁଅନ୍ତି ନାହିଁ, ନେତୃତ୍ୱ ନେବାକୁ ମନାକରନ୍ତି, ଅନ୍ୟମାନଙ୍କ ଉପରେ ଦୋଷ ଲଦନ୍ତି, ଏକଚ୍ଛତ୍ରବାଦୀଙ୍କ ଭଳି ବ୍ୟବହାର କରନ୍ତି ଏବଂ ଘୃଣା ଓ ବିଭାଜନକୁ ପ୍ରୋତ୍ସାହନ ଦେଇଥାଆନ୍ତି। ଟ୍ରମ୍ପ୍ ପୁଣିଥରେ ଜିତିଲେ କେବଳ ନିଜ କଥା ଚିନ୍ତା କରିବେ। ସେ ଅନ୍ୟ କାହାକୁ ପଚାରିବେ ନାହିଁ ବୋଲି ବିଡେନ ସମାଲୋଚନା କରିଛନ୍ତି।
