ଓ୍ବାଶିଂଟନ,୨୬ା୯: ଖଲିସ୍ତାନୀ ଆତଙ୍କବାଦୀଙ୍କ ହତ୍ୟା ସହ ଭାରୀୟ ଏଜେଣ୍ଟର ସମ୍ପୃକ୍ତି ଥିବା ଅଭିଯୋଗ ଆଣି କୂଟନୈତିକ ତିକ୍ତତା ସୃଷ୍ଟି କରିଥିବା କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ ଶୁକ୍ରବାର ୟୁକ୍ରେନ୍ର ନାଜି ନେତାଙ୍କୁ ସମ୍ମାନିତ କରି ଅଡୁଆରେ ପଡ଼ିଛନ୍ତି। ଏହି ନେତା ଜଣକ ହିଟ୍ଲରଙ୍କ ସେନାରେ ରହି ଇହୁଦୀ ଗଣହତ୍ୟାରେ ସାମିଲ ଥିଲେ। ନିକଟରେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର୍ ଜେଲେନ୍ସ୍କି ଓଟ୍ଟାଓ୍ବା ଗସ୍ତ କରିଥିବାବେଳେ କାନାଡା ହାଉସ୍ ଅଫ୍ କମନ୍ସରେ ନାଜି ଏସ୍ଏସ୍ର ୧୪ତମ ଓ୍ବାଫେନ୍ ଗେନାଡିଏର ଡିଜିଜନରର ବରିଷ୍ଠ ସଦସ୍ୟ ୟାରୋସ୍ଲାଭ୍ ହୁଙ୍କାଙ୍କୁ ଷ୍ଟାଣ୍ଡିଂ ଓବେଶନ ଜଣାଯାଇଥିଲା। ଏଥିପାଇଁ ହାଉସ୍ ସ୍ପିକର ଆନ୍ଥୋନି ରୋଟା ନିଜକୁ ଦାୟୀ କରି କ୍ଷମା ମାଗିଛନ୍ତି। ତେବେ ୟାରୋସ୍ଲାଭ୍ଙ୍କୁ ସମ୍ମାନିତ କରିବା ପୂର୍ବରୁ ଟ୍ରୁଡୋ ତାଙ୍କୁ ଭେଟିଥିଲେ ବୋଲି ବିରୋଧୀ ନେତାମାନେ ଅଭିଯୋଗ କରିଛନ୍ତି। ଏହାକୁ ନେଇ ଉତ୍ତେଜନା ଦେଖାଦେଇଛି। ଦ୍ୱିତୀୟ ବିଶ୍ୱଯୁଦ୍ଧବେଳେ ଆଡଲଫ୍ ହିଟଲରଙ୍କ ସେନାରେ କାମ କରୁଥିବା ଜଣେ ୟୁକ୍ରେନୀୟଙ୍କୁ କାନାଡା ପାର୍ଲାମେଣ୍ଟରେ ହିରୋ ଭାବେ ସମ୍ମାନିତ କରାଯିବାକୁ କ୍ରେମ୍ଲିନ୍ କଡ଼ା ସମାଲୋଚନା କରିଛି। ଐତିହାସିକ ସତ୍ୟତା ପ୍ରତି ଏହା ଦାୟିତ୍ୱହୀନ ଉପେକ୍ଷା ବୋଲି କ୍ରେମଲିନ୍ ମୁଖପାତ୍ର ଡିମିଟ୍ରି ପେସ୍କୋଭ୍ କହିଛନ୍ତି।
