କୋରାପୁଟ,୪।୬(ଅମିତାଭ ବେହେରା): କୋରାପୁଟ ସହର ଦେଇ ଯାଇଥିବା ୨୬ ନମ୍ବର ଜାତୀୟ ରାଜପଥର ଆରଟିଓ ଅଫିସ ନିକଟରେ ଗୁରୁବାର ଏକ ଦୁର୍ଘଟଣା ଘଟିଛି। ଦୁର୍ଘଟଣା ସୌଭାଗ୍ୟବଶତଃ ଟ୍ରକ ଡ୍ରାଇଭ ମତ୍ୟୁମୁଖରୁ ବର୍ତ୍ତିଯାଇଛନ୍ତି। ବ୍ରେକ ଫେଲ ହେବାରୁ ଏକ ଆଇଚର ଟ୍ରକ ନିୟନ୍ତ୍ରଣ ହରାଇ ମୂର୍ତ୍ତି ମାର୍କେଟ କମ୍ପ୍ଲେକ୍ସ ପରିସରରେ ଥିବା ଏକ ଗ୍ୟାସ ଦୋକାନ ଭିତରକୁ ପଶିଯାଇଥିଲା।
ସୂଚନା ଅନୁଯାୟୀ, ଗୁରୁବାର ସନ୍ଧ୍ୟା ପ୍ରାୟ ୫ଟା ସମୟରେ ଜୟପୁର ଆଡୁ କୋରାପୁଟ ଆସୁଥିବା ଏକ ଟ୍ରକ ୨୬ ନଂ ଜାତୀୟ ରାଜପଥ ଦେଇ ଯାଉଥିବାବେଳେ ହଠାତ୍ ବ୍ରେକ ଫେଲ ହୋଇଯାଇଥିଲା। ଫଳରେ ଟ୍ରକଟି ନିୟନ୍ତ୍ରଣ ହରାଇ ଗ୍ୟାସ ଦୋକାନ ଭିତରକୁ ପଶିଯାଇଥିଲା। ଦୁର୍ଘଟଣାରେ କୌଣସି ମୃତାହତ ହୋଇ ନ ଥିବା ବେଳେ ଦୋକାନ ସମ୍ମୁଖରେ ରଖାଯାଇଥିବା ୧୦ରୁ ଅଧିକ ବାଇକ୍ ଚୁରମାର ହୋଇଯାଇଛି।
ଘଟଣା ପରେ ଅଞ୍ଚଳରେ କିଛି ସମୟ ଆତଙ୍କ ଖେଳିଯାଇଥିଲା। ଖବର ପାଇ କୋରାପୁଟ ପୋଲିସ, କୋରାପୁଟ ତହସିଲଦାର ସାୟଦ ସବୀର ସାହା ଘଟଣାସ୍ଥଳରେ ମାଜିଷ୍ଟ୍ରେଟ ଭାବେ ଏବଂ ସ୍ଥାନୀୟ ପୌରାଧକ୍ଷ ଲଲାଟ ରଞ୍ଜନ ସେଠୀ ପ୍ରମୁଖ ଉପସ୍ଥିତ ରହି ଉଦ୍ଧାର କାର୍ଯ୍ୟ ତଦାରଖ କରୁଥିବା ବେଳେ ସ୍ଥାନୀୟ ଅଗ୍ନିଶମ ବାହିନୀ ଓ ପୋଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ସହ ଯାତାୟାତ ସ୍ବାଭାବିକ କରିବାରେ ଲାଗିପଡ଼ିଛନ୍ତି।
ଦୁର୍ଘଟଣାର ପ୍ରକୃତ କାରଣ ଓ କ୍ଷୟକ୍ଷତିର ଆକଳନ ନେଇ ପୋଲିସ ତଦନ୍ତ ଜାରି ରଖିଛି। ଏପରି ଘଟଣା ଏହା ପ୍ରଥମ ନୁହେଁ ପୂର୍ବରୁ ଗତ ୪ ମାସ ପୂର୍ବେ ଠିକ୍ ଏହିସ୍ଥାନରେ ଏକ ଟ୍ରକ ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରେ ୧୫ରୁ ଊର୍ଦ୍ଧ୍ୱ ବାଇକ୍ ଭାଙ୍ଗି ନଷ୍ଟ ହେବା ସହ ୩ଟି ବଡ଼ ଗାଡି ଭାଙ୍ଗି ଯାଇଥିଲା।
ଏଥିପ୍ରତି ଜାତୀୟ ରାଜପଥ ବିଭାଗ କିମ୍ବା ଜିଲା ପ୍ରଶାସନ କୌଣସି ପଦକ୍ଷେପ ଗ୍ରହଣ କରି ନ ଥିବା ବେଳେ ଆଗାମୀ ଦିନରେ ଏହି ସ୍ଥାନରେ ଏକ ବଡ଼ ଧରଣର ଦୁର୍ଘଟଣା ଘଟି ବ୍ୟାପକ ଧନ ଜୀବନ ହାନି ଘଟିବ ତାହା କିଏ କହିବ ବୋଲି ସହରବାସୀ ପ୍ରକାଶ କରିଛନ୍ତି। ଏଥିପ୍ରତି ଜିଲାପାଳ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
