ମୁମ୍ବାଇ,୧୧।୮: ମହାରାଷ୍ଟ୍ରର ୟଭତମାଲରେ ଜଣେ ଯୁବକଙ୍କ ‘ମେକ୍ ଇନ୍ ଇଣ୍ଡିଆ’ ସ୍ବପ୍ନର ଏକ ଦୁଃଖଦ ଅନ୍ତ ଘଟିଛି। ପରୀକ୍ଷଣ ସମୟରେ ‘ମୁନ୍ନା ହେଲିକପ୍ଟର’ ଦୁର୍ଘଟଣାଗ୍ରସ୍ତ ହୋଇଯିବାରୁ ଏହାକୁ ତିଆରି କରିଥିବା ଶେଖ୍ ଇସ୍ମାଇଲ ଅରଫ ମୁନ୍ନା ଶେଖଙ୍କ ମୃତ୍ୟୁ ଘଟିଛି। ସୂଚନାଯୋଗ୍ୟ, ୟଭତମାଲ ଜିଲାର ଫୁଲସାଓ୍ବଙ୍ଗୀ ଗାଁର ୨୪ ବର୍ଷୀୟ ଶେଖ ଇସ୍ମାଇଲ ଅରଫ୍ ମୁନ୍ନା କେବଳ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଅଧ୍ୟୟନ କରିଛନ୍ତି। କିନ୍ତୁ ସାହସ ଥିଲା ହେଲିକପ୍ଟର ତିଆରି କରିବାର। ମୁନ୍ନା ଜଣେ ୱେଲଡର ଭାବେ କାର୍ଯ୍ୟ କରୁଥିବା ବେଳେ ଖଣ୍ଡ ଖଣ୍ଡ ଜିନିଷକୁ ଯୋଡି ତାଙ୍କ ଗ୍ୟାରେଜରେ ଏକ ହେଲିକପ୍ଟର ତିଆରି କରିଥିଲେ। ଆଉ ଏହାର ନାମ ସେ ‘ମୁନ୍ନା ହେଲିକପ୍ଟର’ ରଖିଥିଲେ। କିନ୍ତୁ ତାଙ୍କର ମେକ୍ ଇନ୍ ଇଣ୍ଡିଆର ସ୍ବପ୍ନ ଅଧାରେ ରହିଯାଇଛି। କାରଣ ମଙ୍ଗଳବାର ରାତିରେ ଏହାର ପରୀକ୍ଷଣ ଉଡାଣ ସମୟରେ ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହୋଇଥିଲା। ଆଉ ଏଥିରେ ମୁନ୍ନା ନିଜର ପ୍ରାଣ ହରାଇଥିଲେ।
ତାଙ୍କ ବିୟୋଗରେ ଉକ୍ତ ଅଞ୍ଚଳର ସ୍ଥାନୀୟ ବିଧାୟକ ରାଜେନ୍ଦ୍ର ନଜରଧାନେ ଶୋକ ପ୍ରକାଶ କରିବା ସହ କହିଛନ୍ତି, ଅଧିକ ଶିକ୍ଷିତ ନ ହେବା ପରେ ବି ମୁନ୍ନାଙ୍କ ଭିତରେ ଅମାପ ପ୍ରତିଭା ରହିଥିଲା। ନିଜର ଦକ୍ଷତା ବଳରେ ସେ ଉକ୍ତ ଅଞ୍ଚଳର ବେଶ୍ ନାଁ କରିପାରିଥିଲେ। ସ୍ନେହରେ ତାଙ୍କୁୁ ଲୋକମାନେ ‘ରାଞ୍ଚୋ’ ବୋଲି ଡାକୁଥିଲେ। ମୁନ୍ନାଙ୍କ ଦ୍ୱାରା ପ୍ରସ୍ତୁତ ହୋଇଥିବା ହେଲିକପ୍ଟରକୁ ଦେଖିବା ପାଇଁ ବାଙ୍ଗାଲୁରୁରୁ ଏକ ବିଶେଷଜ୍ଞ ଟିମ୍ ଆସିବାର ଥିଲା। ଏହି ଉତ୍ସାହରେ ଗୋଟିଏ ଦିନ ପୂର୍ବରୁ ମୁନ୍ନା ହେଲିକପ୍ଟରର ଏକ ପରୀକ୍ଷଣ ଉଡାଣ କରିବାକୁ ଚେଷ୍ଟା କରିଥିଲେ। କିନ୍ତୁ ଦୁର୍ଭାଗ୍ୟବଶତଃ ଏହି ଦୁର୍ଘଟଣା ଘଟିଥିଲା। ହେଲିକପ୍ଟର କ୍ରାସ୍ ହେବାରୁ ତାଙ୍କର ମୃତ୍ୟୁ ହୋଇଥିଲା। ମୁନ୍ନାଙ୍କ ମୃତ୍ୟୁରେ ଉମରଖେଡ ବିଧାନସଭା ନିର୍ବାଚନମଣ୍ଡଳୀରେ ଶୋକରଛାୟା ଖେଳିଯାଇଛି।
