ପୁରୁଷୋତ୍ତମପୁର, ୧୬।୭(ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଅରଖପୁର ଗ୍ରାମରେ ରଥଯାତ୍ରା ସମୟରେ ଏକ ଅଭାବନୀୟ ଘଟଣା ଘଟିଛି। ରଥଟଣା ଚାଲିଥିବା ବେଳେ ପାରିବାରିକ ଶତ୍ରୁତାକୁ କେନ୍ଦ୍ର କରି ଜଣେ ବ୍ୟକ୍ତି ନିଜ ଶଳାକୁ ଖଣ୍ଡାରେ ମରଣାତ୍ମକ ଆକ୍ରମଣ କରିଛନ୍ତି। ଆହତ ଯୁବକ ଜଣକ ହେଲେ ସତ୍ୟବାନ ପାଣ୍ଡି (୩୦)।
ମିଳିଥିବା ସୂଚନା ଅନୁଯାୟୀ, ସତ୍ୟବାନଙ୍କ ଭଉଣୀଙ୍କୁ ତାଙ୍କ ଭିଣୋଇ ଜିତୁ କରଣ ଅଫେରା ନିର୍ଯ୍ୟାତନା ଦେଇ ଆସୁଥିଲେ। ଏହାକୁ ସତ୍ୟବାନଙ୍କ ପରିବାର ଲୋକେ ପ୍ରତିବାଦ କରୁଥିବାରୁ ଜିତୁ ସେମାନଙ୍କ ଉପରେ ପ୍ରତିଶୋଧ ନେବାକୁ ସୁଯୋଗ ଖୋଜୁଥିଲେ। ଗୁରୁବାର ଅରଖପୁର ଗ୍ରାମରେ ରଥଟଣା ଚାଲିଥିବା ବେଳେ ସତ୍ୟବାନ ରଥ ଦଉଡ଼ି ଧରି ଟାଣୁଥିଲେ। ଏହି ସମୟରେ ଜିତୁ ହଠାତ୍ ଏକ ଖଣ୍ଡା ସାହାଯ୍ୟରେ ସତ୍ୟବାନଙ୍କୁ ଆକ୍ରମଣ କରି ଗହଳି ଭିତରେ ଚମ୍ପଟ ମାରିଥିଲେ।
ଘଟଣାସ୍ଥଳରେ ଉପସ୍ଥିତ ଲୋକେ ଏବଂ ପୁରୁଷୋତ୍ତମପୁର ତହସିଲଦାର ବିନୋଦ କୁମାର ବେହେରା ଗୁରୁତର ଆହତ ସତ୍ୟବାନଙ୍କୁ ଉଦ୍ଧାର କରି ପ୍ରଥମେ ପୁରୁଷୋତ୍ତମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ। ମାତ୍ର ଅବସ୍ଥା ଅଧିକ ଗୁରୁତର ହେବାରୁ ତାଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି।
ଅନ୍ୟପକ୍ଷରେ, ପୁରୁଷୋତ୍ତମପୁର ରଥସାହିରେ ରଥଟଣା ଚାଲିଥିବା ସମୟରେ ଭକ୍ତଙ୍କ ପ୍ରବଳ ଭିଡ଼ ଯୋଗୁଁ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା। ଏଥିରେ ଜଣେ ବୃଦ୍ଧ ଭକ୍ତ ତଳେ ପଡ଼ି ଆହତ ହୋଇଛନ୍ତି। ସେ ହେଲେ କବିସୂର୍ଯ୍ୟନଗର ଥାନା ଅନ୍ତର୍ଗତ ଗୋପପୁର ଗ୍ରାମର ଅଭରି ସେଠୀ (୬୪)। ଖବର ପାଇ ତହସିଲଦାର ବିନୋଦ କୁମାର ବେହେରା ତାଙ୍କୁ ଉଦ୍ଧାର କରି ଚିକିତ୍ସା ପାଇଁ ପୁରୁଷୋତ୍ତମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇବା ସହ ନିଜେ ଉପସ୍ଥିତ ରହି ସମ୍ପୂର୍ଣ୍ଣ ଚିକିତ୍ସାର ତଦାରଖ କରିଥିଲେ। ପରେ ସୁସ୍ଥ ହେବା ପରେ ବୃଦ୍ଧଙ୍କୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।
