ଖଣ୍ଡପଡ଼ା,୧୪ା୧୧(ସ୍ବ.ପ୍ର.): ଖଣ୍ଡପଡ଼ା ସହର ଉପକଣ୍ଠରେ ରହିଛି ସୁନାମୁହିଁ ପରିବେଶ ପର୍ଯ୍ୟଟନ ସ୍ଥଳୀ। ୨ବର୍ଷ ତଳେ ଏହା ଲୋକାରଣ୍ୟ ହୋଇଉଠୁଥିଲା। ରାଜ୍ୟ ତଥା ରାଜ୍ୟ ବାହାରରୁ ଏଠାକୁ ପର୍ଯ୍ୟଟକଙ୍କ ସୁଅ ଛୁଟୁଥିଲା। ଏବେ ପର୍ଯ୍ୟଟନ ଋତୁ ଆରମ୍ଭ ହୋଇଥିଲେ ହେଁ ଆଉ ପୂର୍ବପରି ପର୍ଯ୍ୟଟକ ଆସୁ ନ ଥିବାରୁ ଏହି ପର୍ଯ୍ୟଟନସ୍ଥଳୀ ଖାଁ ଖାଁ ଲାଗୁଛି।
ଖଣ୍ଡପଡା କ୍ଷୁଦ୍ର ଜଳସେଚନ ବିଭାଗ ସହକାରୀ ନିର୍ବାହୀଯନ୍ତ୍ରୀଙ୍କ କାର୍ଯ୍ୟାଳୟ ଅଧୀନରେ ଥିବା ଏହି ପର୍ଯ୍ୟଟନସ୍ଥଳୀରେ ୨ ବର୍ଷ ତଳେ ୧ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ଅନେକ ଉନ୍ନୟନମୂଳକ କାର୍ଯ୍ୟ କରାଯାଇଥିଲା। ପିଲାମାନଙ୍କ ଆମୋଦପ୍ରମୋଦ ନିମନ୍ତେ ଦୋଳିଠାରୁ ଆରମ୍ଭ କରି ବିଭିନ୍ନ ପ୍ରକାର କ୍ରୀଡା ସାମଗ୍ରୀ ସ୍ଥାପନ କରାଯାଇଥିଲା। ସେହିପରି ଯୁବତୀଯୁବକ ଓ ବୟସ୍କ ବ୍ୟକ୍ତିମାନଙ୍କ ଶାରୀରିକ ବ୍ୟାୟାମ ନିମନ୍ତେ ଅନେକ ମୂଲ୍ୟବାନ ଉପକରଣ ଉପଲବ୍ଧ ହେଉଥିଲା। ମାତ୍ର ପ୍ରଶାସନିକ ସ୍ଥାଣୁତା ସାଙ୍ଗକୁ ବିଭାଗୀୟ କର୍ତ୍ତୃପକ୍ଷଙ୍କ ଆନ୍ତରିକତା ଅଭାବର ସୁଯୋଗ ନେଇ ଦୁର୍ବୃତ୍ତମାନେ ପର୍ଯ୍ୟଟନ ସ୍ଥଳୀ ପରିସରରୁ ଅନେକ ମୂଲ୍ୟବାନ ସାମଗ୍ରୀ ଚୋରୀକରି ନେଇଛନ୍ତି। ଫଳରେ ଏହା ପରିସର ଶ୍ରୀହୀନ ହେବାରେ ଲାଗିଛି। ବର୍ତ୍ତମାନ ଏହ ସ୍ଥାନରେ କୁଢ କୁଢ ମଦ ବୋତଲ, ପାଣିପାଉଚ ଜରି, ଅଇଁଠା ଖଲିପତ୍ର ଓ ଠୁଙ୍ଗା ଆଦି ଏଣେତେଣେ ପଡିଥିବା ପରିଲକ୍ଷିତ ହେଉଛି। ପର୍ଯ୍ୟଟନସ୍ଥଳୀର ଏପରି ଅବସ୍ଥାକୁ ଦେଖି ପର୍ଯ୍ୟଟକମାନେ ଏଠାରୁ ମୁହଁ ବୁଲାଇ ଅନ୍ୟତ୍ର ଚାଲିଯାଉଛନ୍ତି। ଏହାର ସୁରକ୍ଷା ଓ ରକ୍ଷଣାବେକ୍ଷଣ ଦିଗରେ ଜିଲା ପ୍ରଶାସନ, ଖଣ୍ଡପଡା ଏନ୍ଏସି କର୍ତ୍ତୃପକ୍ଷ ଦୃଷ୍ଟି ଦେବାକୁ ବିଭିନ୍ନ ମହଲରୁ ଦାବି ହେଉଛି।
