ନୀଳଗିରି, ୧୯।୯, (ପ୍ରଶାନ୍ତ କୁମାର ବିଶ୍ବାଳ): ଶେରଗଡ଼ ନୀଳଗିରି ଦେଇ ମୟୁରଭଞ୍ଜକୁ ସଂଯୋଗ କରୁଥିବା ୧୯ନଂ ରାଜ୍ୟ ରାଜପଥର ଗୁହିରା ଏବଂ ଛତ୍ରପୁର ମଝି ରାସ୍ତା ଭୁଡୁରୁବଣି ଠାରେ ପଶ୍ଚିମବଙ୍ଗ ରୁ ଆସିଥିବା ଏକ ତୀର୍ଥଯାତ୍ରୀ ବସ ଦୁର୍ଘଟଣାଗ୍ରସ୍ତ। ୩୫ରୁ ଅଧିକ ଯାତ୍ରୀଙ୍କୁ ବରହମପୁର ହସ୍ପିଟାଲରେ ଭର୍ତ୍ତି । ବସ୍ରେ ୬୦ରୁ ଅଧିକ ଯାତ୍ରୀ ଥିଲେ । ପଶ୍ଚିମବଙ୍ଗରୁ ଦେବକୁଣ୍ଡ, ପଞ୍ଚଲିଙ୍ଗେଶ୍ବର ବୁଲିବାକୁ ଆସିଥିଲା ଏହି ଯାତ୍ରୀବାହୀ ବସ୍। ସୂଚନା ମୁତାବକ ମୟୂରଭଞ୍ଜ ଜିଲ୍ଲା ଉଦଳା ନିକଟସ୍ଥ ଦେବକୁଣ୍ଡରୁ ବୁଲା ବୁଲି ସାରି ବାଲେଶ୍ୱର ଜିଲା ନୀଳଗିରିର ପଞ୍ଚଲିଙ୍ଗେଶ୍ୱର ଶୈବପୀଠ ବୁଲିବାକୁ ଆସୁଥିବାବେଳେ ଭୁଡୁରୁବଣି ଠାରେ ଶନିବାର ମଧ୍ଯାହ୍ନ ୨ଘଟିକା ସମୟରେ ଆସୁଥିବା ତୀର୍ଥଯାତ୍ରୀ ବସ (ଡବ୍ଲୁ ବି ୩୩ସି ୫୭୨୪) ରାସ୍ତାରେ ଗାଇଙ୍କୁ ବଞ୍ଚାଇବାକୁ ଯାଇ ଭାରସାମ୍ୟ ହରାଇ ବସ୍ ଟି ରାସ୍ତାର ବାମପଟ ତଳକୁ ଓଲଟି ପଡିଥିଲା। ତେବେ ବସ୍ ରେ ୬୦ରୁ ଅଧିକ ବଙ୍ଗୀୟ ପର୍ଯ୍ୟଟକ ଥିବାବେଳେ ୨୦ ରୁ ଅଧିକ ଆହତ ହୋଇ ଥିବାବେଳେ ୧୦ ଯାତ୍ରୀଙ୍କ ଅବସ୍ଥା ଗୁରୁତର ରହିଥିବା ଜଣାପଡ଼ିଛି। ଘଟଣାସ୍ଥଳରେ ବରହମପୁର ପୋଲିସ, ନୀଳଗିରି ଅଗ୍ନିଶମ ବିଭାଗ, ସ୍ଥାନୀୟ ଲୋକ ମିଳିତ ଭାବେ ଉଦ୍ଧାରକାର୍ଯ୍ୟ ଜାରି ରଖିଥିବା ବେଳେ ଆହତ, ଗୁରୁତର ଯାତ୍ରୀମାନଙ୍କୁ ଉଦ୍ଧାର କରି ଆମ୍ବୁଲାନ୍ସ ଓ ଅଗ୍ନିଶମ ଯୋଗେ ବରହମପୁର ଡାକ୍ତରଖାନା କୁ ସ୍ଥାନାନ୍ତର କରାଯାଇଛି। ଗୁରୁତର ମାନଙ୍କୁ ବାଲେଶ୍ୱର ଫକୀରମୋହନ ମେଡ଼ିକାଲ କଲେଜ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଉଦ୍ଧାର କାର୍ଯ୍ୟ ଜାରି ରହିଛି।
