ସମ୍ବଲପୁର, ୨୭।୧୨(ପ୍ରମୋଦ ବହିଦାର): ସମ୍ବଲପୁର ଜିଲା ଯୁଯୁମୁରା ଥାନା ଅନ୍ତର୍ଗତ କଂସର ନିକଟରେ ଜାତୀୟ ରାଜପଥ(୫୫) ଉପରେ ଗୁରୁବାର ଭୋରରେ ଏକ ଟୁରିଷ୍ଟ ବସ ଦୁର୍ଘଟଣାର ସମ୍ମୁଖୀନ ହୋଇଛି। ଏଥିରେ ୧୫ ଜଣ ଯାତ୍ରୀ ଗୁରୁତର ଆହତ ହୋଇଛନ୍ତି । ଅହତମାନଙ୍କ ମଧ୍ଯରୁ ୭ ଜଣଙ୍କୁ ସମ୍ବଲପୁର ଜିଲାମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇ ଥିବା ବେଳେ ଗୁରୁତର ଆହତ ୮ ଜଣଙ୍କୁ ସଙ୍କଟାପନ୍ନ ଅବସ୍ଥାରେ ବୁର୍ଲା ଭିମସାରରେ ଭର୍ତ୍ତି କରାଯାଇଛି ।
ମିଳିଥିବା ସୂଚନା ଅନୁସାରେ ଗତ ଶୁକ୍ରବାର ରାତିରେ ଏକ ବସ୍(ଓଡି-୦୨-ସିଏଲ୍-୦୮୫୦) ଭୁବନେଶ୍ବରରୁ ୧୭ ଜଣ ପର୍ଯ୍ଯଟକଙ୍କୁ ନେଇ ମାଁ ସମଲେଶ୍ୱରୀଙ୍କ ଦର୍ଶନ ପାଇଁ ସମ୍ବଲପୁର ଅଭିମୁଖେ ବାହାରିଥିଲା। ମାତ୍ର ସମ୍ବଲପୁର ପହଞ୍ଚିବା ପୂର୍ବରୁ ଶନିବାର ଭୋର ପ୍ରାୟ ୬ଟାରେ କଂସର ନିକଟରେ ରାସ୍ତାରେ ଥିବା ଏକ ପୋଲର ଗାର୍ଡୱାଲକୁ ଧକ୍କାଦେଇ ବସଟି ଦୁର୍ଘଟଣାଗ୍ରସ୍ତ ହୋଇଥିଲା।
ବସରେ ଆହତ ଯାତ୍ରୀଙ୍କ କହିବା ଅନୁସାରେ ଭୋର ସମୟରେ ବସ୍ ଚାଳକଙ୍କ ଆଖି ଲାଗିଯିବାରୁ ବସଟି ରାସ୍ତାକଡ଼କୁ ଚାଲିଯାଇ ଏକ ପୋଲର ଗାର୍ଡୱାଲ ସହ ଧକ୍କା ହୋଇଥିଲା। ଖବରପାଇ ଯୁଯୋମୁରା ଥାନା ପୋଲିସ ଦୁର୍ଘଟଣା ସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି ପ୍ରଥମେ ଯୁଯୋମୁରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲା। ତେବେ ସେଠାରେ ପ୍ରାଥମିକ ଚିକିତ୍ସା ପରେ ସମସ୍ତଙ୍କ ବିଭିନ୍ନ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। ଯୁଯୋମୁରା ପଲିସ ଦୁର୍ଘଟଣାଗ୍ରସ୍ତ ବସକୁ ଜବତ କରି ପକ୍ଷରୁ ଘଟଣାର ତଦନ୍ତ ଆରମ୍ଭ କରିଛି।
