ଦାରିଙ୍ଗବାଡି, ୧୧। ୬ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ପର୍ଯ୍ୟଟନକ୍ଷେତ୍ର ଭାବେ ରାଜ୍ୟ ଓ ରାଜ୍ୟ ବାହାରେ ପରିଚିତ ଦୈନିକ ଶହ ଶହ ପର୍ଯ୍ୟଟକ ଦାରିଙ୍ଗବାଡିକୁ ବୁଲି ଆସୁଥିବା ବେଳେ କୁଢ଼ କୁଢ଼ ଅଳିଆ ଗଦାକୁ ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏହାର ସମାଧାନ ପାଇଁ ସାଂଜାସରୁ ଉନ୍ନୟନ ଟ୍ରଷ୍ଟର ଅଧ୍ୟକ୍ଷା ତଥା ବାଲିଗୁଡା ଉପଜିଲାପାଳ ପ୍ରଣୀତା ଦାସଙ୍କ ନିର୍ଦ୍ଦେଶକ୍ରମେ ସ୍ଥାନୀୟ ବିଡ଼ିଓ ପ୍ରୀତିରଞ୍ଜନ ରଥଙ୍କ ତତ୍ତ୍ୱାବଧାନରେ ଦାରିଙ୍ଗବାଡିକୁ ପ୍ରତିଗୁରୁବାର ସଫେଇ କାର୍ଯ୍ୟ କରାଯାଉଛି । ଏହି କାର୍ଯ୍ୟରେ ଦାରିଙ୍ଗବାଡିର ବିଭିନ୍ନ ସଂଗଠନ ସାମିଲ ହୋଇ ପ୍ରଶାସନକୁ ସହଯୋଗ କରୁଛନ୍ତି । ଏହି କ୍ରମରେ ଗୁରୁବାର ଦାରିଙ୍ଗବାଡି ଗୋଷ୍ଠି ସ୍ବାସ୍ଥ୍ୟକେନ୍ଦ୍ର ସମେତ ପ୍ରକୃତି ତଥା ପ୍ରଜାପତି ଉଦ୍ୟାନ, ହିଲଭିୟୁ ପାର୍କ ପରିସରକୁ ସଫେଇ କରାଯାଇଥିଲା। ଏହି ସଫେଇ କାର୍ଯ୍ୟରେ ଦାରିଙ୍ଗବାଡି ଜନସାଧାରଣ ଓ ବିଭିନ୍ନ ସଂଗଠନ ସାମିଲ ହୋଇଥିବା ବେଳେ ଏହି କାର୍ଯ୍ୟପ୍ରତି ଯୁବପିଢିଙ୍କୁ ମଧ୍ୟ ପ୍ରଭାବିତ କରୁଛି । ଫଳରେ ଯୁବ ଖ୍ରୀଷ୍ଟିୟାନ ସଂଘର ଶତାଧିକ ସଦସ୍ୟ, କର୍ମକର୍ତ୍ତା ଏହି ସଫେଇରେ ସାମିଲ ହୋଇଛନ୍ତି ।
