କଟକ ଅଫିସ,୨୨।୧: କଟକ ଏସ୍ସିବି ମେଡିକାଲରେ ଏକ ବିରଳ ଅସ୍ତ୍ରୋପଚାର କରାଯାଇଛି। ଡାହାଣ ହାତର ବୁଢ଼ା ଆଙ୍ଗୁଠି ହରାଇଥିବା ଜଣେ ଯୁବକଙ୍କର ପ୍ଲାଷ୍ଟିକ ସର୍ଜରି ମାଧ୍ୟମରେ ଗୋଡ଼ ଆଙ୍ଗୁଠି ରୋପଣ କରାଯାଇଛି। ଯୁବକ ଜଣକ ହେଲେ ଭଦ୍ରକ ଜିଲା ବାସୁଦେବପୁର ବ୍ଲକ ବାଲିମେଦ ପଞ୍ଚାୟତ ଅଧୀନ ପାଇକସାହି ଗ୍ରାମର ପୁରୁଷୋତ୍ତମ ବାରିକଙ୍କ ପୁତ୍ର ସୀତାକାନ୍ତ ବାରିକ(୨୬)। ଏସ୍ସିବି ମେଡିକାଲର ପ୍ଲାଷ୍ଟିକ ସର୍ଜରି ବିଭାଗରେ ଏଭଳି ବିରଳ ଅସ୍ତ୍ରୋପଚାର ମାଗଣା କରାଯାଇଛି। ଯାହାକି ଘରୋଇ ଭାବେ କରାଗଲେ ୨ ଲକ୍ଷ ଟଙ୍କା ଖର୍ଚ୍ଚ ହୋଇପାରେ ବୋଲି ଜଣାଯାଇଛି। ଗତ ୧୨ ତାରିଖରେ ଏହି ଅସ୍ତ୍ରୋପଚାର ହୋଇଥିବାବେଳେ ୬ ସପ୍ତାହ ପରେ ଏହାର କାର୍ଯ୍ୟକାରିତା ଜଣାଯିବ ବୋଲି ବିଭାଗୀୟ ମୁଖ୍ୟ ପ୍ରଫେସର ଡା. ବିଭୂତି ଭୂଷଣ ନାୟକ ଶନିବାର ଏସ୍ସିବି ମେଡିକାଲ ପରିସରରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ସୀତାକାନ୍ତ ତାମିଲନାଡୁର ଏକ ସୂତାକଳରେ କାମ କରୁଥିବାବେଳେ ମେଶିନରେ ଡାହାଣ ହାତର ବୁଢ଼ା ଆଙ୍ଗୁଠି କଟିଯାଇଥିଲା। ୩ ମାସ ତଳେ ସେ ଆଙ୍ଗୁଠି ହରାଇଥିବାବେଳେ ନିଜର ଦୈନନ୍ଦିନ କାର୍ଯ୍ୟ କରିବାରେ ବହୁ ଅସୁବିଧାର ସମ୍ମୁଖୀନ ହେଉଥିଲେ। ଏମିତି କି ମୋବାଇଲ ଚଲାଇବା, କିଛି ଗୋଟାଏ ଜିନିଷ ଉଠାଇବା, ଲେଖିବା ଆଦି କାର୍ଯ୍ୟ କରିବାକୁ ଭାରି ଅସୁବିଧା ହେଉଥିଲା। ସୀତାକାନ୍ତ ଏସ୍ସିବି ମେଡିକାଲର ପ୍ଲାଷ୍ଟିକ ସର୍ଜରି ବିଭାଗରେ ଦେଖାଇବା ପରେ ତାଙ୍କୁ ଗୋଡ଼ ଆଙ୍ଗୁଠି କାଟି ହାତର ବୁଢ଼ା ଆଙ୍ଗୁଠି ସ୍ଥାନରେ ଲଗାଯିବା ପାଇଁ କୁହାଯାଇଥିଲା। ସେ ତାଙ୍କ ପରିବାର ଲୋକଙ୍କ ସହ ଆଲୋଚନା କରି ଏନେଇ ସମ୍ମତି ଜଣାଇଥିଲେ। ପରେ ବିଭାଗୀୟ ମୁଖ୍ୟ ପ୍ରଫେସର ଡା. ନାୟକଙ୍କ ତତ୍ତ୍ୱାବଧାନରେ ସର୍ଜରି କରିବାକୁ ଯୋଜନା କରାଯାଇଥିଲା। ବିଭାଗର ପ୍ଲାଷ୍ଟିକ୍ ଆଣ୍ଡ୍ ରି-କନଷ୍ଟ୍ରକଟିଭ ସର୍ଜରି ଶାଖା ଅଧୀନରେ ଯୁବକଙ୍କ ବାମ ଗୋଡ଼ ଦ୍ୱିତୀୟ ଆଙ୍ଗୁଠିର ରକ୍ତ ନଳୀ, ସ୍ନାୟୁ ଓ ହାଡ଼କୁ ଅଲଗା କରାଯାଇ ଡାହାଣ ହାତର ବୁଢ଼ା ଆଙ୍ଗୁଠିରେ ରୋପଣ କରାଯାଇଥିଲା। ବିଭାଗୀୟ ମୁଖ୍ୟ ଡା. ନାୟକ ଏହି ସର୍ଜରି ପାଇଁ ଦୁଇଟି ଡାକ୍ତରୀ ଦଳର ସହାୟତା ନେଇଥିଲେ। ଡା. ପ୍ରଶାନ୍ତ, ଡା. ଆଶିଷ, ଡା. ରୋଜାଲିନ, ଡା. ବିଷ୍ଣୁ, ଡା. ଆସ୍ଫାକ୍, ଡା. ଦୀପକ, ଡା. ଶ୍ୟାମ, ଡା. ଅମିତାଭ, ଡା. ନୃସିଂହ, ଡା. ଇଶାନ୍, ଡା. ସୂର୍ଯ୍ୟ ସାମିଲ ହୋଇଥିଲେ। ନିଶ୍ଚେତକ ବିଭାଗର ଡା. ଅଭିଜିତ, ଡା. ନିମିଷା ମଧ୍ୟ ଏଥିରେ ସହଯୋଗ କରିଥିଲେ। ଓଡ଼ିଶାରେ ଏଭଳି ବିରଳ ଅସ୍ତ୍ରୋପଚାର ପ୍ରଥମଥର ପାଇଁ କରାଯାଇଥିବା ଡା. ନାୟକ କହିଛନ୍ତି।
