ଟୋକିଓ,୨୭।୮: ଭାଭିନାବେନ ପଟେଲ ଶୁକ୍ରବାର ଇତିହାସ ରଚିଛିନ୍ତି। ପାରାଲିମ୍ପିକ୍ସର ମହିଳା ଟେବୁଲ ଟେନିସ ଇଭେଣ୍ଟରେ ପଦକ ନିଶ୍ଚିତ କରିବାରେ ଭାବିନା ପ୍ରଥମ ଭାରତୀୟ ଖେଳାଳି। ୨୦୧୬ ରିଓ ପାରାଲିମ୍ପିକ୍ସ ଚାମ୍ପିୟନ ବୋରିସ୍ଲାଭା ପେରିସ-ରାଙ୍କୋଭିକ୍ଙ୍କୁ ସିଧାସଳଖ ଗେମ୍ରେ ହରାଇ ଭାଭିନା ସେମିଫାଇନାଲରେ ସ୍ଥାନ ପକ୍କା କରିଛନ୍ତି।
କ୍ୱାର୍ଟର ଫାଇନାଲରେ ୩୪ ବର୍ଷୀୟା ଭାରତୀୟ ୧୧-୫, ୧୧-୬, ୧୧-୭ ଗେମ୍ରେ ପ୍ରତିପକ୍ଷ ସର୍ବିଆ ଖେଳାଳିଙ୍କୁ ହରାଇ ଦେଇଛନ୍ତି। ମ୍ୟାଚ୍ ଜିତିବା ଲାଗି ତାଙ୍କୁ ମାତ୍ର ୧୮ ମିନିଟ୍ ଲାଗିଥିଲା। ଶନିବାର ଖେଳାଯିବାକୁ ଥିବା ସେମିଫାଇନାଲରେ ଭାଭିନା ଚାଇନାର ଝାଙ୍ଗ ମିଆଓଙ୍କୁ ଭେଟିବେ।
ସେମିଫାଇନାଲରେ ପ୍ରବେଶ କରିବା ସହ ଭାଭିନା ଅତିକମ୍ରେ ବ୍ରୋଞ୍ଜ ପଦକ ନିଶ୍ଚିତ କରିଛନ୍ତି। ଟୋକିଓ ପାରାଲିମ୍ପିକ୍ସର ଟେବୁଲ ଟେନିସ ଇଭେଣ୍ଟରେ ବ୍ରୋଞ୍ଜ ପଦକ ପ୍ଲେ-ଅଫ୍ ମ୍ୟାଚ୍ ନାହିଁ। ଏଣୁ ଉଭୟ ସେମିଫାଇନାଲରେ ପରାସ୍ତ ହୋଇଥିବା ଆଥ୍ଲେଟ ବ୍ରୋଞ୍ଜ ପଦକ ଜିତିବା ନିଶ୍ଚିତ।
