ନୟାଗଡ଼ ଅଫିସ,୨୦।୨: ନୟାଗଡ଼ ନିର୍ବାଚନମଣ୍ଡଳୀ ଅଧୀନ ନୟାଗଡ଼ ବ୍ଲକର ୧୨,୧୩,୧୪ ଓ ୧୫ ନଂ.ଜୋନ୍ ଏବଂ ଓଡ଼ଗାଁ ବ୍ଲକର ୧ ଓ ୨ ନଂ. ଆଦି ୬ ଜୋନ୍ ରହିଛି । ସେଥିମଧ୍ୟରୁ ଓଡ଼ଗାଁ ବ୍ଲକର ୧ ଓ ୨ ନଂ.ଜୋନ୍ରେ ପ୍ରଥମ ପର୍ଯ୍ୟାୟ ନିର୍ବାଚନ ସରିଛି । ୧୨,୧୩,୧୪ ଓ ୧୫ନଂ.ବୁଥ୍ରେ ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ରବିବାର ଭୋଟ ଗ୍ରହଣ କରାଯିବ ା ନିର୍ବାଚନ ହେବାକୁ ଥିବା ଏହି ୪ଜୋନ୍ରେ ପରୀ ହତ୍ୟା, ଅଚଳ ଚିନିକଳ, ଧାନର ଅଭାବୀ ବିକ୍ରି ଓ ପୁରୁଣା କର୍ମୀଙ୍କୁ ଅଣଦେଖା ତାତି ଦେଖିବାକୁ ମିଳୁଛି। ଏପରି ପ୍ରସଙ୍ଗ ଶାସକ ଦଳର ଭୋଟକୁ ବିଭାଜନ କରିବ ବୋଲି ରାଜନୈତକ ବିଶେଷଜ୍ଞକମାନେ ମତ ରଖିଛନ୍ତି । ବିଜେଡି କିନ୍ତୁ ଜିଲାର ୨୪ ଜୋନ୍ ଦଖଲ କରିବ । ନବୀନଙ୍କ ଲୋକପ୍ରିୟତା ଓ କାର୍ଯ୍ୟଦକ୍ଷତା ବିରୋଧୀଙ୍କ ସବୁ ଖେଳ ବିଗାଡ଼ି ଦେବ । ବିରୋଧୀ ଦଳର ଅପପ୍ରଚାର ଭୋଟରଙ୍କୁ ପ୍ରଭାବିତ କରିପାରିବ ନାହିଁ ବୋଲି ଦଳୀୟ କର୍ମୀମାନେ କହିଛନ୍ତି ।
ନୟାଗଡ଼ ସଦର ଥାନା ଯଦୁପୁର ଗାଁର ୫ବର୍ଷର ଝିଅ ପରୀ ହତ୍ୟା ଘଟଣାର ଏଯାବତ ଗୁମର ଖୋଲିନାହିଁ। ହତ୍ୟାକାରୀଙ୍କୁ ନୟାଗଡ଼ ବିଧାୟକ ସୁରକ୍ଷା ଦେଉଥିବା ଭାଜପା, କଂଗ୍ରେସ ସହିତ ପରୀଙ୍କ ମା’ବାପା ଅଭିଯୋଗ କରିଆସୁଛନ୍ତି । ପରୀ ହତ୍ୟାକାଣ୍ଡର ଗୁମର ଖୋଲିବା, ପରୀକୁ ନ୍ୟାୟ ଦେବା ଦାବିରେ ଦୀର୍ଘଦିନ ଧରି ଆନ୍ଦୋଳନ ଚାଲିଥିଲା । ଅନ୍ୟପକ୍ଷେ ୨୦୧୯ ସାଧାରଣ ନିର୍ବାଚନ ପରେ ଚିନିକଳ ଚାଲୁ ହେବ ବୋଲି ଶାସକ ଦଳ ପକ୍ଷରୁ ଘୋଷଣା କରାଯାଇଥିଲା । ଇତିମଧ୍ୟରେ ୩ ବର୍ଷ ବିତିଥିଲେ ମଧ୍ୟ ଚିନିକଳ ବନ୍ଦ ପଡ଼ିଛି ବହୁ ଯନ୍ତ୍ରାଂଶ ସେଠାରୁ ଚୋରି ହୋଇଗଲାଣି । ପୁଣି ବାତ୍ୟା ଜୱାଦରେ ଚାଷୀଙ୍କ ଧାନ ଫସଲ ଉଜୁଡ଼ି ଯାଇଥିଲା। ପ୍ରତି ମଣ୍ଡିରେ କୁଇଣ୍ଟାଲ ପିଛା୧୫ରୁ ୨୦କେଜି କଟ୍ନୀଛଟ୍ନୀ ଚାଲିଛି । କୃଷିମନ୍ତ୍ରୀଙ୍କ ଜିଲାରେ ଚାଷୀ ଉପେକ୍ଷିତ ହୋଇଥିବାରୁ ଅସନ୍ତୋଷ ବଢ଼ୁଛି । ବିଜେଡିରେ ପ୍ରତ୍ୟହ ନୂୂଆ କର୍ମୀ, ନେତା ମିଶୁଥିବା ବେଳେ ପୁରୁଣାନେତା, କର୍ମୀଙ୍କୁ ଅଣଦେଖା କରାଯାଉଥିବା ଅଭିଯୋଗ ଉଠିଛି । ପୁରୁଣା କର୍ମୀ ଓ ନେତା ବିକଳ୍ପ ଖୋଜୁଥିବାରୁ ଦଳ ପାଇଁ ତାହା ଘାତକ ସାଜିପାରେ ବୋଲି ମତ ପ୍ରକାଶ ପାଇଛି । ପୁଣି ଅସନ୍ତୁଷ୍ଟ ପ୍ରାର୍ଥୀ ଦଳ ବିରୋଧୀ କାର୍ଯ୍ୟରେ ଲିପ୍ତ ରହି ଶାସକ ଦଳର ଭୋଟକୁ ବିଭାଜନ କରିବା ଚିନ୍ତାର କାରଣ ପାଲଟିଛି। ସେହିଭଳି ଜିଲା ପରିଷଦ ପ୍ରାର୍ଥତ୍ତ୍ୱ ଉପରେ ପ୍ରଶ୍ନ ଉଠିଛି । ଅନେକ ଯୋଗ୍ୟ ପ୍ରାର୍ଥୀଙ୍କୁୁ ଅଣଦେଖା କରାଯାଇଥିବା ଅଭିଯୋଗ ହୋଇ ଆସୁଛି । ଏନେଇ ଜଣେ ଭୋଟର କୁହନ୍ତି, ଗଁାଗଣ୍ଡାରେ ଭୋଟ କିଣା ଚାଲିଛି। ଗୋଟିିଏ ଭୋଟର ଦାମ ୫୦୦ରୁ ଦେଢ଼ ହଜାର ଟଙ୍କାରେ ବିକ୍ରି ହେଉଛି। ସବୁ ଭୋଟର ଟଙ୍କା ନେଉ ନ ଥିଲେ ମଧ୍ୟ ବଦନାମର ବୋଝ ମୁଣ୍ଡାଇବାକୁ ପଡୁଛି। ତେବେ ଟଙ୍କା ବାଣ୍ଟୁଥିବା ଦଳ ଓ ନେଉଥିବା ଭୋଟରଙ୍କ ଯୋଗୁ ବିକାଶ ବାଟବଣା ହୋଇଛି । ଦେଶ,ରାଜ୍ୟ,ଜିଲା ଓ ଗଁା ବଦଳି ପାରୁନି। ଏଭଳି ଏକ ସମ୍ବେଦନଶୀଳ ପ୍ରସଙ୍ଗରେ କହିବା ବେଳକୁ ଅଭିଯୋଗ ରଖିବାକୁ କେହି ଆଗ୍ରହୀ ନୁହନ୍ତି। ଅନ୍ୟ ଜଣେ ଭୋଟର କୁହନ୍ତି, ରାଜନୀତିରେ ଭଲ ଲୋକ ଖୋଜିଲେ ମିଳୁନାହାନ୍ତି । ଭଲ ଲୋକଙ୍କୁ ବଦନାମ କରାଯାଉଥିବାରୁ ଧୀରେ ଧୀରେ ରାଜନୀତି କଳୁଷିତ ହୋଇ ଚାଲିଛି । ଶାସକ ଦଳ ବିରୋଧରେ ପରବର୍ତ୍ତନର ହାୱା ବହୁଛି । ହେଲେ ଏହା କେତେଦୂର କାର୍ଯ୍ୟକରିବ ଭୋଟ ଗଣତି ପରେ ଜଣାପଡ଼ିବ ବୋଲି ସେ କହିଛନ୍ତି ।
