ପ୍ରତିବର୍ଷ ମେ’ ୨୬ ତାରିଖକୁ ବିଶ୍ୱ ହକର ଦିବସ ଭାବେ ପାଳନ କରାଯାଉଛି। ବିଶ୍ୱର କୋଣ ଅନୁକୋଣରେ ହକରମାନେ ନିରବଚ୍ଛିନ୍ନ ଭାବେ ଲୋକଙ୍କ ସେବାରେ ନିଜକୁ ଉତ୍ସର୍ଗ କରିଛନ୍ତି। ଖବରକାଗଜ ବିକ୍ରିକୁ ନିଜର ପେସା ଭାବେ ଆପଣେଇଥିବା ହକରମାନେ ଖରା, ବର୍ଷା, ଶୀତକୁ ଖାତିର ନ କରି ବର୍ଷ ସାରା ନିଜର କର୍ତ୍ତବ୍ୟ ନିର୍ବାହ କରିଚାଲିଛନ୍ତି। ପାଠକଙ୍କ ନିକଟରେ ସକାଳୁ ଖବରକାଗଜ ପହଞ୍ଚାଇବାର ପ୍ରୟାସ କରି ସେମାନେ ସବୁଠି ପ୍ରିୟଭାଜନ ହୋଇପାରୁଛନ୍ତି।
ହକରମାନଙ୍କର ବହୁତ ସମସ୍ୟା ରହିଛି। କରୋନା ମହାମାରୀ ସମୟରେ ସରକାର ହକରମାନଙ୍କୁ ଆର୍ଥିକ ସାହାଯ୍ୟ ଦେଇଥିଲେ। ମାତ୍ର ବର୍ଷାଦିନେ ରେନି କୋଟ ଶୀତଦିନେ ଶୀତବସ୍ତ୍ର, ବାସସ୍ଥାନ ଓ ସ୍ବାସ୍ଥ୍ୟ ବୀମା ଆଦି ଦେବେ ବୋଲି ପ୍ରତିଶ୍ରୁତି ଦେଇଥିଲେ। କିନ୍ତୁ ଆଜିପର୍ଯ୍ୟନ୍ତ ତାହା କାର୍ଯ୍ୟକାରୀ ହେଲାନାହିଁ। ଏନେଇ ବାରମ୍ବାର ଚିଠି ଦିଆଯାଉଥିଲେ ମଧ୍ୟ ଉତ୍ତର ମିଳୁନାହିଁ। ସରକାରଙ୍କୁ ଅନୁରୋଧ କରୁଛୁ ଦେଇଥିବା ପ୍ରତିଶ୍ରୁତି କାର୍ଯ୍ୟକାରୀ କରନ୍ତୁ।
-ପ୍ରଭାସ ପ୍ରଧାନ, ଖବରକାଗଜ ବିକ୍ରେତା
ଖବରକାଗଜ ବିକ୍ରେତାମାନେ ବହୁ ସମସ୍ୟା ମଧ୍ୟରେ ରହିଆସୁଛନ୍ତି। ସରକାର ଆମମାନଙ୍କ ଉନ୍ନତି ପାଇଁ ସାହାଯ୍ୟ ଓ ସହଯୋଗ ଯୋଗାଇ ଦେବା ଆବଶ୍ୟକ। ଏବେ ଏକ ସଙ୍କଟ ଦେଖାଦେଇଛି। ଖବରକାଗଜ ବିକ୍ରି ପାଇଁ ପହଞ୍ଚିବା ପୂର୍ବରୁ ଲୋକେ ଇ-ପେପର ମୋବାଇଲରେ ପାଇଯାଉଛନ୍ତି। ଫଳରେ ଖବରକାଗଜ ବିକ୍ରି କମିବାରେ ଲାଗିଛି। ତେଣୁ ସକାଳ ୧୦ଟା ପରେ ଇ-ପେପର ଇଣ୍ଟରନେଟରେ ଛଡ଼ାଯାଉ। ଏଥିସହ ପିଡିଏଫ୍ ଫାଇଲ୍ ଶେୟାର ଉପରେ ରୋକ୍ ଲଗାଯାଉ। ଖବରକାଗଜ ପହଞ୍ଚିବାକୁ ପାଠକ ଅପେକ୍ଷା କରି ରହିବେ। ପୂର୍ବପରି ଖବରକାଗଜ ବିକ୍ରି ହେବ।
-ସନ୍ତୋଷ ମହାନ୍ତି, ଖବରକାଗଜ ବିକ୍ରେତା
୩୯ ବର୍ଷ ତଳେ ଖବରକାଗଜ ବିକ୍ରି ଆରମ୍ଭ କରିଥିଲି। ସେତେବେଳେ ରାତି ୧୨ଟା ଯାଏ ପାଠକମାନେ ଖଣ୍ଡେ ଖବରକାଗଜ ପାଇଁ ଅପେକ୍ଷା କରି ରହୁଥିଲେ। ଏବେ ଆଉ ସେ ସମୟ ନାହିଁ। ବୈଦ୍ୟୁତିକ ଗଣମାଧ୍ୟମ ପ୍ରତିମୁହୂର୍ତ୍ତରେ ଖବର ପରିବେଷଣ କରୁଥିଲେ ବି ଖବରକାଗଜ ଭୂମିକା କିନ୍ତୁ ଅଲଗା। ଯେତେ ବାଧାବିଘ୍ନ ଆସିଲେ ବି ଖବରକାଗଜ ବିକ୍ରି ନିଶାରେ ପରିଣତ ହୋଇସାରିଛି।
-ରଘୁନାଥ ପାଣିଗ୍ରାହୀ, ଖବରକାଗଜ ବିକ୍ରେତା
୧୯୮୨ ମସିହାରେ ଖବରକାଗଜ ବିକ୍ରି ଆରମ୍ଭ କରିଥିଲି। ସେତେବେଳେ ସା ସଂସ୍କରଣ ଥିଲା। ମାତ୍ର ଏବେ ଲୋକଙ୍କ ରୁଚି ବଦଳିଛି। ନୂଆ ନୂଆ ସ୍ବାଦର ଖବର ଲୋକେ ଖବରକାଗଜରୁ ଆଶା ରଖୁଛନ୍ତି, ଯାହାକି ଅନ୍ୟତ୍ର ମିଳିବ ନାହିଁ। ପାଠକମାନଙ୍କ ରୁଚିକୁ ପ୍ରାଧାନ୍ୟ ଦେଇ ଖବରକାଗଜରେ ଭିନ୍ନ ରୁଚିର ଖବର, ସାହିତ୍ୟ ବା ଅନ୍ୟାନ୍ୟ ପ୍ରସଙ୍ଗଭିତ୍ତିକ ରହିବା ଆବଶ୍ୟକ ବୋଲି ମନେକରୁଛି।
-ଦୀନବନ୍ଧୁ ସାହୁ, ଖବରକାଗଜ ବିକ୍ରେତା
