ପୁରୀ ଅଫିସ,୧ା୧୧: ସହରବାସୀଙ୍କ ସହଯୋଗ ରହିଲେ ସ୍ବଚ୍ଛତା କ୍ଷେତ୍ରରେ ଭାରତର ଅନ୍ୟ ସମସ୍ତ ତୀର୍ଥକ୍ଷେତ୍ର ପାଇଁ ଶ୍ରୀକ୍ଷେତ୍ର ଉଦାହରଣ ସାଜିପାରିବ। ୨୦୨୧ ସ୍ବଚ୍ଛ ସର୍ବେକ୍ଷଣରେ ପୁରୀ ଦେଶରେ ୧ ନମ୍ବର ସ୍ଥାନ ହାସଲ କରିପାରିବ। ଏଥିପାଇଁ ରବିବାରଠାରୁ ସପ୍ତାହବ୍ୟାପୀ ‘ମୋ ଧାମ, ମୋ ଗର୍ବ’ ଅଭିଯାନ ଆରମ୍ଭ ହେଉଛି। ଶନିବାର ପୁରୀ ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ସମ୍ମିଳନୀ କକ୍ଷରେ ଆୟୋଜିତ ଖବରଦାତା ସମ୍ମିଳନୀରେ ଜିଲାପାଳ ବଲୱନ୍ତ ସିଂ ଏହି ସୂଚନା ଦେଇଛନ୍ତି। ସେ କହିଛନ୍ତି, ରବିବାର ଜଗଦ୍ଗୁରୁ ଶଙ୍କରାଚାର୍ଯ୍ୟ ଗୋବର୍ଦ୍ଧନ ମଠ ପରିସରରେ ଏହି ଅଭିଯାନର ଲୋଗୋ ଉନ୍ମୋଚନ କରିବେ। ସହରର ପ୍ରତି ୱାର୍ଡରେ ଏହି ଅଭିଯାନ ଚାଲିବ। ପ୍ରତ୍ୟେକ ଘରେ ଓଦା, ଶୁଖିଲା, ସଂକ୍ରମିତ ଓ ହାନିକାରକ ଆବର୍ଜନା ଲାଗି ଭିନ୍ନ ରଙ୍ଗର ଡଷ୍ଟବିନ ରଖିବାକୁ କୁହାଯାଇଛି। ଆବର୍ଜନାକୁ ପୃଥକୀକରଣ କରି ସ୍ବଚ୍ଛ ସବାରି ଗାଡ଼ିିରେ ଦେବେ। ସେହିପରି ୬ ଓ ୭ ତାରିଖରେ ଏହି ଅଭିଯାନରେ ସାମିଲ ହୋଇ ସହରକୁ ସ୍ବଚ୍ଛ ରଖିବା ଲାଗି ସଂକଳ୍ପ ଓ ଶପଥ ନେବେ। ସ୍ବଚ୍ଛ ସବାରି ଗାଡ଼ିିର ଦୁଇପାର୍ଶ୍ୱ ବ୍ୟାନରରେ ସହରବାସୀ ଦସ୍ତଖତ କରିବେ। ପ୍ରତି ଘର ସମ୍ମୁଖରେ ‘ମୋ ଧାମ, ମୋ ଗର୍ବ’ ଲେଖି ଲଗାଇବେ। ୮ତାରିଖରେ ପୁରୀ ବେଳାଭୂମିରେ ଦସ୍ତଖତ ପ୍ରଦର୍ଶନ କରାଯିବ ବୋଲି ଜିଲାପାଳ ସିଂ କହିଛନ୍ତି। ଏହି ଖବରଦାତା ସମ୍ମିଳନୀରେ ଉପଜିଲାପାଳ ଭବତାରଣ ସାହୁ, ପୌର ନିର୍ବାହୀ ଅଧିକାରୀ ବିଜୟ କୁମାର ଦାଶ ଉପସ୍ଥିତ ଥିଲେ।
