ପୁରୁଣା ଭୁବନେଶ୍ୱର, ୧ା୩(ଡି.ଏନ୍.ଏ.):ଆଜି ମହାଶିବରାତ୍ରି। ଉତ୍ସବ ମୁଖରିତ ହୋଇଉଠିଛି ଏକାମ୍ର କ୍ଷେତ୍ର। ଫୁଲରେ ଝଲୁସୁଛି ଶ୍ରୀଲିଙ୍ଗରାଜଙ୍କ ମନ୍ଦିର। ପ୍ରଶାସନର ସୌନ୍ଦର୍ଯ୍ୟକରଣ ଓ ବିକାଶମୂଳକ କାର୍ଯ୍ୟ ଜାରି ରହିଥିବା ବେଳେ ଏଥର ନୂଆ ରୂପରେ ଦୃଶ୍ୟମାନ ହେଉଛି ସାରା ଅଞ୍ଚଳ। ବିଏମ୍ସି ଗାଇଡ୍ଲାଇନ ମୁତାବକ ଲିଙ୍ଗରାଜଙ୍କ ଜାଗରଯାତ୍ରା ଅନୁଷ୍ଠିତ ହେବ। ମହାପ୍ରଭୁ ଓ ମହାଦୀପ ଦର୍ଶନ ପାଇଁ ଶ୍ରଦ୍ଧାଳୁଙ୍କ ମନରେ ଉତ୍କଣ୍ଠା ଦେଖିବାକୁ ମିଳିଛି। ମଙ୍ଗଳବାର ଭୋର୍ ୩ଟାରୁ ଦ୍ୱାର ଫିଟାଯାଇ ମଙ୍ଗଳଆଳତି, ଅବକାଶ ନୀତି ପରେ ସାହାଣ ମେଲା ଦର୍ଶନ ଆରମ୍ଭ ହୋଇଛି। ସିଂହଦ୍ୱାର ସମ୍ମୁଖରୁ ବ୍ୟାରିକେଟ ଦେଇ ଶ୍ରଦ୍ଧାଳୁ ଆଡ଼କାଠଠାରେ ଦର୍ଶନ କରି ଦକ୍ଷିଣଦ୍ୱାର ଦେଇ ପ୍ରସ୍ଥାନ କରୁଛନ୍ତି। ରାତି ୧୦ଟାରେ ମହାଦୀପ ଉଠିବ। ଏଥିପାଇଁ ବ୍ରତଧାରୀମାନେ ସେହି ମୂହୁର୍ତ୍ତକୁ ଅପେକ୍ଷା କରିଛନ୍ତି। ଅନ୍ୟପରେ ସୋମବାର ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ସୁରକ୍ଷା ବ୍ୟବସ୍ଥା ଯାଞ୍ଚ କରିଛନ୍ତି। ମନ୍ଦିର ଭିତର ଓ ବାହାର, ବ୍ୟାରିକେଡ ବ୍ୟବସ୍ଥା ବୁଲି ଦେଖିଛନ୍ତି। ଶାନ୍ତିଶୃଙ୍ଖଳା ରକ୍ଷା କରିବା ପାଇଁ ପିଠରେ ୩୪ ପ୍ଲାଟୁନ୍ ଫୋର୍ସ ମୁତୟନ କରାଯିବ। ୨୭ ପ୍ଲାଟୁନ୍ ଫୋର୍ସ ଲିଙ୍ଗରାଜ ମନ୍ଦିର ପରିସରରେ ରହିବାକୁ ଥିବାବେଳେ ୭ ପ୍ଲାଟୁନ୍ ଫୋର୍ସ ରାଜଧାନୀର ଅନ୍ୟ ସ୍ଥାନରେ ମୁତୟନ ହେବେ। ଡିସିପିଙ୍କ ପ୍ରତ୍ୟେକ ତତ୍ତ୍ୱାବଧାନରେ ୬ଜଣ ଅତିରିକ୍ତ ଡିସିପି, ୧୨ଜଣ ଏସିପି, ୧୯ଜଣ ଇନସ୍ପେକ୍ଟର, ୮୬ଏସ୍ଆଇ ଓ ଏଏସ୍ଆଇ, ୪୮ହାବିଲଦାର ଓ କନେଷ୍ଟବଳ, ଓଆର କନେଷ୍ଟବଳ ୧୩ଜଣ, ୧୦୨ହୋମଗାର୍ଡଙ୍କ ସମେତ ୨୭ ପ୍ଲାଟୁନ ଫୋର୍ସ ମୁତୟନ ହେବେ। ଲୁଟେରାଙ୍କ ଉପରେ ନଜର ରଖିବା ପାଇଁ ସାଦା ପୋଷାକଧାରୀ ପୋଲିସ ନିୟୋଜିତ ହେବେ। ଏଥିସହ ମନ୍ଦିର ଭିତରେ ଓ ବାହାରେ ଲଗାଯାଇଥିବା ସିସିଟିଭି ନଜର ରଖିବ ବୋଲି ଲିଙ୍ଗରାଜ ଥାନା ଆଇଆଇସି ଶରତ ଚନ୍ଦ୍ର ପାତ୍ର କହିଛନ୍ତି। କେଦାରଗୌରୀ ଛକ, ଗ୍ୟାରେଜ ଛକ, ହାଟସାହି ରାସ୍ତା, ବଢ଼େଇବାଙ୍କ ଆଦି ସ୍ଥାନରେ ଟ୍ରାଫିକ ପୋଲିସ ଭିଡ଼ ନିୟନ୍ତ୍ରଣ କରିବେ।
