ସୁନ୍ଦରଗଡ/ଟେନ୍ସା/ବଣାଇଁ, ୬।୧ (ଡି.ଏନ.ଏ/ସ୍ବ.ପ୍ର): ବେଆଇନ ମଦ କାରବାର ଉପରେ ଚଢାଉ ପାଇଁ ସୁନ୍ଦରଗଡ ଜିଲା କୋଇଡା ବ୍ଲକ ଟେନସା ଫାଣ୍ଡି ଅଧୀନ ଜିରୋ ପଏଣ୍ଟ ହାଟିଂ (ବସ୍ତି)କୁ ଯାଇଥିବା ବେଳେ ଫାଣ୍ଡି ଅଧିକାରୀ ଅଶୋକ କୁମାର ବେହେରାଙ୍କୁ ତୀରମାଡ଼ ହୋଇଛି। ଗୁରୁତର ଅବସ୍ଥାରେ ତାଙ୍କୁ ରାଉରକେଲା ଜେନେରାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଅନ୍ୟପକ୍ଷେ ପୋଲିସ ଭୟରେ ଉକ୍ତ ବସ୍ତି ପୁରୁଷଶୂନ୍ୟ ହୋଇପଡିଛି ।
ସୂଚନା ଅନୁସାରେ, ଜିରୋ ପଏଣ୍ଟ ହାଟିଂ (ବସ୍ତି)ରେ ବେଆଇନ ମଦ କାରବାର ଚାଲିଥିବା ଖବର ପାଇ ମଙ୍ଗଳବାର ଅପରାହ୍ନ ପ୍ରାୟ ସାଢେ ୪ଟା ବେଳେ ଫାଣ୍ଡି ଅଧିକାରୀ ବେହେରା ଓ ପିସିଆର ଭ୍ୟାନ୍ ଡ୍ରାଇଭରଙ୍କ ସହ ସେଠାକୁ ଯାଇଥିଲେ। ବସ୍ତିରେ କିଛି ଯୁବକଙ୍କ ସହିତ ଫାଣ୍ଡି ଅଧିକାରୀ ବେହେରାଙ୍କ ଯୁକ୍ତିତର୍କ ହୋଇଥିଲା। ଏହି ସମୟରେ ବେହେରାଙ୍କୁ ଲକ୍ଷ୍ୟ କରି ବସ୍ତି ଭିତରୁ କେହି ଜଣେ ତୀରମାଡ଼ କରିଥିଲେ। ଫଳରେ ତୀରଟି ତାଙ୍କ ଡାହାଣ ପାଖ ପେଟରେ ପଶିଯାଇଥିଲା। ପିସିଆର ଭ୍ୟାନ ଡ୍ରାଇଭର ତୁରନ୍ତ ତାଙ୍କୁ ଟେନ୍ସା ଇସ୍ପାତ ହସ୍ପିଟାଲକୁ ନେଇଥିଲେ। ସେଠାରେ ପ୍ରାଥମିକ ଚିକିତ୍ସା କରାଯାଇଥିଲା। ଅବସ୍ଥା ଗୁରୁତର ଥିବାରୁ ତାଙ୍କୁ ରାଉରକେଲା ଜେନେରାଲ ହସ୍ପିଟାଲ(ଆରଜିଏଚ୍)କୁ ସ୍ଥାନାନ୍ତର କରାଯାଇଛି। ବରିଷ୍ଠ ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
